Ayera riba su pagina di Facebook, Defensa Region Caribe a comparti algun potret di diesseis militar di Aruba y Corsou cu a completa exitosamente e curso Hulandes, Leergang Management Vorming, y pa esaki a ricibi nan certificado na marinekazerne Suffisant.
E curso tabata destina pa personal militar cu ta tumando e stap den direccion di agentenan no-comisiona den training pa bira un corporal. Durante e programa, e soldadnan a studia diferente estilo di liderazgo y a descubri cua estilo ta pas miho cu nan propio personalidad y estilo di lidera. E conocemento y habilidadnan cu nan a adkiri ta forma un fundeshi importante pa e training pa corporal, cu ta bay cuminsa awe dialuna.
Cu e certificado aki den man, e diesseis soldad ta miho prepara pa nan rol nobo como lidernan futuro dentro di forsanan arma. E curso ta contribui na e profesionalisacion di soldadnan Caribense, un ambicion importante di Defensa den Region Caribe.
