Cu tur e suceso cu a tuma luga recientemente, entre otro e perdida di piscadornan Arubiano na lama, Bon Dia Aruba a acerca Directie Scheepvaart Aruba pa papia un poco entre otro tocante seguridad di botonan riba lama, e proceso di keur y recomendacionnan cu ta duna. Tur esaki ta importante pa nos por keda consciente tocante e pasonan cu nos por tuma pa nos seguridad ora di nabega den lama habri. Den e articulo aki, nos lo papia tocante ken DSA ta y kico realmente su trabao ta den nos comunidad, ademas di e con e proceso di keur boto ta sinta den otro.

Directie Scheepvaart Aruba (DSA) ta e autoridad maritimo oficial di Aruba y ta e autoridad designa pa seguridad maritimo y regulacion di esaki riba nos isla. Entre nan responsabilidadnan clave tin regulacion y certificacion, unda ta supervisa licencianan, inspeccion y tambe cumplimento di e barconan registra y cu ta opera den awanan di Aruba. Bon Dia Aruba a reuni cu algun representante, unda entre otro tabatin inspectornan presente cu a brinda informacion amplio tocante seguridad.

Manera a menciona, un di e trabaonan importante di DSA ta otorga vaarvergunning, permiso di nabegacion, y tambe keuring di e botonan. Pa cu esaki, tin dos categoria di vergunning cu por busca, es ta un vaarvergunning personal y un vaarvergunning comercial. Sr. Donata di DSA a splica cu “entre e vergunning cu por ricibi, e rekisitonan pa vergunning comercial ta mas pisa cu local. Bo rekisitonan di seguridad ta hopi mas severo.”

El a splica cu ta “depende tambe ki tipo di boto y cuanto hende ta bay abordo. Tin cosnan cu mester cumpli cune y si bo tin un boto cu por ehempel ta nabega cu mas di 12 pasahero bo ta cay den un ley SCV-Code.” Esaki ta un codigo internacional y ta para pa Code of Safety for small Commercial Vessels, cual ta un standard desaroya specificamente pa e region di Caribe, incluyendo Aruba. E ta stipula e rekisitonan operacional y tecnico pa barconan chikito comercial pa garantisa cu nan ta safe pa tripulante, pasahero y medio ambiente.

Sr. Donata a sigui splica cu “a base di e regimen aki, cada 6 luna e boto mester controla na Directie Scheepvaart. E ta uitzonderlijk (inusual). Hopi biaha bo ta tende cu un auto ta controla cada 2 aña pero mirando cu boto ta mas gevoelig (delicado), e ley a keda riba 6 luna.” Esaki ta nifica cu ta obligatorio, sea cu a nabega of no, pa e inspecteur bay y haci e keuring riba e boto cu e rekisitonan streng pa boto comercial. Tambe ta importante pa nota cu cada vergunning ta bini cu e areanan den cual por nabega cu e tipo di vergunning cu a ricibi, pues no ta tur caminda na Aruba ta apto of adecua pa tur tipo di boto.

Un di e inspectornan cu tambe tabata presente, a comparti cu algun di e cosnan mas importante ora di keur un boto ta entre otro e navegation lights, salbabida, radio, flares, y a conta cu hopi biaha ta topa cu personanan cu no ta duna e rekisitonan aki hopi importancia pa motibo cu nan ‘no ta bay leeuw.’ “Di otro banda, loke nos ta constata hopi tambe ta cu tin hende ta bisa den nos cara ‘ami ta cumpra esaki djis pa ora di keur pero mi no ta sali cune toch’ y tin tur cos pero nan ta bisabo flat cu nan no ta sali cune den nan boto,” e inspector a agrega.

Sr. Donata a splica cu e trabao di DSA ta pa guia, “nos trabao ta pa guia hende y hopi biaha bo ta haya contesta asina anto nos no ta subi lama, esaki ta un directie y su trabao ta traha ley, traha maneho pero nos tin un afdeling di inspectie cu ta controla pa e boto ta bon.”

DSA a comparti tambe cu actualmente tin un ley na caminda, “e ley aki ta yama Vaartuig Verordering y ta wordo herzie na e momento kinan. E ta un topico hopi importante pa nos tambe intern y esey lo tin di haber cu algun gebied unda e boto mag di ta aden. Kiermen mas leu bo bay, mas rekisito ta bin acerca y ta bira mas streng. E ley ey ta na caminda, e ta den preparacion y ta un verordering cu ta un ley grandi pero e ta na caminda. Comercieel nos ta hopi streng cune, e ta wordo mira conforme regla y nos inspecteurnan ta haci nan trabao.”