Trampanan digital ta birando mas comun na Aruba, unda a mira varios website y paginanan riba red social disfrasa como paginanan local pa estafa hende of plama desinformacion. A nota den e ultimo lunanan cu ainda tin varios turista cu ta cay den e trampa di estafadornan online cu ta presenta como e website di ED-Card, cobrando bishitantenan hopi mas cu e prijs oficial di $20 pa persona.

Na juli 2023 caba, e Departamento di Inmigracion a nota cu tin algun website cu ta presenta nan mes como e website oficial pa yena ED Card. Entre otro websitenan falso, a alerta cu por ehempel, ‘embarkation-aruba.com’ ta uno cu ta cobra hende pa yena ED, siendo cu e tempo ey e ED Card tabata gratis. Sinembargo, despues di e introduccion di e Sustainability Fee di $20, atrobe a surgi confusion entre biaheronan cu kier bin Aruba.

Algun turista a nota cu algun website ta bisa na inicio cu e ED Card ta costa $20 pa persona, pero despues di yena tur informacion necesario, ta mira cu e website a marca un prijs hopi mas halto. Por ehempel, un turista a comparti cu pa dos persona e mester a paga $199,98 despues di yena tur su informacion. Un otro a comparti cu ora a bishita e isla den augustus aña pasa, el a paga e $40 den total pa e y su casa, pero cu awor (juni), mester a paga $69. Otro a conta cu e mester a paga $70 pa un solo persona.

Entre e websitenan falso, a menciona ‘aruba-edcard.online’ y ‘aruba-ed-card-digital-form.com’. Sinembargo, investigacion adicional ta mustra cu tin varios, entre otro ‘enteraruba.com’; ‘aruba-enter-with-ed-card.com’ y ‘arubaedcard.nl’. Ademas, mester nota cu e website cita na 2023 ainda ta operacional. Un posible motibo cu turistanan por haya nan mes den confusion ta debi cu tin biaha e website oficial no ta e prome cu ta aparece riba lista di Google, cual turistanan por a usa pa busca e website. Tin biaha e website oficial ta scondi entre esnan falso, por ehempel como e di tres of cuatro link.

E website oficial di ED Card ta www.edcardaruba.aw

Aruba ta mirando mas estafa online
Casonan di estafa online ta birando mas visible. Den e ultimo lunanan, Bon Dia Aruba a haya varios informe y a mira varios plataforma riba red social cu ta plama desinformacion usando e nomber y aparencia di nos corant hermana, Aruba Today, frecuentemente usando titulonan controversial y falso tocante politiconan di Aruba. E articulonan falso aki hopi biaha ta parce legitimo, loke a causa cu par local a hera cay den trampa di e estafa.

Un caso asina a yega na mesa di Bon Dia Aruba den luna di mei, na unda un lector a comparti cu equipo di redaccion cu el a hera duna su informacion priva di credit card pa un estafador via yamada.

Manera e lector a conta, el a mira un publicacion riba Facebook bao un perfil cu no ta un agencia noticiero na Aruba. Den e publicacion por a mira minister Geoffrey Wever contando cu localnan por participa den un plataforma di inversion, pa cual mester paga un suma di antemano.

Afortunadamente, e lector a confirma cu na dado momento el a realisa cu algo no ta corecto y no a sigui duna mas informacion.

Aunke e caso aki no a mira ningun daño significante na e victima, esaki no semper ta e caso. Mirando cu tecnologia ta birando cada bes mas avansa, ta birando menos cla kico ta falso y kico ta berdad online. Ta parce cu mas nos avansa den un mundo tecnologico,mas necesidad nos tin pa conocemento di con pa maneha e mundo nobo aki. Sea critico, vigilante y busca confirmacion cerca autoridadnan ta un bon caminda pa cuminsa.