Diaranson 20 di augustus Parlamento di Aruba a inicia cu e tratamento di presupuesto complementario 2025, e prome cambio di presupuesto nacional 2025 di pais Aruba, cual a sigui ayera y lo continua dialuna mainta, despues cu presidente di Parlamento, Sr. Marlon Sneek (AVP) a schors e reunion un biaha mas.

E prome reunion publico pa trata presupuesto complementario 2025 a cuminsa cu ministernan di Gabinete AVP-FUTURO contestando preguntanan cu oposicion a manda por escrito cu no a haya contesta por escrito. Despues cu cada minister a haya e oportunidad pa contesta e preguntanan cu a keda falta, a pasa over pa tratamento di e presupuesto complementario mes.

Parlamentarionan di e cuater fraccion a dirigi un cantidad di pregunta na ministernan concerni y algun parlamentario a entrega mocion y/of amienda.

Den caso di fraccion MEP, lider di fraccion Evelyn Wever-Croes a trece dilanti diferente pregunta y topico. Entre otro, el a trece dilanti e topico di Rijkswet, na unda el a enfatisa cu e circunstancianan tempo cu Gabinete Wever-Croes tabata na mando tabata completamente otro, na momento cu Hulanda a bin cu e exigencia pa un Rijkswet pa por a haya ayudo financiero.

El a cuestiona, mirando cu aworaki e circunstancianan ta completamente diferente y teniendo cuenta cu na mas di un ocasion gobierno a indica cu finanzas publico ta solido, si ainda ta necesario pa bin cu un Rijkswet y den ki cuadro ta negociando e Rijkswet.

Parlamentario Wever-Croes tambe a cuestiona e biahenan recien di minister Gerlien Croes (Futuro) y a puntra prome minister Mike Eman (AVP) si e ta controla si e biahenan di minister Croes ta den cumplimento cu e acuerdo di gobernacion cu coalicion a firma, den cual tin cuadronan specifico pa loke ta trata biahe di e ministernan.

Di su banda, parlamentario Rocco Tjon (MEP) a entrega siete mocion den cual e ta boga pa mas fondo pa sector social. E fondo aki, segun el a indica, ta trata di tres miyon florin cu lo ser reparti bao di Stichting Hunto, Famia Planea Aruba, FADA, Fundacion Respetami, Fundacion pa nos Comunidad y Fundacion Contra Violencia Relacional.

Como ex-minister di Husticia e parlamentario a reacciona tambe brevemente tambe riba e parti di Husticia, specificamente tocante e recortenan den Husticia. El a indica cu e recortenan aki lo tin como consecuencia cu organisacionnan di seguridad no lo por garantisa seguridad mas, y asina e ciudadanonan mes lo “trek aan de bel” ora nan no ta sinti nan mes sigur mas.

Parlamentario Tjon a indica cu contrario na loke Minister di Husticia actual, Arthur Dowers (AVP), kier aparenta, el a hereda un presupuesto cu hopi fondo, cu e parlamentario ta indica el a corta aden, como tambe proyectonan cla pa ehecuta.

Pa loke ta trata fraccion PPA, lider di fraccion Otmar Oduber tambe a trece dilanti diferente topico a traves di preguntanan cu el a dirigi na varios minister. Entre otro el trece dilanti e topico di Rijkswet y interes halto cu Aruba ta pagando; el a cuestiona prome minister Eman tocante e personanan cu e mandatario tin trahando den su bureau y si esakinan a bay conforme open vacature.

Parlamentario Oduber a toca e tema di aumento di repartietoeslag. El a cuestiona, basa riba presupuesto 2026 den cual tin poni cu desde januari un grupo di pensionado lo ricibi 200 florin adicional, cual grupo lo ricibi e 200 florin extra aki y a puntra si gobierno AVP-FUTURO ta bay cumpli cu e promesa di 700 florin di reparatietoeslag.

Adicionalmente fraccion PPA a presenta un amienda pa pone placa disponibel pa centronan di bario na Aruba. Fraccion PPA a reuni cu centronan di bario, caminda e directivanan di e centronan di bario a trece dilanti varios punto y e desafionan cu nan enfrenta.

Parlamentario Oduber a toca e topico di Rijkswet tambe y a alerta cu e manera cu gobierno ta maneha e tema aki ta un “atake contra democracia” di Aruba y un riesgo pa autonomia. Desde fin di januari fraccion PPA a pidi un reunion publico pa trata e topico di Rijkswet, pero e reunion no a ser yama.

Di parti di fraccion AVP, parlamentario Dennerich Kelly a presenta un mocion pa atende cu desperdicio medico na dump y a indica cu tin 50 container na dump yena cu desperdicio medico, cual el a enfatisa ta un situacion hopi peligroso. El a pidi un investigacion riba e situacion aki y un solucion pa esaki.

Alabes e parlamentario a toca e tema di personal di cuido domestico y a indica cu e grupo aki merece mas atencion y tin mester di miho control. El a cuestiona si tin un registro di e dunadornan di cuido aki, si tin bista cuanto hende tin y sin tin plan pa esaki.

Parlamentario Stephany Sevinger a trece dilanti su preocupacion pa e situacion actual pa loke ta trata vivienda. El a trece dilanti e punto di preocupacion tocante e dificultad cu ciudadanonan tin pa yega na un cas propio of un tereno.

Relaciona cu esaki el a trece un mocion pa dilanti den cual el a subraya diferente punto cu e lo desea pa gobierno revisa of ahusta pa asina ciudadanonan tin mas accesibilidad na e posibilidad di por yega na un cas of tereno propio.

Diaranson atardi pa 6or e prome reunion publico di tratamento di presupuesto complementario a yega su fin na momento cu presidente di parlamento, Sr. Marlon Sneek, a schors e reunion. Inicialmente tabata programa pa e tratamento continua diahuebs 21 di augustus, pero despues cu parlamentarionan a trece dilanti varios pregunta y nan preocupacion pa e situacion di tension actual entre Merca y Venezuela, a pidi prome minister Mike Eman pa un reunion pa asina e brinda informacion concreto tocante esaki.

E reunion aki cu prome minister Eman a tuma luga diahuebs 21 di augustus locual a haci cu e di dos reunion publico di tratamento di presupuesto complementario a hala pa diabierna 22 di augustus (ayera). Na final di e reunion publico di ayera, presidente di parlamento a bolbe schors e reunion te cu dialuna mainta 9or.