Recientemente minister di Finanzas, Asuntonan Economico y Sector Primario, Geoffrey Wever (Futuro) a informa cu e prome cambio di Presupuesto 2025 lo ser trata diaranson 20 di augustus pa Parlamento di Aruba. Presupuesto 2025 di pais Aruba a ser aproba unanimamente pa Parlamento di Aruba dia 28 di maart ultimo.
Manera ta conoci tratamento si presupuesto 2025 sigur tabata uno cu a bay den un forma peculiar. Riba e mesun dia cu Gabinete AVP-FUTURO a huramenta, nan mester a trata un presupuesto cu nan no a traha, pero cu e gabinete anterior, Wever-Croes II, a traha. Pero un amienda entrega pa fraccion AVP y FUTURO, cual despues a ser entrega como un nota di cambio cu a ser aproba, a cambia e direccion di e presupuesto y pues esaki tabata den gran parti loke tambe e ministernan nobo a trata e momento ey.
Cu a nota di cambio aki Gabinete AVP-FUTURO a implementa reduccion di accijns di 10 cen riba gasolin cu a drenta na vigor dia 1 di mei 2025. un reduccion asina lo tin un impacto directo pa e consumidor y un impacto indirecto tambe pa locual ta trata e prijsnan, probablemente, pasobra e ta yuda baha un di e costonan cu mas ta pisa riba e calculacionnan cu ta ser haci di gastonan di transporte na Aruba.
Ademas di esaki gobierno a aumenta e reparatietoeslag pa pensionadonan cuminsando cu 250 florin pa luna desde 1 di mei 2025. Manera ta conoci, durante temporada di campaña partido AVP a indica cu lo aumenta e reparatieteoslag pa pensionadonan cu 500 florin, pero esaki, actual prome minister Mike Eman a splica e momento ey, no tabata posibel.
Cu e aumento inicial aki, cual ta dentro di e normanan financiero, ta mustra caba un cambio di mentalidad y pensamento caminda cu nan no ta busca di saca for di e saco di e ciudadanonan, pero ta busca pa percura pa e hendenan y esnan den mas necesidad ta esnan cu prome ta ser yuda.
Otro cambio cu el a presenta ta pa yuda financia e cambio di direccion, cual ta e introduccion di un reduccion di goederen en diensten cu 10%. Eman a menciona cu pa añanan largo Raad van Advies a bisa cu nan ta mira tur aña e post di goederen en diensten ta 190 miyon florin y ta keda crece, pero pueblo no ta mira nada. Pa motibo aki e gobierno nobo ta bay reduci esaki cu 10% cu ta trece otro espacio financiero.
Ademas di esaki, e cambio ta inclui tambe un aumento, dentro di e margennan di presupuesto, pa inversion cu 30 miyon florin. Esaki, segun e momento ey parlamentario Mike Eman, awor prome minister, ta pasobra tin cantidad di edificio di gobierno atrobe den estado di deterioro y gabinete nobo kier pone enfasis riba inversion pa mehora e producto di Aruba y mehora e calidad di bida di e ciudadanonan.
Presidente di parlamento e tempo ey, Gerlien Croes, a suspende e tratamento pa asina manda e amienda di presupuesto 2025 cerca e organonan consultativo pa por determina kico ta e impacto di e cambio di direccion di e presupuesto. Un decision cu a ricibi critica fuerte di parti di parlamentarionan di oposicion.
Despues cu parlamento a aproba presupuesto 2025, manera custumber CAft a emiti su conseho riba esaki, cual segun minister Wever ta uno positivo.
CAft ta confirma cu Aruba su presupuesto 2025 ta cumpli cu e normanan financiero manera hancra den ley. Segun e conseho di CAft, e presupuesto di pais Aruba ta presenta un surplus di Afl. 192 miyon, cual ta ekivalente na 2.4% di e producto interno bruto (BBP), cumpliendo asina cu e norma prescribi di un saldo positivo di minimo 1% di e sector colectivo.
Awor despues di casi 5 luna, Gabinete AVP-FUTURO lo defende e prome nota di cambio di Presupuesto 2025. Segun minister Wever ta indica e prome nota di cambio tambe ta cumpli cu un saldo financiero di minimo 1% pa e sector colectivo manera e Landsverordening Aruba Financieel Toezicht (LAft) ta prescribi.
Relaciona cu tratamento di e prome cambio di presupuesto ex minister di Finanzas y actual parlamentario Xiomara Maduro a manda algun pregunta pa gobierno, den e caso aki specificamente relacion cu e organisacion di e evento “Ban Bek Caya”.
A traves di su pagina oficial di Facebook parlamentario Maduro a comparti cu el a ricibi dos contesta na su pregunta cuanto e actividadnan “Ban Bek Caya” a costa. El a indica cu un rato gobierno a bisa cu e prome edicion a costa 196.700 florin y despues ta bisa cu e ta costa 190.481,91 florin.
Maduro a indica tambe cu segun gobierno su contesta e di dos edicion di “Ban Bek Caya” a costa solamente 62 mil florin, un diferencia hopi grandi cu e 190 of 196 mil florin cu e prome edicion a costa. El a agrega cu segun gobierno ta indica 30 mil florin so di placa di pueblo ta paga pa “Ban Bek Caya” y ATA ta paga e resto cu 222 mil florin.
