Diasabra mainta, Prome Minister mr. Mike Eman, a duna un conferencia di prensa riba e veld patras di ex Club Dosva na Dakota pa anuncia e siguiente edicion di Baki den Bario cu lo tuma luga otro siman diasabra dia 23 di augustus.

Baki den Bario ta un proyecto den cual Gobierno ta pone un cantidad di baki grandi pa tira desperdicio residencial aden, disponibel pa e bario, cual e biaha aki ta na Dakota y vecindario. Bao guia di Serlimar y Bureau City Inspector, lo asisti comunidad cu ta trece nan desperdicio di cas den forma separa pa deshaci di esakinan di manera structura.

Ta importante pa continua cu Baki den Bario, mirando e costonan halto pa deshaci di desperdicio riba propio forsa di e habitantenan. No ta tur famia tin e forsa financiero pa paga pa un baki grandi pa por haci nan cura of cas limpi, y ta opta pa acumula sushi den cura te dia nan por paga pa deshaci di esaki. Consecuencia ta cu mientras e sushi manera matras bieu, kashi kibra, frigidair, stoof, sofa etc ta acumula den cura, esaki ta trece diferente bestia no desea den cura manera djaca, raton, insectonnan y mucho mas.

E disciplina tey cerca e habitantenan, pero no tur ora nan tin e forsa financiero pa cubri e gastonan halto pa deshaci comercialmente di nan desperdicio. Baki den Bario, ta brinda tur famia den vecindario e posibilidad pa separa nan desperdicio di cas trempan y deshaci di esakinan di forma resposabel na e sitio unda tin e bakinan grandi. E biaha aki, instancianan di Gobierno lo pasa adelanta den e vecindario di Baki den Bario y laga algun saco grandi di sushi atras, pa e habitantenan cu no tin manera pa yega na e bakinan di desperdicio, por yena e saconan cu sushi y pone dilanti nan cura riba e diasabra mainta, pa BCI y Serlimar pasa busca.

Na mes momento, Prome Minister Eman a duna di conoce cu ademas di ta preparando e veld bandona pa Baki den Bario, DOW ta probecha pa pasa chubato riba e veld pa hacie limpi cu e meta pa duna e veld bida nobo despues di Baki den Bario. Esaki ta cuadra cu e maneho di Minister di Deporte Gerlien Croes cu tambe ta haciendo varios veld di deporte rond Aruba limpi pa duna esakinan bida bek y duna e hobennan espacio pa haci deporte. Asociacion di Bombero hunto cu Club Douane ya a duna di conoce cu nan tin interes pa uza e veld, pero tambe un grupo di maestro di scol cu a cuminsa un scol special, a mustra interes pa uza e veld pa nan alumnonan special.

Baki den Bario Dakota ta tuma luga diasabra 23 di augustus for di 7’or di mainta pa 11’or riba e veld patras di Respaldo/ex Club Dosva. Mester enfatisa cu no ta permiti trece productonan di asbest, ni azeta di auto y tampoco desperdicio comercial.