(AP) — Rapper Lil Nas X a keda aresta y hiba brevemente na hospital pa sobredosis ayera, despues cu polis di Los Angeles a bisa el a ataca agentenan respondiendo na un melding di un homber sunu cu tabata cana riba un boulevard druk.
Lil Nas X, kende su nomber legal ta Montero Lamar Hill, a keda deteni riba sospecho di delito di obstruccion di un agente policial y tabata den cel.
Polis a hay’e ta cana riba Ventura Boulevard, normalmente hopi druk, den bario Studio City tiki prome cu 6am, vocero di polis di Los Angeles, oficial Charles Miller a bisa. Despues di ataca polis, a tum’e den custodia, pero e agentenan, sospechando un sobredosis di droga, a hib’e hospital prome, Miller a bisa. No tabatin mas informacion tocante su condicion, pero el a sali di hospital y a bay den cel apenas algun ora despues.
Video obteni pa TMZ ta parce di mustr’e riba caya bistiendo solamente su paña interior y boots.
E tabata deteni na Valley Jail na Van Nuys, cerca di unda polis a hay’e.
Mensahe na representantenan di Lil Nas X buscando comentario no a haya contesta inmediato.
E rapper y cantante di 26 aña for di Atlanta ta miho conoci pa su hit enorme di 2018, “Old Town Road”, cu a mescla country cu hip-hop. El a dura un cantidad record di 19 siman riba No. 1 di Billboard Hot 100.
Conoci pa pusha genero, zonido innovador y estilo, su prome album di estudio completo, “Montero” di 2021, tabata No. 2 riba album chart di Billboard y a keda nomina pa Grammy pa album di aña.
