Tratamento di presupuesto complementario a continua ayera den Parlamento di Aruba. Desde diaranson ultimo Parlamento di Aruba ta tratando e prome cambio di presupuesto nacional 2025. Cantidad di preguntanan di parlamentarionan di tanto oposicion como coalicion a alarga e proceso di tratamento, pero despues di tres reunion publico, ayera nochi pa alrededor despues di 9or di anochi, Parlamento di Aruba a pasa over pa votacion.

Manera ta conoci ya pa algun dia caba Parlamento di Aruba ta den e proceso di tratamento di presupuesto complementario. Ayera tabata e di tres reunion publico pa esaki y ministernan di Gabinete AVP-FUTURO a ricibi un cantidad di preguntanan di parlamentarionan di oposicion, pero tambe di fraccionnan di coalicion.

Lider di fraccion MEP parlamentario Evelyn Wever-Croes a trece dilanti diferente topico. Un di nan ta e maneho di biahenan oficial di ministernan y a dirigi pregunta na prome minister Mike Eman. Parlamentario Wever-Croes a referi na pagina 19 di e acuerdo di gobernacion di Gabinete AVP-FUTURO y a puntra prome minister Eman con e ta evalua si e peticion pa biahe ta eficiente. Alabes a pidi minister di Finanzas Geoffrey Wever por pone disponibel facturanan di e biahenan

Pa loke ta e maneho di personal di gobierno, e parlamentario a toca e tema di antecedentenan penal den e maneho di gobierno. El a splica cu un exigencia cu tin ta cu tur hende cu solicita pa haya un trabou, gobierno mester check e antecedentenan penal. El a indica cu el a haci e pregunta na varios ocasion y contesta cu el a ricibi a confirma na su persona locual el a bisa, cu gobierno no ta aplicando e maneho aki.

Fraccion MEP tambe a haci preguntanan pa mira e nivelnan di salario di e personal di e ministernan ya cu segun e parlamentario informacion cu nan ricibi, y a base di documentonan cu minister Wever a entrega siman pasa, ta indica cu salarionan di coordinadornan ta enormemente halto.

Parlamentario Wever-Croes a pidi prome minister Eman pa confirma of nenga si tur e nombramento cu a haya un conseho positivo for di DRH pasobra e parlamentario no ta kere cu nan ta conforme e BRA.

Parlamentario Edgar Vrolijk a entrega dos mocion. Den e prome mocion e parlamentario ta pidi pa introduci un structura salarial nobo pa maestronan, y den e di dos mocion e ta propone

elimina e fiansa di estudio pa e studiantenan yiu di tera cu caba nan estudio.

Parlamentario Rocco Tjon a toca e tema di e cobransa cu personanan cu limitacionnan lo ricibi. El a indica cu despues di a haci hopi pregunta por escrito y durante tratamento di presupuesto complementario riba e tema specifico aki, minister di Asuntonan Social Mervin Wyatt-Ras a confirma cu lo ehecuta y respeta decision di Gabinete Wever-Croes y no lo cobra personanan cu limitacion placa back.

E parlamentario a trece e topico aki dilanti despues cu e aña aki cierto persona cu limitacion y famianan tabata ricibi carta den cual ta indica cu nan mester paga un suma back.

Pa loke ta trata fraccion PPA, lider di fraccion parlamentario Otmar Oduber a bolbe entrega un amienda pa por pone 5 miyon florin disponibel na e 10 centronan di bario rond di Aruba y ta boga pa pone 10 miyon florin disponibel pa cuida y controla Aruba su frontera.

Den e amienda e fraccion tambe ta boga pa inverti den aumento di personal den forma di agente di Cuerpo Policial Aruba (KPA) y baha e presion cu e agentenan policial tin, ya ta indica cu mirando e trabounan di mantencion necesario na e edificio di KIA, e fraccion ta haya importante pa inverti adicionalmente 500 mil florin.

Ademas fraccion PPA ta indica cu ta deseabel pa reserva fondonan di 500 mil florin pa financia e programanan di training y resocialisacion pa e presonan, cu e meta pa promove nan reintegracion den sociedad.

Pa loke ta fraccion AVP, lider di fraccion parlamentario Jennifer Arends-Reyes tambe a entrega dos mocion durante e tratamento di presupuesto complementario. Un di nan ta busca pa resguarda bida di un y tur na lama y implementa un sistema di lifeguard na tur e playanan mas popular di Aruba. El a indica cu lo entrega un rapport riba e esaki dentro di tres luna y a urgi gobierno pa implementa esaki na comienso di aña 2026.

E otro amienda entrega pa parlamentario Arends-Reyes ta pa regula e sector di short term vacation rentals. Den esaki e parlamentario ta urgi pa implementacion di e regulacion pa e sector aki mirando e impacto cu esaki tin riba isla, riba entrada di pais Aruba y sobretodo riba e sector hotelero.

Lider di fraccion Futuro parlamentario Gino Goeloe durante su disertacion a enfoca riba tur loke Gabinete AVP-Futuro a duna bek na pueblo durante e prome 5 lunanan di gobernacion. Ademas di esaki e parlamentario a trece dilanti e necesidad di inversion den barionan di FCCA, den DVG, den scolnan saludabel y e sector di cuido.

Parlamentario Muzanin Wever a trece dilanti e necesidad pa mehoracion di infrastructura y a indica, relaciona na e mocion di parlamentario Edgard Vrolijk pa implementacion di un structura salarial nobo pa e maestronan, el a puntra si ta bay inclui un parti pa cuido di e maestronan. Tambe a trece dilanti e tema di cacho y pushinan riba caya, fondonan pa campaña di sterilisacion di bestia y fundacionnan cu ta yuda cu e problematica di esaki.

Pa loke ta e votacion pa e mocionnan presenta, mocionnan di fraccionnan MEP y PPA a ser desaproba mientras cu e mocionnan presenta pa fraccionnan AVP y Futuro a ser aproba. Te na ciere di nos edicion Parlamento di Aruba no a yega na e votacion riba presupuesto complementario 2025.