Un atake di cacho los riba un turista Koreano ta ilustra un biaha mas con e ley di cacho y particularmente su falta implementacion.

Tabata Diahuebs atardi cu un turista Sur Koreano, Hyungmin Seo a dicidi pa subi su mountain bike pa un recorido. Un recorido cu a bira un momento di susto y frustracion despues cu cachonan los a atake y a morde na su pia. E atake a laga Seo cay cu mas consecuencia ainda.

Ora cu el a wak unda e cachonan a bay despues a resulta cu nan a sali di dump na Parkietenbos, y eynan e trahadonan a bisa cu e cachonan no tin doňo y nan no por haci nada.

Hyungmin Seo ta un turista cu ta biaha cu su mesun boto, cu ta mara na Varadero y ta cliente di Budget Marina cu ta facilita e procesonan necesario. E tabata na e negoshi, pa despues bolbe na su boto, cu a nifica cu e mester a pasa dilanti di Dump, y ta e momento ey cu e cachonan a atak’e. Despues cu ningun hende na dump realmente a ofrec’e Asistencia, Seo a tuma contacto via Whatsapp cu Jair Britten, kende ta traha na Budget Marine. Britten a trata di tur manera pa haya sa ken ta responsabel pa e incidente aki cu a laga e turista hopi afecta.

Finalmente a yama polis cu a avisa ambulance pa hiba Hyunmin Seo pa hospital unda el a haya hangua contra tetanus, y pa a haci su heridanan limpi. Sinembargo, Britten no a sinti cu esaki ta e forma pa atende cu e problema cu ta keda existi y a tuma contacto cu Polis di Bario pa mira kico por haci cu e problema di e cachonan aki. Pero, Polis di Bario a bisa Britten cu ta te awe por atend’e pa papia di e situacion. Buro City Inspector di nan banda a laga sa cu nan no kier ni por asumi e responsabilidad, pasobra “nan a laba man di e problema y simplemente no kier haci nada mas riba e tema di cacho los.”

E turista tabata hopi rabia pa e falta di responsabilisacion y tabata cla pa denuncia Aruba pa e maneho riba cacho los internacionalmente. Jair Britten a compronde e emocionnan pero consiente tambe pa e consequencia pa Aruba, a dicidi pa informa ATA di e incidente, cu tin un team pa canalisa tipo di kehonan asina.

Britten mes a keda hopi disgusta cu e hecho cu Polis di Bario no kier a yuda den e caso aki y simplemente a keda sin presenta, sin atende cu e victima. Britten, kende a yuda e turista ta hopi preocupa cu berdad fundacionnan ta purba mitiga e problema di cacho los y ta sterilisa esakinan, pero “djis pone nan bek riba dump sin cu tin hende responsabel pa nan,” no ta e miho paso.

Es mas, no ta e unico ehempel di cachonan los sin doňo cu berdad ta sterilisa y ta hasta haya cuminda regular, pero cu por forma peliger. Por ehempel, tin tres cacho grandi cu ta cana riba beach entre e restaurantnan na Surfside y tabata riba un Diabierna atardi laat ora cu bishitantenan di un di e establecimento mester a interveni ora un di e cachonan kier a ataca un mucha.

E avisa oficina di Minister di Husticia Arthur Dowers riba e incidente, y e speranza ta cu Gobierno por tuma un paso firme pa soluciona e problema grandi di cacho los na Aruba.

Bon Dia Aruba a tuma contacto cu vocero policial pa mas informacion, pero no a haya reaccion.

Tambe a combersa cu e turista Hyongmin Seo cu entretanto ta mas trankilo y ta na Varadero, y a bisa cu e ta sinti miho. Pero e ta kere si cu como pais, mester tin un miho acercamento pa cachonan los, mirando e peliger cu nan por representa pa tur hende.