Ayera Parlamento di Aruba a cuminsa cu e tratamento di presupuesto complementario 2025. Un reunion cu a cuminsa 9or di mainta y a termina pa 6or di atardi cu schorsing di presidente di parlamento, Sr. Marlon Sneek. E reunion lo continua awe mainta pa 9or.
Reunion publico number 25 pa trata presupuesto complementario a cuminsa cu presidente di parlamento Sr. Sneek haciendo un remarca riba un cantidad di pregunta cu fraccionnan di oposicion a manda pa Gabinete AVP-FUTURO cu no a ser contesta por escrito, pero cu a bisa lo haya contesta durante e reunion.
Cada minister a tuma palabra pa asina contesta pregunta cu tabata pendiente pa ricibi respuesta prome cu a inicia cu e tratamento di e prome cambio di presupuesto di pais Aruba 2025. Despues di mas cu 3 ora, tur minister a contesta preguntanan cu a keda pendiente pa asina por a pasa pa e tandanan di oradornan y pregunta di miembronan di parlamento tocante e tratamento di presupuesto complementario mes.
Durante e reunion publico diferente topico a haya hopi atencion, entre otro Rijkswet, situacion di conflicto entre Venezuela cu Merca, maneho financiero di gobierno, turismo, husticia, cuido medico y sector social.
Un preocupacion cu tambe a resalta ta costo di bida y poder di compra di ciudadanonan cu a pesar di medidanan implementa pa e gabinete nobo, ta keda bay atras.
Awe mainta pa 9or Gabinete AVP-FUTURO y parlamentarionan di tur fraccion lo t’ey presente den sala di parlamento pa continua cu e tratamento di e presupuesto complementario 2025.
