Recientemente, colaborador di Bon Dia Aruba a comparti imagen preocupante di e muraya pafo di Instituto Coreccional KIA, cu ta den condicion hopi deplorable.
Por mira cu e muraya ta kibra y ta cayendo den otro, un situacion hopi peligroso. Di un banda, si e muraya kibra esaki por nifica cu detenidonan lo haya oportunidad pa huy, pero di otro banda tambe, e muraya por cay y causa herida of otro accidente, dependiendo di e situacion.
Cu e potretnan a bin un yamado urgente pa actua rapidamente prome cu e muraya aki collapse.
Manera ta conoci, tin un proyecto andando cu sosten di Hulanda pa mehoracion den e instituto coreccional. Aña pasa, Gobernador SE Alfonso Boekhoudt a bishita KIA pa mira e diferente inversion cu a ser haci. A mustra cu a trece personal fiho na e jeugd afdeling, y cu lo inicia un proyecto di cuido forensico, y duna mas actividad pa hoben. Tambe a duna hopi atencion y inversion na e departamento medico pa por cumpli cu rekisito. E tempo aya, gobierno (Gabinete Wever-Croes II) a bisa den un comunicado di prensa cu “tin diferente inversion structural tambe tumando lugar, pero e plan a largo plaso ta pa yega na un instituto nobo.”
Mientras tanto, sinembargo, ta birando urgente pa agilisa e renobacion di infrastructura, pasobra ta mustra cu no por warda te ora keda cla cu construccion di un instituto nobo.
