Ayera Bon Dia Aruba a publica un articulo den cual ta trece dilanti preguntanan cu lectornan di nos corant a manda tocante e mantencion di careteranan di Green Corridor cuestionando pakico Departamento di Obra Publico Aruba (DOW) lo a scoge pa drecha Green Corridor na luga di otro careteranan cu ta den estado mas deplorabel. Bon Dia Aruba manda pregunta pa DOW algun dia atras y ayera a ricibi informacion contestando y aclariando dudanan di nos lectornan.

Manera ya caba indica, recientemente DOW a anuncia cu nan ta realisando trabou di mantencion riba Green Corridor usando un metodo nobo, micro paving pa haci esaki. Micro paving ta un mescla di polymer modifica, cual al contrario cu e metodo tradicional di basha asfalt cayente, ta ser aplica friu riba e capa di asfalt existente pa asina alarga e bida di e caretera. E asfalt friu aki tin hopi awa y ora esaki evapora, e asfalt restante lo crea un capa cu ta fortalece e asfalt existente.

E ta un sistema conoci mundialmente caba pero te awor a ser introduci pa Aruba ya cu a mira e beneficio di e metodo aki pa mantencion di caretera riba nos isla. DOW a enfatisa cu e metodo aki lo yuda preveni dañonan causa pa yobida, sigurando cu e capa lo keda bon cubri.

DOW a remarca cu e implementacion di micro paving ta forma parti di un metodo preventivo, unda na momento apropia lo introduci e metodo pa mehora funcionalidad di e caretera ora esaki mustra señal di deterioro. A subraya cu e metodo aki no ta atende e restructuracion di caretera, pues no ta apto den casonan di careteranan completamente deteriora manera riba caretera di WEB bay Barcadera of Franse Pas.

Pa motibo di esaki algun lector di nos corant a tuma contacto cu nos mesa di redaccion pa expresa nan frustracion, ya cu tin caretera cu, den nan opinion, mester tin prioridad pa ser drecha, mas ainda mirando cu e caretera di Green Corridor ta relativamente den bon estado.

E lectornan ta cuestiona kico ta e metodo of criteria cu DOW ta usa pa scoge cual caretera ta na beurt pa ser drecha y pakico no ta duna e careteranan aki prioridad. Algun dia atras, reportero di Bon Dia Aruba a tuma contacto cu DOW pa haci e mesun preguntanan aki.

Ayera tardi a ricibi respuesta di DOW den cual ta informa y clarifica cu e no ta bay prioridad. E careteranan cu ta ser drecha cu micro paving ta careteranan cu ta di Green Corridor cu ta di e compania Caribbean Infrastructure Company (CIC NV) “E no ta camindanan di DOW,” representante di DOW a clarifica.

Aclariacion inconveniente cu proceso di aplicacion micro paving

Mediante un comunicado di prensa publica riba pagina oficial di DOW ayera, e compania CIC NV a duna un aclaracion tocante incoveniente tuma luga riba diabierna 9 di augustus 2025 y alabes a informa tocante e accionnan cu lo ser tuma pa drecha esaki.

Segun e comunicado ta indica durante e instalacion di micro paving riba Green Corridor, un yobida fuerte inespera a cay cual a afecta e proceso di cura/seca di e material. Den e comunicado ta splica cu e micro paving ta un solucion di asfalt cu ta inclui un emulsie y pa e proceso di cura ta exitoso y e material pega corectamente na e asfalt existente, ta rekeri un tempo di mas o menos 1 pa 2 ora sin yobida di awa despues di e aplicacion inicial pa asina permiti e emulsie kibra e awa y evapora e asfalt residual pega debidamente.

E yobida fuerte di diabierna 9 di augustus a impedi e proceso di cura aki completamente y como resultado, un parti di e material no por a pega manera mester ta.

“Nos ta reconoce e importancia di e proyecto aki pa e infrastructura di Aruba ta y nos ta lamenta e inconveniencia di e situacion akinan por a causa. Nos a coordina cu e autoridadnan y pa garantisa e calidad final di e trabou, nos a programa e reparacion y reinstalacion di e micro paving afecta pa diasabra 23 di augustus 2025,” e comunidad a informa.