(AP) – Pa decadas, su faro poderoso a ilumina Miami su Biscayne Bay, y durante e punto mas dificil di e Guera Frio, loke tabata conoci como Freedom Tower tabata para como un luz di speransa pa centenares di miles di Cubano cu tabata huy for di mando comunista.
E edificio di 14 piso ta unda, for di 1962 pa 1974, U.S State Department a duna bon bini na refugiadonan Cubano cu servicionan medico, les di Ingles y kit di comfort cu tabatin articulonan esencial y tabata contene algo sumamente exotico pa e recien yegadonan: pindakaas.
Despues di decadas di negligencia, loke antes tabata Miami su edificio mas halto awo ta hayando un revitalisacion. Proximo luna, e lo bolbe habri como museo cu lo honra e historia di exiliadonan Cubano cu exhibicion cu ta explora e nificado di migracion, libertad y hogar.
E reapertura di loke ta yama Ellis Island of the South” ta bini na un momento sensitivo. Americanonan Cubano – cu ta domina politica na Miami – a vota pa Donald Trump den e ultimo eleccion presidencial. Sinembargo e presidente su accion contra migrante – incluyendo Cubano – ta cada biaha mas mira como un traicion y a laga varios dudando e sosten aki. No sorprendente, manifestacionnan recien contra Trump a tuma luga fuera di e toren aki.
E organisadornan di e museo, mientras cu nan tabata cana rond di politica di presente, sinembargo no ta sinti repentimento den nan sosten pa e soño Mericano. Na Miami, un punto unda 70% di e residentenan ta papia Spaño como nan prome idioma y mas di mita a nace den exterior, compasion pa migrantenan ta profundo.
“E ta un ciclo,” Rene Ramos, ken ta hefe di archivo na Miami Dade College y a participa den e renovacion di 65 miyon dollar lidera pa e scol, a comenta. “E pais aki tabatin momento unda el a claramente mira e balor di inmigrantenan y otro momentonan unda e no a mira esaki. Loke nos ta haciendo aki ta recorda hende kico migrantenan por logra ora cu nan ricibi e oportunidad.”
Conoci pa e migrantenan cu ta papia Spaño como “El Refugio” of “The Refuge”, e tabata un luga safe pa ricibi vacuna, a entrega documento y ricibi asistencia financiero di alrededor di $120 dollar pa luna.
