Cuanto responsabilidad Reino…Ta cubri den Caribe…?

E dia a yega cu gobierno di Estadonan Uni ta tuma accion mas severo contra transporte di droga for di continente Suramericano den direccion di nan pais. Esaki ta causando bastante conmocion den nos region, tambe pa eventual consecuencia pa varios pais cu mester considera intensiva nan actividadnan. E teritorionan di Reino den Caribe, principalmente e islanan ABC, ta den e parti mas ‘cayente’ di e confrontacion. Esaki pa varios motibo. Uno ta cu Reino Hulandes tin tanto awa teritorial como zona economico exclusivo pa vigila. Otro ta cu ta existi cierto colaboracion di vigilancia militar di e zona cu gobierno Mericano, cu dos punto di apoyo na Corsou y Aruba. Tambe tin colaboracion y comunicacion cu e vigilancia Mericano for di nan teritorionan den Caribe, esta Puerto Rico y US Virgin Islands. Tur esaki por crea e impresion cerca contrincante di Merca cu nos ta parti di tur accion Mericando den e region, incluyendo accion contra transporte di droga for di teritorio Venezolano den direccion di Merca, o cualkier substacion cu e mercancia ta pasa promer cu yega e destino final, cu ta e mercado inmenso cu Merca ta pa tur tipo di droga. Sin embargo, mester bisa cu tin – intento en todo caso – di colaboracion cu Venezuela tambe, bisiña ta keda bisiña, bao di cualkier regimen. Cu esey na mente, no mester cera wowo pa e realidad cu parti importante di transporte di droga ta sucediendo cu colaboracion y participacion di e regimen Venezolano. Gobierno Venezolano mes tambe recientemente a haci un yamado riba autoridadnan Hulandes pa coopera den combatimento di transporte di droga. Conociendo e otro banda di cara Venezolano no ta kita e responsabilidad di Reino pa colabora cu e bisiña, sin ignora e otro wega cu ta tumando lugar, cu ta exactamente loke supuestamente hunto mester combati. Esey ta e mundo cu nos ta biba aden.

Pero, pa pone e actual situacion bon cla: nos no sa tampoco e partinan scondi di politica di gobierno Mericano, cu bien por ta buscando algo mas cu simplemente obstaculiza transporte di droga for di costa Venezolano. Laga nos bisa di biaha loke nos ta kere cu e no ta. No ta trata en absoluto di un invasion riba teritorio Venezolano, y esey pa varios motibo. Uno ta cu e gobierno Mericano aki en particular ta mantene un politica di no pone ‘boots on the ground’ na otro pais. Claro cu mester wak ta cuanto valor esey tin, dia yega na haci esey toch, pero por lo pronto esey ta e maneho. Ademas mester corda cu un invasion ta un operacion supercostoso, posiblemente tambe den bida humano Mericano, anto esaki no ta parce un opcion por lo pronto. Pero, tambe e regimen Venezolano ta fiel aliado di e regimen di presidente Putin di Rusia, cu tin un lugar special den curazon di Donald Trump. Un motibo mas pa descarta un operacion militar riba tera mes, por lo pronto.

Otro punto pa tuma na consideracion ta e responsabilidad y derechonan cu Reino Hulandes tin den region di Caribe. Manera por mira riba e mapa di nos region den un articulo den e edicion aki, e zonanan exclusivo a base di e teritorionan ta chikito den hanchura pero keto bay di 200 miya largo,asina mes ainda un parti menor di lama di Caribe. Reino ta obliga anto tambe pa colabora cu otronan, sino vigilancia di e area tin poco sentido. Pero e complicacion actualmente ta cu regimen Venezolano a opta pa haci e peninsula di Paraguana su base di operacion prioritarioden sentido militar, pero tambe di base di operacion pa e cartelnan di droga. Esaki ta complica asunto pa Reino Hulandes, cu specialmente banda di Aruba tin awa teritorial cu mester comparti cu Venezuela, pasobra e hanchura di lama no ta duna pa dos extension di awa teritorial banda di otro (di 12 miya nautico). E realidad aki ta haci cu e operacion Mericano por bay concentra riba e parti unda tin mas actividad di transporte for di costa Venezolano y esey taexactamente den nos vecindario, for di costa di Paraguana. Esaki naturalmente por cambia, pero nos no mester ta sorprendi ora actividad militar cuminza tuma lugar cerca di nos.

Un pregunta cu por surgi awor aki ta: kico nos propio gobierno por/mester haci? Na promer lugar colabora den loke Reino Hulandes mester pa defende y proteha e propio teritorio. Esey ta inclui e vigilancia na Aruba mes pa dos tipo di peligro. Uno ta e infiltracion di red di informacion y colaboracion di narcotrafico, cu por inclui tanto ciudadano local como stranhero. Tambe esaki por bay man den man cu infltracion politico indesea. Awor, pa nos ta bon cla: nos no mester y no por sa tampoco kico gobierno via e instancianan apropia, ta haci pa ehecuta e tareanan aki. No tur cos ta pa publica, nos ta comprende esey. Sin embargo, nos no ta desea di keda confronta cu otro caso manera esun di ‘El Pollo’Carvajal, busca internacionalmente pa narcotrafico, cu practicamente tabata drenta sali di Aruba, cu posible colaboracion di autoridad, te dia autoridad Mericano a haya ta basta y a solicita su aresto, loke a tuma lugar tambe. Despues tabata turno na gobierno Hulandes pa pifia y a laga Carvajal den libertad, despues cu huez a aproba su deportacion caba.Estado di derecho, no?Nos no mester y no por ta na altura con gobierno di Reino y nos gobierno ta actua den e situacion delicado aki, pero nan mester por a duna mas informacion cu loke e keda divulga te awor.