Recientemente, Colegio di Supervision Financiero (CAft) a duna su conseho tocante e modificacion di proyecto presupuestario 2026 (OB) di Aruba. Den esaki, CAft ta señala cu si no cambia maneho, e sostenibilidad di e surplus por bin bao presion, tambe considerando e gastonan cu ta aumenta den e periodo 2023-2026.

Segun e carta di CAft, dirigi na minister di Finanzas, Geoffrey Wever (Futuro), presidente di CAft, Lidwijde Ongering ta bisa: “Pa e sector colectivo, Aruba ta presupuesta un surplus di Afl. 159 miyon na 2026, es decir: 2,1 porciento di e producto nacional bruto (GDP). Den e periodo 2027-2030 tambe ta presupuesta un surplus anual di mas cu un porciento di e GDP. Di e manera aki e OB ta cumpli cu e norma presupuestario pa e saldo di financiamento di e sector colectivo conforme e LAft, y cu e compensacion di deficit prescribi.”

Banda di esey, CAft ta mustra riba riesgonan, entre otro e incertidumbre den marco di desaroyo di interes. Den e contexto aki, CAft ta haya importante pa hiba un maneho presupuestario vigilante y prudente, cu control di gasto como un punto esencial.

Pa loke ta trata e inversionnan proyecta, CAft ta conseha pa ofrece claridad tocante e status y funcionamento di e fondo di inversion. Ademas ta conseha pa elabora un agenda di inversion multianual cu ta cuadra cu e prioridadnan di maneho y coordina cu e capacidad di implementacion di pais.

CAft ta conseha gobierno pa haci e siguiente modificacionnan na e OB, prome cu ta ofrece esaki na Parlamento:

1. Den e OB, modifica e gastonan pa e añanan 2027-2030, pa aumenta e grado di realidad di e presupuesto multianual, of splica cu mas detaye cu cual medidanan ta controla e gastonan te cu 2030.

2. Den e OB, presenta a desaroyo multianual di henter e sector colectivo. Den e marco ey ta importante pa determina e sector colectivo pa 2025 mas pronto posible.

3. Yega na conclusion di e trayecto pa por emplea e surplusnan di Algemene Ziektekostenverzekering (AZV) y Sociale Verzekeringsbank (SVb) pa reduccion di debe. Empleando e surplusnan aki, teniendo na cuenta e obligacion legal pa tene un reserva, por reduci e necesidad di financiamento pa 2026.

4. Den e OB, presenta claramente e rasonamento pa establece un fondo di inversion, y splica di ki manera ta garantisa maneho, hustificacion y gobernacion. 5. Banda di esey, yega na un agenda di inversion multianual, coordina cu e prioridadnan di maneho y e capacidad di implementacion di pais.

Calculacion multianual deficiente

CAft ta constata cu introduciendo e OB ta duna un prome paso pa yega na policy-based budgeting. A pesar cu e elaboracion ainda ta rekeri substanciacion, ta positivo cu di e manera aki ta mustra un vinculo mas cla entre e empleo di recursonan y e maneho cu ta hiba.

Desde 2023, e gastonan a aumenta cu aproximadamente Afl. 250 miyon. E aumento aki ta principalmente debi na intensificacion di maneho, incluyendo e indexacion di salario di ambtenaarnan y personal di enseñanza, y e aumento di e suplemento di reparacion pa pensionadonan. Banda di esaki, e gastonan di interes a aumenta cu casi Afl. 30 miyon, principalmente como consecuencia di e refinanciamento di e prestamonan pa sosten di likides cu a caduca na 2023.

CAft ta constata cu – si e tendencia actual di aumento di gasto continua den e periodo 2027-2030 – si no ta cambia maneho, ta bay crea deficit. E deficitnan aki no ta visible den e presupuesto multianual, pasobra ta supone cu hopi di e categorianan di gasto lo keda nominalmente mescos. No ta splica den e OB ki medidanan concreto ta tuma pa structuralmente controla e gastonan aki. P’esey, e grado di realidad di e calculacion multianual aki ta deficiente.

Duda riba calculo di gasto di personal

Desde 2027, e gastonan di personal mester keda bao di e limite di 10 porciento di e GDP. Pa prome biaha a inclui un calculacion multianual di e gastonan di personal den sentido amplio, conforme e definicion inclui den e LAft.

E calculacion ta mustra cu te cu 2029, e gastonan di personal ta keda bao di e limite prescribi.

Sinembargo, CAft tin duda tocante di e grado di realidad di e calculacion multianual aki. Den e OB ta supone cu e gastonan di personal di e pais lo keda nominalmente constante den e periodo 2027-2030. Sin embargo, e splicacion no ta mustra cu tin maneho concreto ta forma e base pa esaki, manera medidanan dirigi riba moderacion di salario of e uso di limite di personal. P’esey, no ta cla te na ki grado ta trata di maneho activo dirigi riba control di e categoria di gastonan aki.

