Recientemente a keda publica e reaccion di Colegio di Supervision Financiero (CAft) riba e rapport di implementacion di Landspakket pa prome kwartaal di 2025. Presidente di CAft, Lidewijde Ongering a comunica esaki mediante un carta na minister di Finanzas, Geoffrey Wever.

Den e carta, CAft ta menciona cu e prome rapport di implementacion ta mustra un surplus provisional di Afl. 122 miyon, ekivalente na 1.7 porciento di GDP. “Aruba actualmente ta cumpli cu e standard di balans financiero di sector colectivo, como tambe e standard di gasto di personal,” e carta ta bisa. “E tasa di debe ta bahando di manera stabiel, y e pais ta na caminda pa alcansa un tasa di debe di 50 porciento prome cu aña 2040.” CAft ta indica ademas cu mas reduccion di debe ta posible si aloca e surplus den e fondonan di cuido di salud y seguridad social pa e proposito aki. Pero ta adverti cu inversion ta cay atras significantemente.

E prome agenda di implementacion ta mustra un surplus provisional di Afl. 122 miyon pa sector colectivo. Pa fin di 2025, Aruba ta spera un surplus di Afl. 256 miyon. E prome propuesta di presupuesto cu amienda (OBW) di 2025 a proyecta un surplus di Afl. 192 miyon.

CAft ta observa un desaroyo faborable den entrada di impuesto, specialmente di impuesto indirecto. Si e tendencia aki continua, gobierno lo por spera di ricibi mas entrada di loke a spera.

Mirando e desaroyonan geopolitico y e incertidumbre economico asocia, CAft ta considera prudente pa no ahusta e presupuesto ainda – particularmente pasobra cu desaroyonan den economia Mericano por afecta sector di turismo.

CAft ta conseha monitoreo mensual pa evalua si e resultadonan ta desvia di proyeccionnan y pa inclui cualkier ahuste den e segundo amienda di presupuesto.

Tocante costo di personal, te cu 31 di maart ultimo, e gasto di personal a alcansa Afl. 122 miyon. Pa 2025, e gastonan aki ta calcula na alrededor di 7 porciento di GDP, kedando dentro di e limite di 10 porciento, cu ta bay ta na vigor desde 2027. Sinembargo, Aruba mester continua su esfuersonan pa controla gasto di personal den proximo añanan.

Tocante e tasa di debe, CAft a comenta cu te cu fin di maart 2025, debe di Aruba ta Afl. 5.145 biyon, un aumento di Afl. 124 miyon compara cu e mesun periodo na 2024. E tasa di debe-pa-GDP ta 70 porciento (pa e pais, no e sector colectivo, di cual su composicion ainda no ta determina.)

E tasa di debe ta keda vulnerable pa shock economico, y pago di interes (16 porciento di debe) ta continua un peso grandi. Mester baha e debe mas ainda pa reforsa e resiliencia financiero di Aruba. Anteriormente, CAft a conseha acuerdonan rapido cu AZV y SVb pa usa nan surplus pa paga back debe, mientras ta observa rekisitonan legal di reserva. Si usa e fondonan aki pa paga debe externo, lo reduci e debe di sector colectivo y spaar den pago di interes.

Mientras tanto, CAft a nota cu inversion ta kedando atras. Aruba a presupuesto Afl. 71 miyon den inversion pa 2025. Sinembargo, apenas a realisa Afl. 0.2 miyon den prome kwartaal. Sector di construccion – pa motibo di crecemento economico continuo – a causa retraso den proceduranan di contratacion pa proyectonan di inversion financia pa gobierno. Esaki ta confirma e advertencia anterior di CAft, cu no ta bay logra realisa tur inversion planea pa 2025.

CAft ta conseha Aruba pa desaroya un agenda di inversion multianual alinea cu prioridadnan di politica y capacidad di implementacion. Mester substancia e inversion y evalua su factibilidad. Actualmente, no ta cla cua proyecto ta ehecutando bao di e presupuesto di Afl. 71 miyon.

