Ayera hues a entrega su decision na Sr. Mike de Meza relaciona cu peticionnan cu de Meza a entrega na Corte den Prome Instancia algun dia prome. E peticion di e ex-minister, ken actualmente ta den nominacion pa bira minister den e gabinete nobo di AVP-FUTURO, ta pidi pa clarificacion tocante e tipo y e motibo di e acusacionnan cu Ministerio Publico (OM) tin contra dje. Ademas, de Meza a pidi OM pa tuma un decision si ta persiguie of no prome cu 15 di augustus 2025.

E caso aki ta bin despues di un trayecto largo den e proceso di screening ministerial di de Meza, cual a keda pa un tempo stanca debi cu, segun Departamento di Impuesto den april 2025, tabatin problemanan pendiente cu impuesto vincula na un compania di cual antes e [sr. De Meza] tabata propietario, cu, maske inactivo pa añas, ta parce di a laga asunto sin resolve. Esaki a resulta den un impasse den e nominacion di de Meza, cual te ainda no a mira resolucion. De Meza a pidi hues pa entrega un orden hudicial na director di DIMP pa saca un declaracion faborable tocante su comportamento fiscal. Manera a reporta e tempo ey, Hof a yega na e conclusion cu e no tin e competencia pa haci un decision tocante e apelacion cu a ser presenta. Esaki ta pasobra dilanti di Hof segun e Lar, apelacion por solamente ser presenta contra decisionnan den e sentido di e Landsverordening administratieve rechtspraak (Lar).

Segun Hof e cartanan di e director di DIMP contra cual de Meza a presenta e recurso y apelacion, no ta decisionnan cu por ser apela. Eseynan ta cartanan di caracter factual y informativo, y no ta dirigi na ningun efecto legal, ni tampoco ta dirigi na e efecto legal si de Meza por of no por bira minister.

Luna pasa a bira conoci cu DIMP a entrega un caso penal contra de Meza, tocante cual OM inicialmente no a duna clarificacion na Sr. De Meza. Pa e motibo aki, de Meza a entrega peticion na corte entamando OM. Segun de Meza, den su mesun declaracion, el a tende di formador cu OM a mark’e como sospechoso den e caso entrega pa DIMP. El a pidi hues pa duna ordo na e instancia pa clarifica e tipo y motibo di e sospecho contra dje. Den un decision emiti dia 25 di juni, hues a afirma su opinion cu ciudadanonan cu ta marca como sospechoso tin derecho pa sa pakico nan ta sospechoso y ki tipo di investigacion ta tumando luga contra nan. sinembargo, esaki ta solamente si e persona envolvi ser oficialmente deteni, interoga of invita pa interogacion. Den e caso di de Meza, esaki no a sucede. Hues a splica e tempo ey cu OM no a emiti un declaracion oficial den cual a marca de Meza como sospechoso, pues nan no ta obliga ainda di duna e tipo y motibo di e sospecho contra dje.

Na otro banda, hues a reconoce e naturalesa precario di e caso aki, unda por papia di circunstancianan excepcional y peso—ya cu de Meza ta nomina como minister—cual lo por exigi pa acelera e clarificacion. Pues hues a dicidi cu OM tin dos siman tempo pa duna un clarificacion na Sr. de Meza si e ta sospechoso den un investigacion y e articulo den ley pa cual e ta sospechoso.

Pero ta parce cu e decision aki no tabata satisfactorio pa e nominado di partido AVP, ken algun dia pasa a entrega un otro caso den cual, basa riba articulo 43 di Codigo di Procedemento Penal, a pidi hues pa obliga OM pa clarifica atrobe e tipo y motibo di e acusacionnan contra dje. Tambe a pidi hues pa obliga OM di duna un contesta prome cu 15 di augustus si ta persiguie of no.

Ayera hues a entrega su ultimo decision, rechasando de Meza su peticion. Hues a splica cu OM a cumpli cu e decision di Corte di 25 di juni 2025, door di informa Mike de Meza riba e mesun dia ey cu e ta sospechoso den un investigacion cu tin andando y a pon’e na haltura di e articulo den ley riba cual e sospecho contra dje ta basa. Tambe hues a rechasa e peticion pa OM duna contesta prome cu 15 di augustus tocante un posible persecucion. Segun hues, e peticion aki ta di considera prematuro.

Te na ciere di e edicion aki, no tabatin ningun reaccion publico di parti de Meza su equipo legal.

Mientras tanto cu de Meza ta den batayanan legal, gobierno recien a nombra Sr. Gervais “Baba” Rene Herdé como minister temporal cu lo tuma cartera di Infrastructura, Energia y Telecomunicacion—originalmente reserva pa de Meza. Prome cu e nombramento di Herdé, dr. mr. Arthur Dowers tabata encarga cu e carteranan aki.

Defensornan di De Meza ta insisti riba su añanan di servicio publico y sacrificio personal – cerando su negoshi pa sirbi den gobierno. E servicio ey ta merece reconocemento. Sinembargo, e daño ta bay mas leu cu e caso personal di De Meza. E proceso alarga di e screening, y awor un posible persecucion penal contra e ex-minister ta conduci na speculacion cu ta mina confiansa no solo den instancianan publico manera DIMP, sino den gobierno y integridad institucional. Despues di e asunto controversial entre DIMP y de Meza, comparacionnan engañoso a bolbe riba rednan social, implicando figuranan no relaciona – manera Gobernador di Aruba – den controversianan sin base. Mas e incertidumbre ta dura den e casonan aki, mas erosion den confiansa di publico.

E hecho cu e nombramento di Herdé a ser subraya como un posicion temporal, ta sugeri cu gobierno lo mantene porta habri pa de Meza bira minister, no importa kico e resultado di e casonan por ta.