Despues di a bay corte pa un caso contra directiva di CAPA, hues a dicta un sentencia dia 1 di juli cu tabata na fabor di comision 11. Den e sentencia aki, hues a duna ordo pa e directiva di CAPA duna na comision 11 e registro di e miembronan di CAPA.
Pa nos por compronde ken CAPA ta, prome ta util pa nos sa di unda CAPA ta bin.
SEPPA ta un sindicato y un sindicato ta un organisacion forma pa trahadornan cu ta uni y usa nan forsa pa tin un bos den e luga di trabao. Via nan union, e empleadonan ta haya e habilidad di por negocia for di un posicion di peso cu e dunadonan di trabao varios cos manera salario, beneficionan, condicionnan laboral, training y otro topiconan relaciona cu trabao. E sindicatonan tambe tin un rol importante den garantisa cu e maneho lo actua di manera husto y trata tur su empleadonan cu respet. Un sindicato ta un organisacion democratico y su lidernan ta elegi pa e mesun miembronan. Den caso specifico di SEPPA, e punto aki ta uno cu recientemente ta causando preocupacion, pero nos lo trata e parti aki specificamente mas adelante.
Un sindicato ta util pa motibo cu e probabilidadnan di yega na logro ta hopi mas halto a causa di e forsa den su bos como representante di tur e empleadonan. Ora cu un sindicato organisa, e tin e forsa di logra un cambio real y hunto papia cu un solo bos cu no por ser ignora ni pa e dunadornan di empleo ni tampoco pa oficialnan den cualkier nivel.
Di aki ta unda CAPA ta bin, cual ta e centro di e caso en cuestion. CAPA ta un cooperativa di e miembronan di SEPPA.
Un cooperativa ta un asociacion cu ta propiedad di, maneha pa y controla pa su miembronan pa realisa nan aspiracionnan y necesidad economico, social y cultural comun. Un cooperativa por uni hende den un manera democratico y igual. Sea cu e miembronan ta e empleadonan, usuarionan of residentenan, e cooperativa ta maneha di un manera democratico. E miembronan ta comparti derecho di voto igual sin importa e cantidad di capital cu nan ta aporta na e empresa. CAPA tin mas di 1,500 miembro y cada miembro por spaar placa, ricibi un interes cu hopi biaha ta mas halto cu esun di banco priva, y ora ta den necesidad, e miembro por fia te hasta 25,000 florin cu un interes mas abao.
Pa motibo cu e forma aki di coopera ta un organisacion habri pa miembronan por coopera cu otro y unda ta maneha cosnan cu ta rekeri un grado halto di responsabilidad, e accesibilidad di tur e miembronan na informacion manera nomber, adres, telefon, entre otro, ta indispensable pa motibo cu esaki ta necesario pa ora di mester coopera of comunica cu otro. Pa motibo aki CAPA tin e articulo 30 den su statutonan, unda ta dicta cu e registro semper mester ta disponible pa e miembronan.
CAPA ta maneha alrededor di 7 miyon florin, cual ta haci esaki un cooperativa grandi y e funcion di tesorero uno principal. E tesorero di CAPA tin varios tempo ta nenga di duna cuenta na e miembronan di e cooperativa tocante un robo di 382,000 florin y pa e motibo aki Comision 11 a lanta un caso den su contra na corte, caso cual e comision a gana.
Un miembro di comision 11 a comparti algun informacion tocante e caso, tanto di su origen como tambe e resultado y su desaroyo despues di esaki.
Segun e informacion cu a comparti, e mesun persona cu ta tesorera di CAPA, tambe tin e funcion di secretario general di SEPPA. E caso a surgi ora cu den CAPA a horta 382,000 florin. Segun e miembro di comision 11, “nan a tuma un persona den servicio y e persona aki a orkestra henter e ladronicia.” Tin rumor ta circula cu ta alega cu e persona aki tin conexion personal na familiar di e persona cu ta tanto secretario general como tesorero di CAPA.
Manera nos a menciona, segun e statuut di CAPA ta obligatorio pa e miembronan tin acceso na e registro, cual den e caso aki a nenga di duna e miembronan acceso y pa motibo aki ta constitui un violacion. Hues tambe a ripiti esaki. Segun e miembro a conta, mientras a trata e caso den corte, e hues a declara cu no lo obliga e directiva yama un reunion general pa motibo cu esaki ta hancra den e statutonan caba “usando e registro di miembronan y articulo di statutonan nr. 21, lid 4.” A base di esaki, e miembronan por yega na un cantidad di firma unda por obliga e directiva yama un reunion general y aki na su turno por pidi cuenta tocante e robo di 382,000 florin. Den caso cu e directiva no haci esaki, e miembronan mes por yama e reunion y tur decision ta considera legal.
Cu tur esaki tuma den consideracion, ta mas cu cla cu pa medio di nenga e miembronan acceso na e registro, e directiva di CAPA no a aplica e statutonan y ta automaticamente constitui un violacion di esaki. “Pa tur miembro y sigur pa e lidernan, e aplicacion di un statuut ta algo sagrado y violacion ta un delito pisa, cual ta motibo den e caso aki pa raya e directiva di CAPA,” e miembro a declara.
Segun e miembro di comision 11 tocante esaki a comenta cu “e caso no tin nada di haci na Hoge Beroep pasobra hues a bisa caba ‘no, e ta poni den statuut bo mester respeta e statuut.’” Tin di nota, cu e consehero di e tesorero a manda un notificacion unda lo bay Hoge Beroep cu e caso aki. Straño ta cu segun e miembro di comision 11 a menciona, e abogado cu a defende CAPA den corte, no a actua mas. Esaki ta duna e impresion o ta laga asumi cu den e caso aki, e no ta di acuerdo cu e decision y posiblemente ta di e pensamento cu e caso aki su victoria pa comision 11 ta uno indiscutible.
Tumando e notificacion aki na cuenta, na final aunke Comision 11 a logra e victoria den corte, e caso lo mester sigui desaroya y lo mester sigui lucha pa comproba e violacion di statuut cu ta acusa den e caso y pa yega na e acceso na cual tin derecho.
E miembronan di Comision 11 lo reuni, y aki lo tuma decision tocante cua ta e proximo pasonan cu lo tuma
