Tratamento di e caso di apelacion di parlamentario y candidato pa minister Mike de Meza contra Ministerio Publico (OM), cual a keda posponi te proximo aviso, tin fecha nobo. E tratamento di e caso di apelacion lo tuma luga awor diamars 4 di augustus.

Manera ta conoci diamars 29 di juli mester a tuma luga e tratamento di e caso di apelacion cu de Meza a entama conta OM. Esaki a keda posponi despues cu e sistema di IT di Corte Comun di Husticia a keda afecta pa un virus. Esaki a causa cu audiencia di algun caso a keda posponi temporalmente, entre nan esun di de Meza contra OM.

Siman pasa a detecta e virus den e sistema di corte, y pa motibonan di seguridad, a pone e computer afecta online. Den noticieronan di Corsou a informa cu e esfuersonan di recuperacion tabata andando, pero a sigura cu tur informacion a keda safe y no a keda comprometi. Ainda e origen di e virus ta desconoci.

Segun informacion publica den un medio di comunicacion local, abogado di parlamentario de Meza, Desiree, a indica cu e fecha nobo pa e tratamento ta bira diamars 4 di augustus pa 2or di atardi y manera ya caba anteriormente indica e tratamento di e caso aki lo sucede tras di porta cera.

Manera ta conoci e trayecto di proceso di screening di candidato pa minister Mike de Meza a ser alarga pa motibo di diferente contratiempo cu a pone un impasse den e nominacion di de Meza, cual ainda e candidato pa minister y su ekipo legal ta luchando pa resolve.

Dia 17 di juli ultimo hues a entrega su decision relaciona cu peticionnan cu de Meza a entrega na Corte den Prome Instancia. E peticion di e ex-minister, ken actualmente ta den nominacion pa bira minister den e gabinete nobo di AVP-FUTURO, ta pidi pa clarificacion tocante e tipo y e motibo di e acusacionnan cu Ministerio Publico (OM) tin contra dje. Ademas, de Meza a pidi OM pa tuma un decision si ta persiguie of no prome cu 15 di augustus 2025.

Den su decision hues a splica cu OM a cumpli cu e decision di Corte di 25 di juni 2025, door di informa Mike de Meza riba e mesun dia ey cu e ta sospechoso den un investigacion cu tin andando y a pon’e na haltura di e articulo den ley riba cual e sospecho contra dje ta basa. Tambe hues a rechasa e peticion pa OM duna contesta prome cu 15 di augustus tocante un posible persecucion. Segun hues, e peticion aki ta di considera prematuro.

E tratamento di e caso di apelacion ta enfoca riba e dos puntonan primordial cu de Meza ya a presenta den corte. Primeramente de Meza y su ekipo legal ta pidi pa OM informa exactamente kico ta e acusacion(nan) cu tin contra de Meza, y no simplemente e articulo den ley pa cual e ta sospechoso. E otro punto den e caso di apelacion ta cu de Meza y su ekipo ta pidi pa duna un fecha pa dicidi si tin suficiente prueba pa persiguie.

E hues cu a rechasa e peticionnan mas recien di de Meza ta mesun hues cu a tuma decision prome biaha, pues segun abogado Croes tabata logico cu e hues lo no a cambia su decision. Aworaki den e tratamento di caso di apelacion tin tres diferente hues cu lo evalua si e decision di e hues den prome instancia tabata corecto of si den caso cu nan ta evalua cu e decision no tabata corecto, pues lo por bay over pa cambia e decision aki.

Mientras tanto gobierno a nombra Sr. Gervais “Baba” Rene Herdé como minister temporal cu lo tuma cartera di Infrastructura, Energia y Telecomunicacion—originalmente reserva pa de Meza. Prome cu e nombramento di Herdé, dr. mr. Arthur Dowers tabata encarga cu e carteranan aki.