Nos secenario politico tin su momentonan di ridiculez auto-imponi, manera actualmente den e debate tocante edad (halto) di e persona mientras tanto proponi, acepta, nombra y huramenta como ministro. E critica cu a resalta mas tabata di parti di oposicion, señalando cu e partido den gobierno lo ta ignorando tur e hobennan den nan seno, na fabor di un persona cu ni siquiera tabata riba lista pa eleccion. Un punto di vista risible, si tur hende sa cu bo no mester ta riba lista pa por bira ministro.

Nos Constitucion ta pone limite di edad mimimo, no maximo pa ministro. Un ministro mester tin edad di 25 aña, mester ta di nacionalidad Hulandes y no ta exclui di derecho di voto, nada mas. Bon, naturalmente mester pasa ainda den e proceso di screening. Pakico esaki ta asina, si pa un gran cantidad di funcion halto sí tin limite di edad, manera pa miembro di Raad van State (70 aña), cu ta conta tambe pa e miembro di Aruba di e organo ey. E ta conta pa miembro di Raad van Advies, di Rekenkamer, ademas di e edad di pension cu ta conta pa tur persona den servicio publico. Pa no limita ciudadano na e puesto specifico aki? Di e limite di 25 aña di edad e splicacion di nos Constitucion ta bisa: “ Pa loke ta e requisito di e edad minimo nos ta observa cu razonablemente por spera di persona, di edad di 25 aña y mas halto, suficiente madurez pa por cumpli cu e funcion responsable di ministro manera mester ta.” Tambe, si nos tira un vistazo pafor di nos pais, por mira cu na mayoria di nan tin politico di edad hopi avanza ta funciona ainda. Edad halto no ta considera anto como un señal di ineptitud pa ta ministro, cerca nos tampoco.

Ademas, en general y sigur den un sociedad chikito cu recurso (humano) limita, nos lo mester hiba e discusion con pa mantene nos hendenan di mas edad activo, na beneficio di comunidad mes. Riba esey mas den e edicion aki, pero awor e parti di participacion di hoben den e proceso di gobernacion.

Di parti opositor a mustra riba e hecho cu e partido mayoritario den gobierno tin hoben, por ehemplo den Staten, cu por a haya prioridad riba e persona di edad designa, si e partido tabata desea esey. Hasta a presenta esaki manera un bofta den cara di e hobennan, cu lo a keda menosprecia pa nan lidernan. Esaki ta parce nos politica di baratillo, si e propio partido asina critico den e asunto aki, den nan composicion den parlamento, ta mustra ningun cara hoben mes… Un regla propaga anto cu no ta conta pa bo mes? Naturalmente lo bisa cu, si acaso nan bay den gobierno, anto tur e politiconan di promer rango ta bira ministro y esey ta habri caminda pa e hobennan drenta parlamento, toch? E argumento ta keda mes bruha, pasobra cu esey ta confirmando cu tur puesto di promer categoria ta ocupa pa e generacion actual cu tin e experiencia politico, y e hobennan di ‘segundo rango’, sin experiencia politico ta yega na turno, si acaso e partido drenta gobierno, y si no, nan sinta warda nan turno…? Henter e discusion aki ta parce nos un inmenso perdida di tempo, y ta recomendable pa huzga e ministro nobo, cu no ta bay t’ey ‘temporalmente’, segun su actuacion.

Pa bolbe na e asunto di persona di edad en general. Den e comunidad chikito aki di mes caba nos tin falta di experticio riba hopi tereno, loke semper ta conduci na importacion continuo di conocimento. Y mas nos ta descarta nos hendenan cu experiencia y conocimento, pasobra segun otronan e persona di edad ey ta ‘mucho bieu’, menos nos ta conserva experiencia y conocimento di e personanan ey. Ademas, nos por mira por ehemplo den gobernacion e gran debilidad den traspaso di experiencia den mayoria di entidad y institucion, cu e consecuencia cu experiencia no ta keda dentro di e entidadnan di forma structura. Aki tambe e realidad di organizacion chikito, cu talvez solamente un par di persona na mando cu ta maneha conocimento y experticio, ta mustra e debilidad cronico di organizacion, cu ta cay atras na momento di salida di e par di persona clave ey, lagando e organizacion cu su cuadronan medio limita pa asumi tur responsabilidad. Nos por a mira esaki den e caso reciente di nos servicio meteorologico, unda e persona cu e nivel adecua di conocimento y experticio a keda aleha di e entidad, cu consecuencia cu mester a cay back riba experticio di e servicio meteorologico di Corsou pa asisti den trabao rutinario necesario. ‘So much for’ e gritonan regular di orguyo falso di ‘autonomia Rubiano’ cu ta reconoce e valor di nos hendenan solamente si esey pa casualidad ta cuadra cu e color politico momentaneo den gobernacion.

Pero, nos mester por mira e cuestion di edad aki for di un angulo mas positivo tambe. Esey cuminzando cu cuestiona e pensamento cu hende di edad no ta sirbi pa mucho mas cu sinta keto y laga otro yuda nan, si acaso e ayudo ey ta disponible, loke ta birando mas y mas un problema pa e forma individualiza cu nos sociedad ta organiza awendia. Nos ta scucha yamado pa acomoda e parti di anciano cu mester ayudo, loke ta hustifica, pero casi nunca di mobilizacion di hende di edad pa keda participa na comunidad. Hende di edad no mester un ‘penultimo lugar di sosiego’, si nan no ta desea esey.