CAft ta pronostica cu no ta bay realisa tur inversion presupuesta e aña aki. Consistente cu conseho anterior riba e planta di maneho di awa di riool (RWZI), CAft ta resalta e posibilidad di aloca (parti di) e espacio disponible pa inversion pa e proyecto aki. Si enfoca recurso riba un proyecto specifico, lo por ta mas facil pa organisa y maneha su ehecucion.

Den e parti di splicacion y substanciacion numerico, basa riba e rapport di implementacion y OBW 2025 di Aruba, CAft a nota cu den prome kwartaal di aña, Aruba a realisa Afl. 415 miyon den entrada – cual ta Afl. 4 miyon (alrededor di 1%) mas cu den prome kwartaal di 2024. Entrada di impuesto a aumenta cu Afl. 36 miyon, mientras otro entrada a baha cu Afl. 34 miyon compara cu e mesun periodo aña pasa.

Entrada di impuesto a aumenta cu Afl. 36 miyon compara cu prome kwartaal di 2024, completamente pa motibo di impuesto indirecto mas halto (Afl. 48 miyon). Impuesto directo a cay cu Afl. 12 miyon, en gran parti pa motibo di e reduccion di e tarifa di inkomstenbelasting di 10 porciento pa 0 porciento for di dia 1 di januari 2025.

Loke a impulsa e aumento den impuesto indirecto tabata BBO/BAVP (Afl. 9 miyon), invoerrechten (Afl. 7 miyon), toeristenheffing (Afl. 29 miyon), y aumento neto excluyendo reclasificacion (Afl. 19 miyon).

Otro entradanan di gobierno a baha cu Afl. 34 miyon, principalmente pa motibo di e reclasificacion di toeristenheffing y e realisacion mas abao di diferente entrada (Afl. 9 miyon). E agenda di implementacion no ta inclui un splicacion pa e caida aki.

Pa loke ta gasto, e gasto total den prome kwartaal di 2025 tabata Afl. 370 miyon, un aumento di Afl. 21 miyon (9 porciento) riba e prome kwartaal di 2024.

Gasto di personal a aumenta cu Afl. 11 miyon na Afl. 122 miyon, vincula na indexering implementa den di dos mita di 2024.
Subsidio a aumenta cu Afl. 7 miyon na Afl. 61 miyon.
A pesar di e aumento, ehecucion ta keda den linea cu presupuesto.

Kapitaaldienst a mustra un resultado positivo di Afl. 5 miyon den prome kwartaal di 2025.
Ingreso tabata Afl. 10 miyon, principalmente di liberacion di depreciacion;

Gasto tabata Afl. 5 miyon, principalmente pa prestamo pa studiante.

Di e Afl. 71 miyon den presupuesto di inversion pa 2025, apenas a realisa 1 porciento den prome kwartaal. Basa riba subtuilisacion structural den añanan anterior, CAft ta hay’e irrealistico pa spera ehecucion completo den 2025 y ta sugeri pa reloca recurso – entre otro na e planta di maneho di awa (RWZI).

Tocante maneho financiero, CAft a nota cu como parti di e Landspakket, Aruba ta trahando pa reforsa maneho financiero, y a logra progreso. A elimina atraso den entrega di rapport di implementacion, a entrega e cuentanan financiero pa 2019 y 2020 na Algemene Rekenkamer, y e resto di e cuentanan ta bay keda entrega e aña aki.

Entidadnan
 CAft tambe a duna algun informacion tocante entidadnan estatal, notando cu e resultandonan positivo pa e prome kwartaal 2025 ta principalmente pa surplus. AZV tabatin un surplus di Afl. 19 miyon (cu tabata proyecta na Afl. 71 miyon, Afl. 4 miyon mas cu loke a presupuesta). Svb tabatin un rusplus di 24 miyon (alinea cu presupuesto), y ATA tabatin un surplus di Afl. 29 miyon.

Aruba y Hulanda ta determina conhuntamente, bianualmente y cu conseho di CBS Aruba y CBS Hulanda, cua entidad legal ta pertenece na sector colectivo pa e proximo aña fiscal. Pa 2025, e composicion aki ainda mester keda estableci formalmente pa e ministerio Hulandes di Interior y Asunto di Reino (BZK).

CAft ta enfatisa e importancia di un maneho uniforme na Aruba, Corsou y Sint Maarten.