Hende muher Colombiano ta informa di a ser gaña y forsa pa drenta prostitucion na Albania

(Infobae) – Varios hende muher Colombiano a biaha pa Albania cu e promesa di traha como bailarina den clubnan nocturno, pero na yegada nan a ser forsa pa drenta prostitucion.

Ademas di a ser deteni y kita nan pasport door di polis, e storia di Stefanía, un di e victimanan, a bira conosi, reflehando e situacion cu centenares di hende muher rond mundo ta enfrenta, atrapa pa rednan di traficacion cu ta priminti mihor condicion y ta caba ta impone explotacion sexual.

“Nos ta Colombiano. Nos a bin aki gaña pa hendenan cu a trece nos aki, pasobra nos a bin cu e intencion di baila. Ora nos a yega aki, nos tabatin debe y a ser bisa cu nos mester paga nan door di keda aki y traha como prostituta. Nos a bay di acuerdo pa haci esaki, paga e debe, y despues bay. Ora cu nos tabata cerca di bolbe na aeropuerto, nos a ser deteni,” un Colombiano a bisa.

Autoridad Albanes ta pretende di a detecta un plan nobo di explotacion den cual hende muher stranhero, particularmente hende muher Latino Americano, ta yega e pais pa dos pa cuater luna y despues ta ser reemplasa pa otronan den prostitucion comercial.

“Nos ta haci bailenan sensual dilanti di hende homber, pero nos no ta prostituta. Pa bin Albania y traha, nos a busca un contacto, pasobra e situacion na Colombia no ta bon. Nos ta mamanan soltero y nos tabata pensando riba un manera pa gana placa. Ora nos a yega, nos a realisa cu nos no tabata destina pa e trabou ey, pero a cay den un ring di prostitucion pa e hendenan cu ya a ser identifica pa autoridad y un di nan den prizon,” el a splica.

E muhernan a keda deteni pa dos luna na Pogradec (un ciudad den zuidoost di Albania) y, despues di e inicio di e procesonan legal, a keda deteni na Tirana (e capital) pa dos luna mas sin por a bandona e pais of recupera nan documentonan.

Segun Stefanía, “Nan no kier a laga nos sali. Nos no tin paspoort pasobra nan a kita nan for di nos. Nos ta sin cas, sin cuminda, y te awor un fundacion a yuda nos.”

E victimanan tin famia na Medellín y ta pidi sosten pa regresa Colombia pasobra e proceso hudicial ta andando y nan lo por ser husga den ausencia despues di a ser egaña y explota den exterior.