Entrante 1 di juni 2025, Banco Central di Aruba (CBA) a mantene e tasa di reserva obligatorio pa banconan comercial na 12,5%. E decision aki riba maneho monetario ta mantene e balansanan minimo cu banconan comercial local mester tene na CBA.
Puntonan principal:
Incertidumbre global eleva
Incertidumbre y falta di claridad riba e politica comercial di Merca, como tambe e riesgo eleva di comercio internacional, tin e potencial pa directamente y indirectamente afecta e economia di Aruba. Sinembargo, e materialisacion specifico di e repercusionnan economico pa Aruba ta depende di varios factor, considerando e evolucion instabil y continuo di e accionnan di e politica comercial aki y consecuentemente di e desaroyonan global.
Reservanan adecua a pesar di crecemento den credito
Te cu maart 2025, reservanan a surpasa substancialmente e metriconan di reserva cu CBA ta monitor, a pesar di un aumento den credito. Considerando e buffer amplio di reserva, CBA ta anticipa cu reservanan oficial y internacional lo keda suficiente adecua durante 2025.
Likides excesivo
Den 2024 y te cu medio April 2025, crecemento den likides excesivo (LE) di banconan comercial a surpasa expansion total di credito, cu expectativa di un aumento di LE den termino medio.
Inflacion abao
Na maart 2025, e tasa di inflacion midi den e ultimo 12 lunanan compara cu e 12 lunanan prome a permanece na 1,4%, combina cu e tasa di inflacion midi na final di luna contra e mesun luna di e aña anterior na 0,1%.
CBA ta sigui monitor indicadornan monetario y economico di cerca y lo ahusta su posicion di maneho monetario manera necesario pa sostene e tasa fiho di e florin na e dollar Mericano.
