(CuraçaoChronicle) – Lider di partido MAN, parlamentario Giselle McWilliam a critica prome minister Gilmar Pisas pa su silencio tocante e tension aumentando entre Merca y Venezuela. Den un declaracion riba rednan social, McWillaim a insisti cu Corsou no por ignora e presencia di barco di guera Mericano cerca di awa Venezolano, na porta di e isla.
Segun McWillaim, MAN-PIN ya a entrega pregunta tocante e asunto aki na e prome minister den luna di mei, pero te awo no a ricibi ningun contesta. “Awe nos ta lanta cu un situacion tenso, unda Merca ta mandando barco di guera net na nos porta, cerca di costa Venezolano,” el a bisa.
E lider di oposicion a adverti cu ta poniendo Corsou “on the spot” cu tur e consecuencia potencial cu un escalacion entre Merca y Venezuela por trece cune.
McWilliam a urgi gobierno di Corsou, hunto cu Hulanda, pa sigura cu Aruba, Corsou, y Bonaire keda como zonanan designa pa paz y stabilidad den e region. E tambe a haci un yamado riba premier Pisas pa dirigi palabra na e nacion directamente, informando publico tocante e situacion y asumiendo su responsabilidad como cabes di gobierno. “Pueblo di Corsou merece claridad,” McWilliam a enfatisa.
