Fin di juli ultimo, Banco Central di Aruba (CBA) a publica e di 13 edicion di su Rapport anual di Supervision di Sector Financiero. Igual cu den añanan anterior, e rapport aki ta duna un bista detaya riba e implementacion di ordenansanan estatal supervisor (incluyendo e legislacion pa prevencion y combatimento di labamento di placa, financiamento di terorismo y proliferacion) asigna na CBA, y alabes ta examina e cambionan den e panorama regulatorio y supervisor y ta duna un bista di e desaroyonan principal dentro di sector financiero di Aruba.
E capitulo tocante “Desaroyo Internacional” ta enfoca riba varios desaroyo internacional significante cu ta relevante na e marco legislativo y regulatorio di Aruba. Den e capitulo ta nota cu dia 11 di october 2024, e Basel Committee on Banking Supervision (BCBS) a publica un Rapport di Progreso atendiendo e trastorno bancario di 2023 y riesgo di likides. Den luz di e fayonan di Silicon Valley Bank y Credit Suisse, BCBS a haci analisis adicional, cu a inclui data empirico actualisa di banconan den problema y un examinacion di factornan significante den riesgo di likides. E rapport tambe a investiga retonan potencial cu banco por enfrenta relaciona cu nan habilidad y disponiblidad pa usa nan buffer di likides.
Adicionalmente, e ta evalua e uso di herment di monitoreo supervisor y otro indicadornan di stress. Basa riba e hallazgonan aki, BCBS ta siguiendo varios iniciativa clave cu tambe ta bay ta importante pa CBA. E iniciativanan aki ta inclui esfuerso pa reforsa efectividad di supervision, identifica areanan cu por tin mester di guia adicional, y evalua e prestacion di aspectonan specifico di e Marco Basel. CBA ta completamente comprometi na implementa e standard di Basel pa capital y likides, asina reforsando e resiliencia di sistema bancario di Aruba. Den linea cu esaki, na 2023 a dicidi pa aumenta e CAR (Capital Adequacy Ratio) di 16 porciento na 18 porciento, y tambe pa aumenta, maske gradualmente, e PLR (Prudential Liquidity Ratio) di 18 porciento na 20 porciento.
Divulgacion di exposicion di criptoactivo y amienda na criptoactivo
Na juli 2024, BCBS a finalisa y publica e marco di divulgacion y amiendanan enfoca na su standard prudencial di criptoactivo, ambos cu un fecha di implementacion di 1 di januari 2026.
E Marco di Divulgacion (Disclosure Framework) tocante e exposicion di banco ta exigi un presentacion standarisa di e actividadnan relaciona cu criptoactivo, incluyendo descripcion cualitativo y dato cuantitativo tocante e rekisitonan di capital y likides, cu meta di mehora transparencia y disciplina den e mercado.
E amiendanan na e standard prudencial di criptoactivo ta clarifica e criteria pa clasificacion di ‘stablecoin’ y varios otro aspecto di e standard. CBA ta bay continua monitoriando di cerca e desaroyonan regulatorio internacional den e area aki.
Digitalisacion di finanzas
Na mei 2024, BCBS a publica un rapport tocante digitalisacion di finanzas. E rapport aki ta analisa e impacto di e digitalisacion di finanzas andando riba banco y nan supervision. E rapport ta revisa e rol y riesgo asocia cu e uso di tecnologianan emergente y proveedornan nobo di servicio, manera companianan fintech, big tech y proveedornan di servicio terceros, a traves di varios aspecto di e value chain bancario. Tambe ta considera e implicacion di e digitalisacion di finanzas andando riba banco y nan supervision.
Hallazgonan clave a resalta e aumento di riesgo vincula na digitalisacion, incluyendo riesgo operacional, strategico y reputacional. E rapport ta enfatisa e necesidad pa monitorea riesgo den evolucion, garantisando seguridad di data y desaroyando e experticio necesario pa maneha e complehidad di finanzas digital.
CBA ta bay continua evaluando e panorama cambiante, y si ta necesario, ta bay considera ahuste na e marco supervisor.
IAIS: Plan Strategico 2025-2029
Na october 2024, Asociacion Internacional di Supervisor di Seguro (IAIS) a publica su plan strategico pa 2025-2029. IAIS a delinea tres tema strategico clave cu por tin impacto significante, of hasta duna forma nobo, na e sector di seguro den proximo añanan.
