Diahuebs atardi, a lansa e plan ambicioso y sin precedente pa planta 100.000 mata rond di nos isla, durante un ceremonia special di apertura pa e Programa di Refortestacion di Aruba. E evento a trece 27 organisacion no-gubernamental (NGO’s) cu a uni na e mesun meta: restaura nos habitat natural, yuda proteha nos hendenan contra e calor, y crea mas sombra tur rond di Aruba.
Durante e ceremonia, Francielle Laclé, un lider hoben y consehero di politica ambiental pa Ministerio di Naturalesa, a enfatisa cu den cuater aña, kier logra planta cien mil mata. Esaki por logra si tur hende traha hunto. Mester di cooperacion y compromiso di tur sector pa logra un Aruba mas berde.
E proyecto ta un esfuerso colectivo entre organisacionnan ambiental, scolnan, sector priva, turismo, comercio y mucha mas. Den e prome sesion cu stakeholders, a establece e siguiente paso: formacion di un “stuurgroep” cu lo guia e proceso, y tambe un klankbord pa duna espacio na mas organisacion pa duna input, comparti idea y forma parti di e proyecto.
Un di e companianan principal for di inicio di e plan ambicioso aki ta Grupo Bennu, y den nan nomber, Joanette Vrutaal, HR Manager di Bennu, a hiba palabra y a gradici famia Ibrahim, cu a pesar di ta den exterior, a bay di acuerdo di biaha pa sostene y forma parti di e momento historico. Total Grupo Bennu a planta 65 mata riba e rotonde adopta, contribuyendo pa yega mas cerca di e meta di cien mil.
Sra. Vrutaal a subraya cu “aunke e rotonde ta chikito, e ta un simbolo – manera nos himno: chikito y simpel, pero respeta y gusta pa tur hende”.
Sra. Vrutaal a gradici Gobierno di Aruba, pa acepta e propuesta y facilita e proyecto. Ademas a gradici Fantastic Garden pa su cooperacion y pa haci posible e plantacion cu por aprecia awe. Aunke e rotonde no ta completamente cla, Sra. Vrutaal a sigura cu esaki lo bira un di e rotondenan di mas bunita riba Aruba.
E Programa di Refortestacion ta mas cu solamente planta mata – ta un movimiento pa un Aruba mas fresco, mas verde y mas unido.