Interes: un presion considerable

E gastonan di interes ta sigui pone un presion considerable riba finanzas gubernamental di Aruba.

Na 2026, aproximadamente 16 cen di cada florin cu ta drenta ta ser gasta na obligacionnan di interes. Segun e calculacion multianual, te cu 2030 e parti aki lo keda pa mayor parti riba e mesun nivel. Esaki ta limita e flexibilidad presupuestario di Aruba.

E desaroyo di e gastonan di interes ademas ta depende di varios factor, entre otro e desaroyonan di interes riba e mercadonan di capital (inter)nacional – principalmente na Merca – y e solvencia di Aruba. Banda di esaki, e formalisacion di e Ley di Reino Finanzas Gubernamental Sostenible por contribui na un alivio di e gastonan di interes.

Duna reparatietoeslag na tur pensionado no ta cuadra cu ley

Desde 2023, e partida di traspaso a aumenta cu Afl. 110 miyon. E aumento aki ta principalmente debi na e aumento di e reparatietoeslag. Entrante prome di mei 2025, a aumenta e suplemento aki cu Afl. 250 pa luna. Den e OB a inclui un aumento adicional entrante prome di januari 2026. A pesar cu no ta duna mas splicacion tocante di e mutacion aki, e montante presupuesta ta conduci na e hecho cu CAft ta anticipa cu lo sigui aumenta e reparatietoeslag cu aproximadamente Afl. 200 pa luna.

Den e practica actual ta otorga e reparatietoeslag na tur pensionado, irespecto di nan entrada. Esaki no ta cuadra cu e stipulacionnan di e Ordenanza Nacional Suplemento di Reparacion.3 Considerando e desvio aki di e stipulacion legal y e impacto presupuestario di e medida aki, CAft ta haya importante cu lo aplica un comprobacion di ingreso. Esaki ta fomenta e eficacia di e medida y ta contribui na e control di e consecuencianan presupuestario.

Desaroyo positivo den tasa di debe

Conforme e OB, e debe di pais na final di 2026 lo ta Afl. 5.113 miyon, esta 67 porciento di e bbp. Conforme e puntonan di salida di e OB respecto di crecemento economico y e amortisacion anual di e debe nominal, e debe aki lo baha te 50 porciento di e bbp na 2030. Esaki ta significa cu e OB ta mustra un desaroyo positivo di e tasa di debe. Sin embargo, e desaroyo aki solamente tin di haci cu e debe di e pais, no cu esun di henter e sector colectivo. Ademas, den e marco aki tampoco no ta cla ki dia lo determina e sector colectivo pa 2025, y di ki manera lo compone e sector colectivo.

Usa surplus di AZV y SVb pa paga debe

Ordenanza Nacional di supervision financiero temporal di Aruba (Landsverordening Aruba financieel toezicht – Laft) ta prescribi cu henter e surplus presupuesta di e sector colectivo mester keda emplea pa reduccion di debe. Na 2026, Aruba lo mester amortisa Afl. 648 miyon. Den e OB, solamente ta destina e surplus presupuesta di Afl. 74 miyon pa reduccion di debe. E sobra di e prestamonan di e pais cu ta caduca, aproximadamente Afl. 574 miyon, lo refinancia conforme e OB (necesidad di financiamento). CAft ta conseha pa formalisa e palabracionnan cu AZV y SVb mas pronto posible pa por emplea e surplusnan cerca e entidadnan aki tambe pa reduccion di debe, teniendo na cuenta, obviamente, e rekisitonan legal tocante di tenemento di reservanan den e fondonan social.

Recientemente, boso a pidi CAft pa expresa su punto di bista tocante di e topico aki. CAft ta dispuesto pa duna gobierno conseho mas detaya den e marco aki. Si Aruba por emplea mas recurso pa reduccion di debe, e pais tin menos necesidad di fia y por baha e presion presupuestario di e gastonan di interes (cu actualmente ta 16 porciento di e presupuesto). CAft a duna e conseho aki ya caba tocante di e presupuestonan pa 2024 y 2025.

Falta di claridad den inversion

Pa 2026, Aruba ta presupuesta un nivel di inversion di Afl. 50 miyon. Por lo pronto, no ta cla di ki manera lo duna forma concreto na esaki. Den e OB ta papia di un revision di e proceso di inversion di capital y e lantamento di un fondo di inversion. E status y e rasonamento pa e lantamento di un fondo di inversion no ta cla pa CAft. CAft ta mustra riba e importancia di un agenda di inversionnan multianual integral y realistico, den cual ta coordina e inversionnan proyecta cu e prioridadnan di maneho y e capacidad di implementacion di pais. P’esey, CAft ta considera necesario pa presenta e agenda di inversion multianual priminti mas pronto posible.