1. Reforsa e respuesta supervisor na cambio climatico.
2. Adapta na innovacion digital y riesgo cibernetico.
3. Sostene industria di seguro den cumpli cu su rol social den construi resiliencia.
Cambio climatico ta un fuente significante di riesgo financiero, afectando e stabilidad di seguro individual y sistemanan financiero global. Seguro ta enfrenta riesgo tanto di transicion como fisico a traves di nan actividadnan di inversion y suscripcion, loke ta haci necesario e identificacion, mitigacion y gestion di riesgo relaciona cu clima.
Innovacion digital ta duna oportunidad substancial pa inclusion financiero y ta reforsa valor di asegurado, pero tambe ta introduci riesgo di conducta y prudencial. Seguro no solamente ta enfrenta menasa cibernetico den nan operacion, pero tambe por ta participante activo den riesgo cibernetico mediante su actividadnan di suscripcion.
Finalmente, atende interes publico ta rekeri un maneho comprensivo, sigurando cu seguro ta cumpli cu necesidadnan social mediante suproducto y servicio, como tambe den contexto di esfuersonan di ciudadania corporativo di seguro, manera inversion y iniciativanan di ambiental, social y di maneho (ESG). CBA ta considera tur tres tema di strategia tambe como altamente relevante pa sector di seguro na Aruba, y ta bay continua monitoriando di cerca e desaroyonan den e areanan aki.
FATF: Actualisacion enfoca riba implementacion di standard FATF riba activo virtual
Na juni 2024, FATF (Financial Action Task Force) a publica su di cinco revision enfoca riba adherencia di hurisdiccionnan na e Standardnan FATF riba VA (activo virtual) y VASP (proveedor di servicio di activo virtual), cu enfoke particular riba implementacion di e Regla di Biahe. E rapport aki tambe ta resalta e riesgo emergente y tendencia di evolucion den mercado relaciona na e uso di VA pa labamento di placa, financiamento di terorismo y financiamento di proliferacion (AML/CFT).
E rapport ta indica cu algun hurisdiccion a haci progreso den pone regulacion AMC/CFT na lugar, manera inter alia, registro of licencia di VASP. Sinembargo, implementacion global a keda atras, y pues VA y VASP ta keda vulnerable pa mal uso.
Hurisdiccionnan ta continua enfrentando reto den cumpli cu rekisitonan fundamental, incluyendo ehecucion di evaluacion di riesgo, y ehecucion di inspeccion supervisor.
Segun e rapport aki, mayoria di e hurisdiccionnan evalua ta cumpli sea parcialmente, of no ta cumpli cu e rekisitonan di FATF pa VA y VASP, cu ta identico na e resultadonan di encuesta di april 2023.
CBA ta subraya e importancia di un marco regulatorio y supervisor fuerte pa atende y mitiga e riesgonan relaciona cu actividadnan VA y VASP. No tur actividad VA, manera defini pa FATF, actualmente ta cay bao di e Ordenansa Estatal AML/CFT. Ademas, e definicion di un VASP manera inclui den e ordenansa AML/CFT mester ta alinea cu e definicion di FATF. Un propuesta legislativo pa atende e deficiencianan aki ta siendo prepara actualmente. Ademas, na mes momento, ta diseñando un marco legal pa supervision prudencial di VASP.
Na october 2024, FATF a revisa su proceduranan cu ta e base pa e procesonan di evaluacion mutuo, follow-up y Grupo di Revision di Cooperacion Internacional (ICRG). FATF a introduci cambio mayor na e criteria pa pone 10 pais riba lista shinishi pa pone enfoke riba paisnan representando riesgo mas grandi na e sistema financiero internacional y alivia presion riba nacionnan menos desaroya.
A pesar di un resultado positivo di e di 4 Ronda di Evaluacion Mutuo di CFATF, ta esencial pa Aruba evalua, a base continuo, su cumplimento cu Standard FATF, incluyendo revision aki aya, y proactivamente atende e gap den su marco AML/CFT/CPF. E di 5 Ronda di Evaluacion Mutuo CFATF ta programa pa 2029. E marco preparatorio pa e proximo ronda aki mester cuminsa lo mas pronto posible.
