Den edicion recien di Bon Dia Aruba nos a publica un articulo unda nos a papia tocante e temporada seco y caluroso cu te ainda ta nos dilanti pa e aña aki.

Den e articulo aki, nos a comparti algun tip tocante con pa cuida nos salud y bienestar den e periodonan aki di calor extremo, sinembargo nos kier enfatisa tambe e importancia di tin extra cuido y extra atencion riba nos adultonan grandi, pa motibo cu e manera cu nan ta experiencia e calor y con esaki ta afecta nan ta un poco diferente.

Recientemente nos a reporta tocante e rapport di WWA, Centro di Clima di Cruz Cora y Climate Central publica tocante e dia di accion pa calor, unda a resalta cu Aruba ta prome den lista di e paisnan cu ta experiencia mas dia caluroso den un periodo di 1 aña.

Como un recordatorio chikito, segun Organisacion Mundial di Salud (WHO), e cantidad di calor cu nos ta warda den nos curpa ta afecta pa un incapacidad di elimina e calor cu e curpa ta elimina di su mes, paña cu ta stroba e calor di sali for di nos curpa y un calor externo cu nos ta haya di nos medio ambiente. E falta di capacidad aki pa regula temperatura interno y elimina calor excesivo ta loke por causa e asina yama ‘heatstroke.’

Entre adultonan mayor y personanan cu condicionnan medico pre-existente, e calor extremo por ta un factor cu ta aumenta riesgo di varios cos manera entre otro tension cardiovascular, angustia respiratorio y morto prematuro.

Adultonan mayor no tin e mesun habilidad di adapta y ahusta manera esnan mas hoben na cambionan repentino den temperatura. Nan ta hopi mas probable di tin un condicion medico cronico cu por cambia e respuesta normal di e curpa na calor y nan ta mas probable di tuma medicamento cu ta afecta e curpa su habilidad di controla temperatura of sodo.

Pa e varios motibo aki ta importante pa nos presta extra atencion na nos adultonan mayor y tene nan vulnerabilidad aumenta na cuenta.

Tipnan pa keda safe den dianan caluroso

Keda den edificionan friu lo mas cu ta posible. Den caso cu na cas no tin airco, ta util pa localisa cas di un familiar of amigo cercano unda si tin airco pa por tuma refugio den e dianan unda e calor ta mas eleva. Ta importante pa tene na cuenta cu no mester depende riba fan como e fuente principal pa refresca ora cu pafo ta demasiado cayente.

Bebe mas awa di lo normal y no warda te ora tin sed pa bebe awa. Si un dokter a limita e cantidad di likido cu bo bebe of a receta pildonan di awa, ta importante pa puntra con hopi awa bo mester bebe durante temponan caluroso.

Si ta un posibilidad, evita e uso di stoof of forno pa cushina, pa motibo cu esaki por haci e cas hopi mas cayente. Esaki ta specialmente util pa tene na cuenta den casnan unda airco no ta disponible.

Bisti paña di colornan licht, cu ta los y no ta pisa hopi. Paña por ta un di e factornan cu ta stroba e calor di sali for di nos curpa, cual ta un di e factornan den caso di un ‘heatstroke.’ Den caso cu bo ta sinti demasiado cayente, baña cu awa friu.

Ta importante pa nos brinda sosten uno na otro, y di mesun manera cu nos ta cuida di nos sernan keri, ban cuida tambe di nos bisiñanan y tira un bista riba nan durante e temporada aki unda nos grandinan por ta specialmente vulnerable.