(AP) — Ora Olivier Baroin a muda pa un apartamento den Montmartre mas o menos 15 aña pasa, el a sinti manera e tabata biba den un cas di pueblo den curason di Paris. Awor no ta asina mas.
Tiendanan pa residente ta disparciendo, hunto cu e atmosfera amigable, e ta bisa. Na nan lugar tin turistanan cu ta tuma selfie, tiendanan cu ta bende souvenir, y cafénan cu ta pone mesa riba caya chikito mientras sobreturismo ta tuma su curso.
Baroin a cansa. El a pone su apartamento na benta despues cu cayanan local a ser destina solamente pa peatonnan pa acoge e cantidad creciente di bishitante. “Mi a bisa mi mes cu mi no tin otro opcion cu djis bay, pasobra cu mi tin un discapacidad, y ta hopi mas complica ora bo no por usa bo auto mas, of ora bo mester yama taxi di mainta te anochi,” el a conta The Associated Press.
Sobreturismo den ciudadnan Europeo
Di Venezia te Barcelona y Amsterdam, ciudadnan Europeo ta luchando pa absorbe e cantidad creciente di turistanan.
Algun president den un di e barionan mas popular turistico di Paris awor ta opone. Un banner preto colga entre dos balcon den Montmartre ta bisa, den Ingles: “Tras di e postal: localnan maltrata pa e Alcalde.” Otro, den Frances, ta bisa: “Residentenan di Montmartre ta resisti.”
Riba sero unda Basilica di Sacré-Cœur ta domina e panorama di e ciudad, residentenan ta lamenta loke nan ta yama e “Disneyficacion” di e barionan bohemio di Paris. Basilica ta bisa cu e ta atrae te 11 miyon hende pa aña — mas cu Toren Eiffel — mientras bida diario den e bario a ser tuma over pa vehiculonan tuk-tuk, grupo di turista, rijnan pa saca potret y short-term rentals.
“Awor no tin mas tienda, no tin mas tienda di cuminda, pues tur cos mester ser delivered,” Baroin a bisa, 56 aña, miembro di un grupo di protesta di residentenan yama Vivre à Montmartre (Biba den Montmartre).
E descontento ta refleha tension n’e otro banda di ciudad na e Museo Louvre, unda empleadonan a haci un welga espontaneo na juni pa motibo di sobrepoblacion cronico, falta di personal y condicionnan cu ta cayendo atras. Louvre a conta 8,7 miyon bishitante den 2024, mas cu dobel di loke su infrastructura tabata diseña pa maneha.
Un postal bao di presion
Paris, un ciudad cu apenas tin mas cu 2 miyon residentenan si bo ta conta su suburbionan, a ricibi 48,7 miyon turista den 2024, un aumento di 2% compara cu e aña anterior.
Sacré-Cœur, e monumento mas bishita na Francia den 2024, y e bario di Montmartre cu ta rondon’e a ser converti den loke algun local ta yama un parke tematico.
Negoshinan tradicional manera carnicero, panaderia y tiendanan di compra ta disparciendo, reemplasa pa tiendanan di gelato, bubble-tea y stand cu camisa di souvenir.
Autoridadnan di Paris no a duna reaccion inmediato na peticion di comentario.
Bishitantenan, sinembargo, tabata disfrutando di e cayanan diamars pasa.
“Pa gran parti, henter Paris ta hopi ocupa, pero yen di bida, sigur,” turista Mericano Adam Davidson a bisa. “Compara cu Washington, D.C., un ciudad cu ta hopi activo tambe, mi lo bisa cu Paris ta hopi mas yen di bida riba un otro nivel, sigur.”
Europa yegando su limite
Na Barcelona, miles a sali riba caya e aña aki, algun cu pistol di awa, pa pidi limitacion riba cruceronan y short-term rentals. Venezia awor ta cobrando un tarifa di entrada pa bishitante di un dia y ta pone limite riba cantidad di turista. Na Atenas, autoridadnan a impone un limite diario riba bishitante di Acropolis pa protege e monumento antiguo contra turistanan.
Planificadornan urbano ta adverti cu barionan historico tin riesgo pa bira loke criticonan ta yama “ciudadnan zombie” — bunita pero sin bida, unda su residentenan ta ser desplasa pa bishitantenan temporal.
Paris ta purbando di mitiga e problema cu un abordamento riba short-term rentals y propiedadnan sin licencia.
Pero presion di turismo ta sigui crece. Pa 2050, ta proyecta cu e poblacion mundial lo yega casi 10 biyon, segun calculacionnan di UN. Mirando cu e clase medio global ta expandiendo, unda vuelonan barata ta floreciendo y plataforma digital ta guia biahero na e mesun landmark viral, ta anticipa hopi mas bishitante den ciudadnan iconico manera Paris.
E pregunta awor ta, segun residentenan, si a keda espacio pa esnan cu ta yama e luganan aki nan cas.
