Den e ultimo dianan, e comunidad di Aruba a mira varios noticia den cual a trece dilanti preocupacionnan di comunidad pa desaroyonan—of falta di desaroyo—riba nos isla cu sea ta ser considera destructivo of no beneficioso pa comunidad. Entre otro, tabatin e situacion di cobamento den calichi na Mangel Halto pa instala palapanan nobo. Un otro situacion tabata e duda continuo cu ciudadanonan tin pa e proyecto di revitalisacion na San Nicolas, unda a mira varios voz den comunidad expresa nan frustracion, preocupacion y cansancio cu e mesun falta di reconocemento y atencion adecua for di gobierno. Bon Dia Aruba a sinta cu un otro voz di San Nicolas, esta Sra. Marietje Curiel, pa papia tocante e firmanan cu el a colecta pa impulsa accion den direccion di derecho igual na San Nicolas.
Sra. Curiel ta un Rubiano cu a crece na San Nicolas, y pues ta wanta e ciudad cerca di su curason. Ta pa e motibo aki cu awo e ta entregando un carta y coleccion di firma cerca e presidente di Parlamento Marlon Sneek, cu cual e ta spera di por hala atencion di gobierno pa San Nicolas y trece cambionan substancial. Marietje a siña di chikito pa balora di unda e ta bin. Aunke el a señala cu algun hende ta muda di San Nicolas pa otro parti di e isla, nan sa lubida di unda nan a bin. “Mi mama semper a bisa mi: ‘Dont ever damage the bridge you walk on’. No importa unda bo ta biba, nunca lubida cu ta di San Nicolas bo ta.”
Ta su amor pa su ciudad a motiv’e pa tuma accion, no importa con chikito e por ta. Marietje ta haci trabao boluntario, yudando adultonan mayor na San Nicolas cu cualkier yudansa nan mester, sea ta limpia cas, cambia cortina of hasta sali bay pafo pa tuma aire fresco.
Marietje su activismo ta inspira pa figuranan conoci mundialmente cu a trece conscientisacion of cambio den nan mesun pais, manera Anne Frank, Nelson Mandela y Martin Luther King. Manera King, Marietje ta kere den activismo pacifico, pero si activismo cu ta fuerte suficiente pa mira cambionan di berdad. Segun Curiel, no mester trece cambio di manera violento of agresivo, pero mester haci algo si. P’esey e ta contento pa mira algun figura riba nos isla cu ta tumando accion concreto, manera e activista ambiental conoci Nigel Maduro. Aunke ta parce cu Maduro ta un figura polarisante riba red social, Marietje ta di opinion cu loke e ta haci ta miho cu keda sinta man crusa:“Tur hende ta hacie den nan manera.”
Di Marietje su parti, su activismo ta enfoca riba San Nicolas specificamente, y awor lo resalta riba nivel gubernamental cu un carta cu lo ser entrega na porta di parlamento y Hulanda.
Marietje su coleccion di firma ta bay cu un carta pa e partidonan menciona pidiendo pa un accion concreto pa atende e abandono di San Nicolas. Segun e ta splica, e carta aki ta trece un peticion dilanti pa gobierno duna atencion genuino na e ciudad. Ademas, su peticion ta trece dilanti dos sugerencia pa mehora e situacion na San Nicolas:
E prome sugerencia ta pa instala un loket lo mas pronto posible pa atende cu discriminacion na San Nicolas. E meta di e “anti-descriminatiebureau” aki ta pa registra kehonan di discriminacion di ciudadanonan y manda e kehonan aki no solamente pa gobierno, pero tambe pa Hulanda, pa asina por sigura cu e kehonan aki no ta ser descarta.
E otro sugerencia ta encera un wet gelijksheidbeginsel, un ley cu lo sigura cu tur hende lo ser trata igual. Ta spera cu un ley asina por pone mas presion riba gobierno pa no solamente duna atencion y finanzas na e areanan di hotel y pabao di brug, pero tambe pa pariba di brug, specialmente den barionan.
Marietje tambe ta boga pa tin un institucion cu ta traha independientemente, y cu esaki mester ta encarga pa hende cu tin e interes genuino di San Nicolas como prioridad. “San Nicolas mester un persona cu alma den curason. Un persona pa lucha pa San Nicolas.”
Marietje ta conta cu aunke e ta mira e mehoracionnan recien como un bon stap, tin otro areanan den San Nicolas cu mester mas atencion—no solamente e partinan turistico of economico. Marietje ta splica cu den San Nicolas tin varios bario cu ta sufri di pobresa, entre otro Village, Zeewijk, parti di Lago Heights, Rooi Hundo y mas. E ta enfatisa cu den e barionan aki, specialmente e hobennan ta keda atrasa y no ta haya oportunidad amplio pa desaroya nan talento. Por ehempel, Marietje ta subraya cu San Nicolas tin hopi deportista talentoso, pero no tin facilidad adecua pa nan por alimenta esaki. Hopi hoben ta haya nan mes ta bay te Santa Cruz of otro partinan leu pa por entrena.
Recien, Bon Dia Aruba a reporta tocante varios facilidad di deporte riba nos isla cu ta kedando atras. A menciona entre otro e veld di tennis na Sero Colorado cu ta den un estado di deterioro. Marietje tambe a agrega cu entre otro, e Xander Bogaerts veld tambe ta den mal estado y no ta haya mantencion debido.
Otro caracteristicanan di San Nicolas tambe ta ser ignora. Manera e activista ta splica, San Nicolas no ta solamente un centro di arte, pero banda di deporte, e ciudad tambe ta hospeda e mundo culinario autentico di San Nicolas, manera cumindanan di islanan Caribe. Sinembargo, ta parce cu gobierno no tin mucho interes pa fortalece esakinan den e ciudad.
Na otro banda, mentalidad di ciudadanonan tambe ta hunga un rol. A pesar cu ta mirando un aumento den conscientisacion y hende cu ta usando nan voz pa trece problemanan grandi den luz publico, ainda ta falta e tumamento di accion concreto. Segun Marietje, algun hende ta contento pa keda cu nan man crusa y tuma locual gobierno tin pa ofrece sin cuestiona, pero esaki lo keda na costo di nan mesun bienestar. P’esey Marietje ta enfatisa cu mester tin un cambio den mentalidad, pa no keda keto y djis acepta mal maneho, pero pa tambe tuma accion.
Marietje su carta pa parlamento ta marca un otro caso di un persona tumando accion, cual ta algo cu nos ta mirando ta bira mas comun riba nos isla. Asina mes e activista ta bisa cu ainda tin trabao pa haci, ambos for di e banda di gobierno como tambe ciudadanonan. Marietje ta boga pa cambia e mentalidad pasivo cu ainda ta reina y no solamente trece keho dilanti, pero tambe actua riba dje di un manera pacifico. Manera Martin Luther King mes a bisa: “Darkness cannot drive out darkness, only light can do that.”
