Durante tratamento di presupuesto complementario 2025 recientemente fraccion MEP a entrega un mocion pa implementa un structura di salario nobo pa maestro cu lo conduci na un aumento di salario pa un porcentahe halto di maestro. E mocion aki a ser desapobra pa falta di apoyo di parti di fraccionnan di coalicion, AVP y FUTURO.

Parlamentario di fraccion MEP, Dangui Oduber a publica e mocion riba su pagina oficial di Facebook indicando cu aunke e mocion aki no a ser aproba, nan lo sigui traha pa e maestronan ricibi e aumento cu nan merece. Bon Dia Aruba a tuma contacto cu parlamentario Oduber pa realisa algun pregunta relaciona na e mocion aki.

Den e mocion di fraccion MEP, entrega pa parlamentario Edgard Vrolijk, ta splica cu desde 2017 tin na Parlamento e ontwerp-landsverordening functiehuis onderwijspersoneel (concepto di ordenansa nacional riba e clasificacion di trabou di personal di enseñansa) pa maestronan, cu no a ser trata ainda pa motibonan di complicacion den ehecucion y falta di fondonan. Tampoco no tabatin un bista cla di futuro pa su impacto riba pais Aruba.

Na april di 2018 Parlamento di Aruba a aproba e mocion IS/17-18/727, na unda cu Parlamento a urgi gobierno pa mientras ta implementa un solucion structural pa salario di maestronan, pa amplia e tasa di edad pa maestronan di 38 aña pa 46 aña.

Segun e mocion ta indica, ex-minister di Enseñansa, Endy Croes, a cuminsa na aña 2023 un proceso nobo pa traha riba salario di docentenan, pero e implementacion di esaki no a ser formalisa pa motibo di cambio di gobernacion.

Segun e parlamentario di MEP ta indica den e mocion, gobierno anterior a aloca e fondonan necesario pa haci esaki posibel, pero e minister actual di Enseñansa, Gerlien Croes, a dicidi pa no formalisa e proceso di 2023 di ex-minister y a institui un comision nobo pa un posibel structura salarial nobo.

Den e mocion ta sigui splica cu alargando e implementacion di un structura salarial den pasado a perhudica caba un grupo grandi di docentenan cu ya a bay cu pensioen wardando esaki y alargando e proceso un biaha mas e proceso aki lo perhudica docentenan actual cu a supera e edad di 38 aña den e oportunidad husto di por mehora nan salario.

E mocion ta enfatisa cu e aumento di 38 aña pa 46 aña ta duna maestro mas siguransa riba un structura salarial fiho, mientras tanto, den cuadro di e functiehuis (cas di funcion) y e proposicionnan di ex-minister di Enseñansa na 2023. Ademas, parlamentario ta agrega den e mocion, considerando tambe cu e indexering recien di 11,7% y cu hopi docente a yega su plafond den functiehuis, e opcion di 2023 ta keda un alternativa factibel y realistico pa asina e salario di docente por sigui crece na un manera structural.

Por ultimo ta enfatisa cu den bista cu situacion financiero di pais Aruba den 2025 y siguiente añanan tin suficiente espacio financiero pa ehecuta un aumento salarial di maestronan unda ta aumenta e edad di 38 pa 46 aña pa nan plafond salarial. Alabes MEP ta urgi gobierno pa entrante 1 di januari 2026 e maestronan por tin un speransa realistico cu nan lo ricibi un aumento salarial despues di 38 aña.

E preguntanan cu Bon Dia Aruba a manda parlamentario Dangui Oduber di fraccion MEP ta directamente relaciona na e mocion aki. Primeramente a puntra Oduber, mirando cu tin algun persona ta bisa cu Gabinete Wever-Croes no a yuda e maestronan durante nan tempo na mando, y awor ta entrega un mocion pa esaki, si e por elabora riba esaki; a puntra tambe di unda e fondo lo mester sali pa ehecuta e cambio aki; kico ta e motibo cu AVP y Futuro a rechasa e mocion; y si cu e cambio di structura di salario ta spera cu por yuda alivia e problema di escasez di maestro cu tin.

Den su contesta parlamentario Oduber a splica cu Gabinete Wever-Croes a percura pa forma un comision cu a haci un estudio y prepara diferente scenario pa asina percura pa un mihor structura di salario, cual e gabinete a laga atras cla pa ehecuta.

El a sigui splica cu tambe nan a percura pa crea e espacio financiero necesario pa por realisa esaki. “Lagando 500 miyon florin atras di surplus nos ta convenci cu tin suficiente espacio pa cambia e structura di salario na uno mas husto,” el a enfatisa.

Tocante kico ta e motibo cu fraccionnan di coalicion AVP y Futuro a rechasa, el a splica cu nan a rechasa e mocion pasobra nan kier pa institui nan propio comision y kier cuminsa henter e trabou di nobo, cual el a subraya no ta necesario.

No ta un secreto cu Aruba tin escasez di maestro. Contestando e pregunta si e cambio di strcutrua cu MEP a propone den nan mocion lo yuda alivia e problema di escasez, parlamentario Oduber a indica cu no tin ningun incentivo pa atrae maestronan nobo, ni tampoco incentivo pa mantene esunnan actual motiva. Pa motibo e ta sigura cu e cambio proponi lo yuda crea e incentivonan nobo aki.

Durante un conferencia di prensa recien minister di Enseñansa Gerlien Croes a trece dilanti e tema di escasez di docente y a splica cu e reto pa atrae docente den e veld no ta algo cu ta conoci como un reto awor, e ta un reto pa hopi aña caba cu mester di solucion.

“Mi ta kere e incentiva necesario y e reconocemento necesario di e trabounan di nos maestronan ta hunga un rol hopi grandi pa atrae nan pa haci e trabou aki. E veld aki ta carga tur cos pa nos, ora cu bo wak cu pa tanto aña docentenan a boga berdad pa nan ser recompensa debidamente salarialmente pero no a logra ainda, esey tambe ta un desapunto pa nan,” el a indica.

El a remarca cu ta importante pa haci e estudio pa docente atractivo y pa inverti den dje. No ta na Aruba so, Hulanda tambe tin reto pa haya docente. Ta conoci pa basta aña cu Aruba ta duna dispensatie pa docentenan cu yega edad di pensioen pa toch nan sigui yuda nos. Ta duna tin biaha depende e tipo di opleiding y e ekipahe cu persona ta bin cune, cu toch e por duna tambe tin biaha dispensacion.

“Nos tin hopi pa haci y tin hopi pa atende cune pasobra nos mester atende cu esaki pa por flexibilisa e peso laboral di e docentenan tambe cu nan ta hay’e atractivo pa bay den e veld,” minister Croes a enfatisa.