Den oranan di diasabra anochi, a tuma nota di un contacto sospechoso nabegando den direccion di Aruba. Inmediatamente a notifica personal di e avion di Wardacosta pa dirigi nan mes rapidamente na e localidad. 

Mientras tanto, tambe a pidi personal di un Metal Shark pa sali for di Steunpunt y dirigi nan mes den e mes un direccion. E avion a logra di constata cu  ta trata di un lancha cu personanan indocumenta.

E Metal Shark a logra di yega na e momento necesario pa asina por intercepta e lancha riba lama.  A transporta e lancha y e personanan y a hiba nan te na Steunpunt na Savaneta.

Ta trata di un total di 16 hende homber indocumenta.

Di e 16 personanan, a detene 2 y a entrega e otro 14 homber nan na personal di Warda Nos Costa, segun Wardacosta Region Caribe a informa den un comunicado di prensa.

Amnistia

E noticia aki a causa alarma, ya cu recientemente prome minister Mike Eman (AVP) a anuncia cu tin un plan pa duna amnistia na indocumentadonan na Aruba, y tin preocupacion cu e comentarionan aki lo crea un motivacion pa hende purba yega Aruba di manera ilegal.

Manera Bon Dia Aruba a publica anteriormente, premier Eman a duna comentarionan na un medio di comunicacion local unda a informa cu fin di luna pasa, a presenta den Conseho di Minister un plan pa duna amnistia na indocumentadonan na Aruba.

Contestando kico e rekisitonan lo ta pa bin na remarca pa e amnistia, Eman a indica cu solamente esnan cu tabata na Aruba caba prome cu a entrega e plan den Conseho di Minister lo bin na remarca.

“Pasobra nos tabata sa cu despues di present’e na Conseho di Minister, lo bin rumor, y logicamente e preferencia, y e aspecto cu nos kier regla, ta pa hende cu ya ta akinan,” Eman a bisa. “Nos no ta bay crea un situacion unda hende cu ta scucha cu nos ta bay tin un programa lo bin.”

Eman a bisa cu ya e fecha limite ta fiha, unda hende cu tabata na Aruba caba na momento cu a presenta e proyecto den Conseho di Minister dos siman atras so lo bin na remarca pa loke el a yama e “formalisacion.”

Sinembargo, ora ta trata di persona indocumentado, no tin un manera pa proba exactamente for di ki dia nan ta na Aruba. Obviamente pasobra no tin ningun documento indicando un entrada legal na nos isla.

Gobierno anterior tambe tabatin un propuesta pa un sorto di “flexibilisacion” cu lo permiti algun persona indocumentado legalisa nan situacion. Manera minister e tempo aya, Glenbert Croes (MEP) a informa, e idea tabata pa permiti solamente esnan cu a drenta Aruba di manera legal. Kiermen hende cu a bin di vakantie, pero a keda na Aruba. E hendenan aki lo haya un oportunidad pa haya un estadia legal, y den e caso aki, lo tin un prueba na ki momento y di ki forma nan a drenta Aruba.

Sinembargo, Gabinete AVP-Futuro no a duna ningun detaye di nan plan di amnistia te awo. Dos siman atras, Bon Dia Aruba a manda pregunta pa minister Arthur Dowers (AVP), kende ta encarga cu e proyecto, y el a indica cu lo duna mas informacion tocante esaki siman pasa. Sinembargo, te ciere di e edicion aki, no a haya mas contesta.