Diasabra 12 di juli a tuma nota di e desaparicion di un yate, yama “Energy”, cu a perde riba lama. Durante e dianan cu a sigui e buskeda di Wardacosta di Aruba y partnernan internacional a continua, y minister di Husticia mr. drs. Arthur Dowers a duna un declaracion na prensa unda a sigura e comunidad cu tabata haciendo tur esfuerso posible pa yega na e piscadonan.
E tempo aki gobierno a publica un comunicado unda a informa cu Kustwatch tabata haciendo tur su esfuerso y a haci uso di modelonan computarisa maritimo manera coriente di lama, direccion y forsa di biento pa haci calculacion di mas o menos den cual area e boto por tabata, sinembargo e esfuersonan aki tabata en vano. Mientrastanto, no por a descarta cu e yate a sali for di e awanan teritorial di Aruba, pa cual a tuma contacto cu autoridadnan Colombiano pa brinda sosten den e buskeda. Minister Dowers a informa den e tempo aki cu Setar a te hasta “ping” e ultimo lugar na unda a haya señal di celular prome cu a perde contacto y a logra determina tambe e area den cual e buskeda a cuminsa.
Premier Mike Eman tambe a duna un actualisacion na prensa local tocante e caso for di Mariniers Kazerne, unda el a bisa cu a tene un reunion “basta largo” cu tanto miembronan di Kustwacht y famia di e desaparecidonan, unda Kustwacht a duna un resumen di tur e investigacion cu tabata andando. Segun Eman a declara, tur e aparatonan di Kustwacht tabata bao uso, a haci buskeda pa varios ora cu avion y helicopter entre otro. El a expresa durante e encuentro aki tambe cu por a sinti cu Kustwacht tabata haciendo tur loke por haci pa localisa e cuatro Arubiano desaparecido lo mas pronto posible y a expresa speransa di tin un resultado positivo cu e tripulantenan na bida.
Hefe Kustwacht, Capitan Mark Solognier, a bisa tambe cu tabata buscando den un area “basta leu” cu e avion. “Nos no ta give up. Nos ta sigui busca te unda cu por,” e capitan a declara. El a agrega tambe cu tabatin “un bon contacto cu Venezuela y Colombia tambe” den e parti di Search and Rescue. Ademas, el a splica cu “ta proyecta a base di un programa cu nos tin” den ki area mester busca e barco, y pa esaki, a haci uso di avion y barco di Kustwacht.
E buskeda a sigui y te hasta expande internacionalmente pero lamentablemente esaki no a duna resultado. Premier Eman a duna un di dos actualisacion, unda el a informa cu el a ricibi “un briefing completo” for di miembronan di Kustwacht. “Un trabao hopi grandi ta ser haci durante e di prome dia caba, diadomingo cu a inicia cu e busekda. Pero awe por bisa cu e ta un di e buskedanan mas grandi – por ta den historia – cu a wordo haci, y ta wordo haci na e momentonan aki.”
Den e actualisacion aki Eman a informa cu e avion di Kustwacht tabata bulando riba un area hopi grandi na costa di Colombia, e fregat di Hulanda cu tabata na direccion di Haiti a ser hiba e costa di Colombia y tabata participando di manera activo den e buskeda. El a informa cu tabatin contacto tambe cu Kustwacht tocante e siguiente stapnan, unda Colombia lo hunga un rol “hopi mas intensivo” den caso cu e buskeda no duna resultado. El a haci mencion tambe di diferente momento unda “tabatin indicacionnan – tabatin un salbabida cu tin un potret di dje cu mi por a mira tambe; famianan a wak e potret, y no ta pensa cu ta di e boto,” sinembargo di tur manera a purba hay’e pa descarta absolutamente cu e ta relaciona cu e boto desaparecido.
Un noticia cu a hala hopi atencion na Aruba tabata di canal 10 di Nicaragua, unda a reporta cu un barco “tipo panga cu cuatro tripulante a naufraga diamars ultimo” den Caribe Sur. E nabegantenan a keda rescata pa otro barco y transporta pa tera firme. Soldadnan di Distrito Naval Caribe a recupera e barco pero a perde e motor. Segun e noticiero, a nota cu e identidad di e tripulantenan y nan destino na e momento di e naufragio no tabata conoci, cual a lanta speransa den comunidad local cu por a trata di e piscadornan di Aruba.
Tension cu Venezuela
Di mesun manera, inkietud a keda crece cu capitan Hulandes, Pim de Rhoodes y su tripulacion cu tin dianan desapareci despues di un incidente cu navy di Venezuela. E capitan a nabega riba un barco, cu su familiarnan ta bisa tabata involucra den un buskeda di un tesoro, sinembargo a perde completamente despues di a keda intercepta pa autoridadnan Venezolano. De Rhoodes su barco a keda intercepta pa patruyahe Naval di Venezuela, segun reportahenan di De Telegraaf. E causa pa e intercepcion aki no ta cla y desde e tempo aki, no a ricibi ningun señal di e barco ni tampoco di esnan abordo. Ministerio di Exterior Hulandes a bisa cu e ta den contacto cercano cu e autoridadnan Venezolano, sinembargo informacion ta keda escaso. Tampoco tin hopi informacion via canalnan consular ni tampoco den organisacionnan internacional.
Y weekend ultimo, Ministerio di Exterior a cambia e conseho di biahe pa Venezuela na nivel cora, cu ta conseha pa no biaha pa ningun motibo. Esaki a trece preocupacion di kico precies por ta e situacion di Reino Hulandes cu Venezuela.
Despues di e desaparicion di e piscadornan local, cu a tuma luga na Aruba riba dia 12 di juli, e buskeda tabata uno constante, amplio y profundo cu uso di tur herment na nos disposicion. Segun e dianan a pasa e area di buskeda a sigui crece y na dado momento a bay nort den awanan di Colombia. Cu permiso di autoridad Colombiano, a busca cu Dash-8 di Wardacosta den nan region.
Den un conferencia di prensa, prome minister Mike Eman a bisa cu a tene un reunion virtual cu operacion di wardacosta y Forsa Arma di Colombia. Aki Eman a confirma cu e buskeda a pasa den man oficial di Colombia. Entre e otro colaborcionnan internacional a tuma contacto cu e consulado Mericano na Corsou, cual tin hopi actividad den Lama Caribe y a haci peticion pa duna atencion na e buskeda y tambe a pidi Panama pa keda pendiente pa e posibilidad cu e barco desaparecido lo por a yega su cercania.
Segun e ultimo actualisacion cu a duna, ta haciendo tur gestion necesario pa sigui den e buskeda, y e buskeda aereo lo sigui cubri un area mas grandi.
Henter comunidad y autoridadanan di tanto Colombia como Aruba ta mantene e speransa cu lo yega na un resultado positivo y cu e piscadonan lo bolbe cas cu bida y salud.
