Den medionan di comunicacion local ayera a circula informacion indicando cu Corte Comun di Husticia a duna un sentencia parcialmente na fabor di ex-minister di Enseñansa y Deporte, Endy Croes (MEP) den un caso cu e ex-mandatario a entama contra noticiero 24ora. Corte a duna ordo pa e website rectifica algun ponencia den su articulo tocante e mandatario.
Tabata dia 12 di augustus ultimo cu Corte a duna un veredicto den e caso di Croes contra 24ora, pa un articulo den cual a noticiero a bisa cu Croes y su famia a enrikece nan mes cu placa di Fundacion Lotto pa Deporte.
Segun e veredicto, e acusacion aki ta factualmente incorecto, y ta daña honor y reputacion di Croes. Pa e motibo aki, corte a duna ordo na 24ora pa publica un rectificacion riba su website dentro di un luna. E rectificacion mester declara cu nunca Croes a keda condena criminalmente, y cu proceduranan civil anterior no a establece cu Croes ni su famia a enrikece nan mes.
E caso ta bay back na 2010, tempo cu Croes, director general di Fundacion Lotto pa Deporte, a haya retiro pa medio di un decreto di hues basa riba un rapport di investigacion di accountants Ernst & Young Aruba (EY) alegando iregularidadnan financiero. Pa sanea su nomber Croes ta entama na 2015 un caso contra EY pa actonan ilegal, cual demanda ta ser otorga den Corte di Apelacion na 2018. Ta keda constata cu durante e investigacion a comete fayonan, entre otro door di no atene na e procedura di scucha tur dos banda.
A pesar cu e veredicto tambe a ser ratifica den Corte di Casacion, EY a keda mantene su posicion tras di e contenido di su rapport.
Aña pasa caba tabatin sentencia di hues den e caso unda Croes a expresa obhecion contra e ponencianan di 24ora den articulo publica entre april y mei di 2024, bisando cu a keda proba legalmente cu Croes y su famia a enrikece cu placa di Fundacion Lotto pa Deporte. Den e caso aki a considera importante cu ningun corte a yega di duna veredicto cu ni Croes ni su famia a enrikece nan mes personalmente, mientras cu dia 22 di april 2024, 24ora.com a publica cu proceduranan di apelacion y casacion a “proba legalmente” cu Croes y su famia a enrikece cu placa di e fundacion. Sinembargo, den e veredicto di 12 di juni 2024, no a duna orden na e noticiero pa rectifica, pasobra hues a considera cu e declaracionnan tabata “impreciso” pero no tabata “falso of ilegal” di un manera cu ta rekeri rectificacion.
Pero segun medionan local a reporta, e luna aki sentencia di hues ta duna ordo pa haci e coreccion toch pa e declaracionnan contra e actual parlamentario di MEP.
