Dia 20 di juli ultimo Aruba a conoce un embahadora di beyesa hubenil nobo, Tara van der Werk di 17 di aña di edad a keda corona como Miss Teen Aruba International 2025. Den un entrevista cu Bon Dia Aruba Tara ta conta di su experiencia durante e certamen y su sentimentonan despues di gana e titulo maximo.

Tara ta conta cu e kier a competi pa reina hubenil di carnaval, pero semper e tabata mustra un poco grandi pa esey. Durante un combersacion cu e preparador di certamen di beyesa Edgar Kock, Tara su mama a menciona Tara su deseo pa competi pa reina hubenil di Carnaval, pero mirando cu Tara su potencial lo ta perfecto pa competi den e certamen di beyesa, asina Tara a tuma e decision di participa den Miss Teen Aruba International.

Ademas, Tara a agrega, su famia no ta desconoci den e mundo di beyesa ya cu su mama mes a yega di participa den e certamen di beyesa Miss Aruba, cual tabata un push mas pa el a tuma e decision y competi.

“Mi di e ta un experiencia nobo y mi a yega di tende di e certamen caba y aunke e diferente cu Reina Hubenil mi ta contento cu toch mi a participa. Esey a motiva mi pa descubri mi mes un tiki, desaroya den e temporada di vakantie cu mi tin despues di caba di gradua,” Tara a expresa.

Tocante su experiencia Tara a splica cu e tabata uno hopi emocional pasobra tabatin momentonan cu tabata dificil, unda e tabata descubri su mes y desaroya diferente aspecto, locual no semper ta facil, pero tabata experiencianan dificil cu a yudele mehora.

El a sigui splica cu tabatin hopi momento leuk tambe caminda nan crea conexion, crea amistad, siña hopi di otro hende con pa handle situacionnan, y tambe nan tabata siña hopi cos di nan mes.

“Cosnan cu bo no ta ni pensa cu bo mester a wak bo ta enfoca riba dje y cosnan asina mi ta haya ta hopi leuk. Tambe mi a haya un idea diferente di mundo di beyesa pasobra hopi hende ta kere cu e ta bunitesa so y no ta asina. Bo mester tin inteligencia, motivacion, contenido pa logra y esey tambe a cambia mi perspectiva di certamen di beyesa. Mi experiencia tabata hopi leuk. Nos a siña tocante makeup, tocante cabey, salud mental, entre otro,” el a remarca.

Tara ta conta cu durante anochi final el a sinti basta bon. El a sigui conta cu e prome biaha cu el a subi stage pa presenta e baile di apertura e tabata hopi nervioso, pero na mesun momento e tabata hopi contento cu su famia tabata eynan pa apoy’e y esey a yen’e cu serenidad cu tur cos lo bay bon.

Den e pregunta final, el a sigui splica, pa e momento ey ya el a subi stage varios biaha cu e no tabata hopi nervioso, pero den e momento ey e tabata pensa riba kico lo bira e pregunta final, con e ta bay contesta esaki y tabata bisa su mes pa concentra y no bisa algo kens.

“Mi tabatin miedo di bisa algo kens. E cos ta bo ta hopi nervioso pasobra e un pregunta ey por determina tur cos y ami tabatin miedo cu porta nan lo usa un palabra cu mi no lo compronde of mi lo bisa algo kens…pero el a bay hopi bon. Mi a kere mi lo ta mas nervioso pero e nervionan no tabata hopi erg. Mi tabata hopi enfoca y den mi zone y pa mi e show a sinti manera dos minuut,” el a expresa.

E momento cu su nomber a ser yama como e ganadora absoluto, Tara ta recorda cu e tabata den shock y a cuminsa yora. El a conta cu na e momento ey el a sinti cu su curpa a reacciona mas lihe cu su mente a procesa e informacion y a cuminsa yora. “Ora mi a sinti cu nan a pone e corona riba mi cabes mi a saca un rosea cu mi no tabata sa mi tin wanta y ora mi a wak mi mama tambe yorando, e ora bo ta pensa tur e yoramento y frustracion ta pa un motibo. E tabata un sentimento cu bo no por splica te ora bo pasa door di dje,” el a enfatisa.

Por ultimo, Tara su mensahe pa hobennan di Aruba ta: “Semper djis sigui bo curason pasobra bo no por forsa bo mes haci algo y si bo forsa bo mes haci algo bo no ta bay logra. Semper kere den bo mes, y no worry ki otronan ta bisa bo pasobra bo haci bon bo haci malo semper lo tin un hende ta bisa bo algo. Haci kico abo ta desea y tur cos lo bin bon, pero bo mester pusha door di situacionnan dificil pa bo transforma bo mes.”