Ayera, Kustwacht a reuni hunto cu famia di e cuatro piscado cu a perde riba lama for di diasabra 12 di juli. Riba su pagina di Facebook, Kustwacht a informa cu awo a pasa e caso over na Wardacosta Colombiano, mirando cu e area di e buskeda a drenta completamente den nan area di responsabilidad.
For di diadomingo marduga a inicia un buskeda pa e barco Energy, cu cuatro piscador abordo. Mesora a manda helicopter, avion y un unidad di Metal Shark pa busca nort west nort di Aruba. E avion tambe a contribui na e buskeda for di cuminsamento. Segun cu dianan a pasa, e area di buskeda a sigui crece y na un dado momento a bay nort den awanan di Colombia, segun Kustwacht a informa riba rednan social. Cu permiso di gobierno Colombiano, a busca cu e Dash-8 di Wardacosta den nan region. E ultimo dos dia, barco di Marina Real Hulandes, Zr.Ms. Friesland y su helicopter hunto cu un avion priva for di Aruba, tambe a uni na e buskeda den parti nort di Colombia su awanan.
Wardacosta di Venezuela tambe a busca den nan awanan teritorial (Isla nan Monjes) cu unidad nan maritimo y aereo.
Segun Kustwacht, wardacosta di Caribe Hulandes a pasa e caso over na Wardacosta Colombiano, mirando cu e area di buskeda a drenta completamente den nan area di responsabilidad. Wardacosta lo sigui tira un bista skerpi durante di nan patruya nan.
Den un conferencia di prensa ayera tardi, prome minister Mike Eman a bisa cu ayera tabatin un reunion virtual hunto cu e operacion di wardacosta y Forsa Arma di Colombia. El a gradici Consul di Colombia pa e colaboracion den coordina e contacto aki. Eman a confirma cu ayera a pasa parti di e responsabilidad di e buskeda oficialmente pa Colombia.
Ademas di e esfuersonan grandi cu wardacosta di Aruba a haci caba den e buskeda, Eman a enfatisa cu for di momento cu a notifica nan, autoridadnan Colombiano tambe a haci esfuersonan grandi. Y awo nan tin plan pa e siguiente dianan di buskeda. Segun Eman, “tin buskeda riba lama, barconan cu ta presente den e area caminda cu posiblemente e lancha Energy por ta, y nan tin tambe prepara pa mañan intensifica esfuersonan pa locual ta trata e vigilancia y tambe e buskeda via di avion.”
El a confirma tambe cu tin un avion priva involucra den e buskeda.
Wardacosta di Reino Hulandes tambe a haci un gran esfuerso tanto na Aruba como na Corsou, segun Eman, nan tabata den contacto continuo, y e hefe di operacion di e steunpunt di coordinacion di Corsou, Sr. Wim Talma, a bin Aruba.
Entre otro colaboracion cu partnernan internacional, Eman a menciona cu a tuma contacto cu consulado Mericano na Corsou, cu tin hopi actividad den Lama Caribe y hopi avion ta bula, y a haci un peticion special pa duna atencion na e buskeda. Cu e mesun meta a manda un carta na embahador di Reino Hulandes na Panama, mirando cu historia a demostra cu hopi biaha e coriente por hiba barco cu ta drif den direccion di Panama. A pidi e pais pa keda pendiente pa e posibilidad cu e barco desaparecido lo por a yega den cercania di Panama.
Consul di Colombia, Gustavo Serrano Amaya, a bisa cu for di prome momento cu premier Eman a inform’e di e suceso, el a tuma contacto cu Armada di Colombia, particularmente cu Centro di Operacion di Cartagena y Bogota, pa por yuda den coordinacion di buskeda. Ayera tambe tabatin un reunion virtual cu e Centro di Operacion y otro comandante di Armada Nacional Colombiano. Actualmente ta haciendo tur gestion necesario pa continua den e buskeda, y awe e buskeda aereo ta continua cubriendo un area mas grandi.
Autoridadnan Colombiano y di Aruba, como tambe henter comunidad, ta keda cu speransa pa un resultado positivo y cu por haya e piscadornan sano y salvo.
