E novela di e candidato pa ministro den e partido mayor di e coalicion no a caba ainda; e capitulo nobo t’ey caba. E ministro nombra aparentemente no ta haci loke e parlamentario candidato ministerial ta desea. Y e menazanan di bandona partido ta parce di haya forza atrobe. Tranquilidad den e partido por lo pronto no lo tin, si sigui asina. Pero tur e problemanan aki nan por a anticipa. Den algun comentario anterior nos a adverti caba pa e definicion di e ministro nombra como un ministro ‘temporal’ ya cu oficialmente nos no conoce esey; bo ta ministro y responsable pa bo maneho. Claro cu e parlamentario ta trata di cuminza goberna caba mientras e no ta ministro ainda, y talvez nunca lo bira tampoco, pero e lo a sirbi su propio causa mihor si el a haci su trabao di ‘consehero’ di forma discreto. Aki nos a toca un punto delicado, unda a ricibi critica fuerte di oposicion den parlamento, mustrando riba e separacion di poder ehecutivo y legislativo den constitucion, cu no lo ta permiti e parlamentario conseha e ministro.
Esaki merece algun splicacion pasobra tin forma di conseho cu por, y otro cu no. Constitucion ta stipula cu un ministro no por ta alavez parlamentario, salvo un tempo cortico cu nos ta mira regularmente den cambio di gobierno, despues di eleccion. Tambe den e reglanan pa parlamentario ta bisa cu nan no por ta ministro, tampoco ambtenaar activo. E ultimo aki ta implica cu bo no por ta trahando como empleado publico bao autoridad ministerial mientras bo ta parlamentario. Pero, esaki ta significa cu no por tin comunicacion entre un parlamentario y un ministro? Sigur cu si, henter dia y anochi si nan ta desea, basta esey no ta den un relacion di autoridad. Na tur parti di mundo parlamentario ta tene nan comunicacion cu un mandatario discreto, pa motibo obvio. No asina na Aruba, unda un candidato pa ministro ta expresa su frustracion pasobra supuestamente e ministro, segun e ‘temporal’ no ta haci loke e ta bisa y loke nan lo a palabra. Aki ta unda e candidato ta sigui daña pa su mes pasobra aki si e asunto ta cuminza toca bo posicion como parlamentario. Si bo no tin efecto cu bo conseho discreto, anto bo lo mester asumi bo responsabilidad como parlamentario y haci pregunta na e ministro. Loke bo no por haci ta exigi cu e mester haci algo como ministro pasobra lo a palabra esey como bo ‘reemplazante temporal’. E no ta esey, e ta ministro den tur sentido di palabra. E responsabilidad pa e cartera ta trece cune tambe cu tur accion tuma como ministro, tambe decision tuma pa e ministro di husticia, cu si temporalmente a carga e responsabilidad, ta awor pa e ministro asumi. Esaki ta conta por ehemplo pa e situacion, bao di critica parlamentario caba, na e empresanan di utilidad, unda nombramento di miembronan nobo den nan dirigencia por duna problema, si en berdad no tabatin consulta y aprobacion di e prestamistanan cu tin acuerdo contractual pa esaki.
En todo caso, ta parce cu e candidato pa ministro no ta keda cu tanto arma pa forza su caso, pasobra hasta si e gana e bataya den e partido, esey no ta garantiza cu e por bira ministro. Pa cuminza e mester kita e estado actual di sospechoso den un investigacion penal, pa despues su partido acepta su candidatura y propone efectivamente como ministro. E asunto no a caba ey, pasobra manera sa ignora hopi den e asunto aki, e decision final no ta na Aruba. Tur ministro ta ministro di Rey, no di Gobernador, cu tur respet. Ta pesey nos ta anticipa cu finalmente e candidato no lo ta candidato mas, y lo keda cu e opcion di bandona e partido y bay sinta na otro banda den sala di Staten. Pero, si e ta carga ilusion cu otro di su partido lo sigui su ehemplo di bandona partido, nos lo bisa ‘hay que ver para creer’. Muy probablemente e lo mester bay trata di realiza su plannan pa e carteranan cu el a aspira di haya, for di parlamento. Pa esey e tin tur instrumento cu su 20 coleganantambe tin.
Pa bolbe na e asunto di e nombramentonan dudoso na e empresanan estatal di utilidad; nos ta mira critica severo y den cierto sentido hustifica di e partido grandi den oposicion. Aki por constata cu loke ta haci falta ta e ley di good corporate governance cu por tabata vigente caba. Pero ta ken tabata den gobierno desde 2017 te recientemente, no ta exactamente esunnan cu ta protesta awor contra maneho empresarial dudoso? Nan tabatin e tarea pa pasa e ley ey, cu tabata un necesidad grandi, mirando nan propio propaganda continuo cu palabra grandi manera ‘transparencia’ y ‘bon gobernacion’. Tabata nan mes tambe cu a haci bon uso di e falta di regla di bon administracion empresarial, tempo cu mester a reemplaza gerencia di WEB Aruba NV, pa por pasa e contrato cu Eagle LNG, cu despues a muri un morto silencioso… Pues bin keha awor cu no tin legislacion debido ta parce bastante hipocrita. E problema principal ta keda cu nos no ta mira tanto cambio den e mentalidad di mayoria di politico, cu ta bisa cu nan ta pro cambio y pro introduccion di cierto legislacion, pero finalmente Aruba na nan man ta resulta e ultimo den Reino pa introduci nan. Nos ta haya repiticion di e caminda di cruz di e ley di Ombudsman?
