Despues cu diamars ultimo parlamentario Mike de Meza a entrega otro caso sumario contra Ministerio Publico (OM) den cual e ta pidi pa OM indica detayadamente di kico e ta sospechoso, ayera hues a bolbe rechasa e mesun peticionnan aki.

Manera ta conoci parlamentario Mike de Meza a entrega diamars ultimo otro caos sumario contra OM. Abogado di de Meza, Sra. Desiree Croes a entrega e caso cu tabata consisti di e mesun contenido cu e prome caso enfocando riba dos peticion; primeramente ta pidi claridad y un splicacion duidelijk di kico ta e acusacionnan contra de Meza; y di dos ta pidi OM pa informa si nan ta bay persigui de Meza si of no.

Mediante un comunicado di prensa ayera OM a informa cu hues a bolbe rechasa e peticionnan di de Meza pa duna OM orden pa inform’e den detaye tocante e tipo y e motibo di e acusacionnan contra dje, inclusivo e acusacionnan concreto riba cual su supuesto actonan castigabel ta basa, y pa tuma un decision di persecucion penal den su caso pa mas tarda 23 di augustus 2025.

Manera ta conoci for di luna pasa caba, dia 15 di juli, de Meza a presenta peticionnan cu tabata mescos, y cu despues a ser rechasa pa hues riba 17 di juli 2025. No satisfecho cu e resultado, el a bay den apelacion contra e decision aki. Dia 8 di augustus Corte Superior a declara e apelacion no admisibel pa motibo cu e abogadonan a entreg’e mucho laat. Como resultado, e decision di Corte den Prome Instancia di 17 di juli 2025 a bira definitivo.

OM a splica den e su comunicado cu hues a dicidi cu, door di presenta di nobo e mesun peticionnan dilanti Corte, e peticionnan ey no tin ningun fundeshi rasonabel. Ley ta bisa cu den un caso asina hues ta rechasa e peticion sin haci mas investigacion (den un tratamento den Corte).

E caso di De Meza ta uno cu a capta atencion di hopi. Ex Procurador General, Bote ter Stege, a comenta riba esaki a traves di su plataforma di LinkedIn.

“Rasonamento incomprendibel di e parlamentario di Aruba, Sr. Mike de Meza. E no por bira minister den Gabinete Eman-Croes (AVP-Futuro) pasobra su screening no tabata exitoso. Corte Comun di Husticia a declara su apelacion contra un decision di corte di Aruba den e asunto di screening ey no admisibel pasobra el a ser entrega mucho laat. Y kico ta su comentario? Corte ta scoge un “caminda facil pa sali.” Despensa? Abo, bo abogado, tabata mucho laat pa entrega e apelacion!,” e ex PG a comenta.

El a agrega tambe cu abogado di De Meza a argumenta cu sentencianan di Corte Supremo no (semper) ta conta pa Aruba. “Despensa? Un di e principionan mas importante den e estado di derecho (incluyendo esun di Aruba) ta e “estado di derecho”,” el a enfatisa.

Origen di e saga aki ta e hecho cu e trayecto di proceso di screening di candidato pa minister Mike de Meza a ser alarga, pa motibo di diferente contratiempo cu a pone un impasse den e nominacion di de Meza, cual ainda e y su ekipo legal ta luchando pa resolve.

Den luna di juni a bira conoci cu DIMP a entrega un caso penal contra de Meza, tocante cual OM inicialmente no a duna clarificacion na Sr. de Meza. Pa e motibo aki, de Meza a entrega peticion na corte contra OM. Segun de Meza, den su mesun declaracion, el a tende di formador cu OM a mark’e como sospechoso den e caso entrega pa DIMP. El a pidi hues pa duna ordo na e instancia pa clarifica e tipo y motibo di e sospecho contra dje. Den un decision emiti dia 25 di juni, hues a afirma su opinion cu ciudadanonan cu ta marca como sospechoso tin derecho pa sa pakico nan ta sospechoso y ki tipo di investigacion ta tumando luga contra nan. Sinembargo, esaki ta solamente si e persona envolvi ser oficialmente deteni, interoga of invita pa interogacion.

Den e caso di de Meza, esaki no a sucede.

Hues a splica e tempo ey cu OM no a emiti un declaracion oficial den cual a marca de Meza como sospechoso, pues nan no ta obliga ainda di duna e tipo y motibo di e sospecho contra dje.

Na otro banda, hues a reconoce e naturalesa precario di e caso aki, unda por papia di circunstancianan excepcional y peso—ya cu de Meza tabata nomina como minister—cual lo por exigi pa acelera e clarificacion. Pues hues a dicidi cu OM tin dos siman tempo pa duna un clarificacion na de Meza si e ta sospechoso den un investigacion y e articulo den ley pa cual e ta sospechoso.

Mientras tanto cu de Meza tabata den su batayanan legal gobierno a nombra Sr. Gervais “Baba” Rene Herdé como minister temporal cu lo tuma cartera di Infrastructura, Energia y Telecomunicacion—originalmente reserva pa de Meza. Prome cu e nombramento di Herdé, dr. mr. Arthur Dowers tabata encarga cu e carteranan aki.

E hecho cu e nombramento di Herdé a ser subraya como un posicion temporal, ta sugeri cu gobierno lo mantene porta habri pa de Meza bira minister, no importa kico e resultado di e casonan por ta.