(AP) — Atakenan atribui na un grupo rebelde apoya pa e Estado Islamico den Congo Oriental a causa e morto di al menos 52 persona e luna aki, segun e mision di paz di UN den e pais centro Africano a informa dialuna.
E atakenan, cual a ser atribui na Allied Democratic Forces (ADF), a tuma lugar entre 9 y 16 di augustus den e teritorio di Beni y Lubero den e provincia di North Kivu, segun un declaracion di e mision UN MONUSCO.
“E violencia a keda acompaña cu secuestro, hortamento, kimamento di cas, vehiculonan y motor, como tambe destruccion di propiedad di comunidadnan cu ya ta enfrentando condicionnan humanitario grave,” e declaracion a bisa.
UN a adverti cu e cifra di 52 persona morto lo probablemente subi.
Congo Oriental a experencia hopi atake mortal den e ultimo añanan pa parti di gruponan arma, incluyendo ADF y rebeldenan apoya pa Ruanda. ADF, cual tin laso cu e Estado Islamico, ta opera riba e frontera cu Uganda y frecuentemente ta pone blanco riba ciudadanonan.
Autoridadnan a bisa cu e grupo a mata cerca di 40 persona den e provincia di Ituri luna pasa, ora cu nan a redada un iglesia Catolico durante un vigilia y los tiro riba devotonan, incluyendo hopi hende muher y muchanan.
ADF a ser forma pa diferente gruponan chikito na Uganda na fin di añanan 1990 despues di un desatisfacion cu presidente Yoweri Museveni.
Na 2002, despues di ofensivanan militar pa parti di e forsa Ugandes, e grupo a move su actividadnan pa Congo y desde e tempo ey tabata responsable pa e morto di miles ciudadano. Na 2019, ADF a priminti lealtad na e Estado Islamico.
E ehercito Congoles tabatin dificultad pa contene e grupo pa hopi tempo, specialmente mientras e ta combati tambe un conflicto renoba cu e movemento rebelde M23, apoya pa Ruanda.
Congo y e rebeldenan M23 tabata programa pa firma un acuerdo di paz permanente prome cu 18 di augustus, pero no a anuncia ningun acuerdo dialuna. Den e ultimo dianan, tur dos banda a acusa otro di viola un alto al fuego cu tabata un condicion pa un acuerdo.
