Minister Gerlien Croes recientemente a manda un carta relaciona cu mi preguntanan tocante su bishita di trabou na Hulanda entre 9 te 15 di juni ultimo. Esun cu lesa e carta por saca un conclusion so: e minister ta nenga pa uza e oportunidad pa desmenti e acusacion cu nan ta haci contra dje tocante ‘snoepreis’.

E respuesta ta pober, evasivo y insuficiente. No tin ningun relato financiero presenta. Pues e minister no solamente ta faya na transparencia, sino tambe ta actua contra su mesun acuerdo di gobernacion di AVP-Futuro, caminda a palabra cu pa tur bishita di trabou mester pidi tres oferta. Ni un solo prueba no ta mustra cu esaki a wordo cumpli.

Tambe e minister no ta bisa concretamente ki acuerdo a wordo logra durante e bishita. Loke si ta bon cla, ta cu e no tabata tin ningun reunion politico. Pues nos mester hasi e pregunta, pakico e minister a bai Hulanda? No lo tabata mihor y mas eficiente pa a warda algun siman mas te ora cu su counterpartnan politico na Den Haag lo tabata disponible? Awor e minister a gasta hopi placa di pueblo sin ningun resultado politico tangible.

E imagen cu keda ta di un biahe carisimo den business class, y iresponsabilidad. Pa colmo, den su respuesta e minister ta menciona cu e a tene un reunion cu e wethouder di Rotterdam tocante uzo di yerba artificial segunda mano; en bes cu na Rotterdam nan benta nan afo despues di uso, Minister Gerlien Croes a pidi pa manda nan Aruba.

E ideanan aki ta trece hopi preocupacion: tanto riba e calidad y durabilidad di e yerba uza, pero mas tanto riba e riesgo pa salud, cu ta topico di discusion rond di mundo. Ta incomprendible cu un minister lo pone nos deportistanan di Aruba den un situacion asina, sin un evaluacion serio.

Debi cu e respuesta di e minister tabata asina pober y evasivo, mi mester a haci 23 pregunta adicional na e minister. Ta importante pa un minister duna cuenta na Parlamento, y asina na pueblo di Aruba. Ora un minister ta scoge pa bay den biahe caro, e mester duna tur informacion pa mustra kico tabata e meta, ki resultado a logra, y con placa di pagado di belasting a wordo gasta.

Transparencia y dunamento di cuenta no ta un fabor cu un minister por eligi pa duna Parlamento, pero ta un obligacion basico den un democracia. Ora un minister ta nenga pa duna claridad riba costo, ora e ta nenga pa cumpli cu su mesun compromiso di acuerdo di gobernacion, y ora no tin ningun resultado concreto, e biahe aki no por wordo mira sino como un eror caro y iresponsabel.

Ta ora pa minister Gerlien Croes compronde cu e mester ta responsabel cu placa di pueblo. Aruba ta merece lidernan cu ta cumpli cu nan palabra y cu ta defende tur cen di comunidad cu responsabilidad.

Nota di redaccion: E articulo aki ta opinion di e autor y no ta representa opinion di Bon Dia Aruba.