Diaranson mainta, Minister di Husticia mr. drs. Arthur Dowers (AVP) a duna un declaracion relaciona cu e insinuacion cu presidente di Sindicato di Polis (SPA), Rodney Solognier a haci pa locual ta trata e relacion cu tin actualmente entre Minister di Husticia y e sindicato SPA.

Den un comunicado dirigi na miembronan di e sindicato, Solognier a duna di conoce cu tin un falta di interes y cooperacion di parti Minister di Husticia, cu ta nenga di sinta cu nan na mesa y cu pa e motibo aki, diferente proceso pendiente ta pega.

Basa riba e puntonan aki, e presidente di sindicato ta yama un Algemene Ledenvergadering cu tur miembro di SPA, pa asina por haya tende di nan, como tambe informa riba restructuracion den Cuerpo Policial, unabes cu Minister di Husticia haci su cambionan necesario.

Minister Dowers ta lamenta informacion incorecto cu e presidente di SPA ta suministra publicamente. E relacion cu Cuerpo Policial ta uno semper habri y den bon colaboracion cu otro. No solamente sindicato, pero cualkier miembro policial cu tin pregunta, peticion of tin cu atende cu un of otro asunto, por tuma contacto y ta keda atendi door di e personal encarga of apunta den e direccion cu mester cana, of ta sinta cu e minister mes si ta necesario.

“Locual ta sigur, cu nunca a nenga di scucha un hende, y esaki ta conta pa e sindicato tambe”.

Minister Arthur Dowers a indica cu durante su ausencia den exterior e sindicato a tuma contacto pa un reunion atrobe, caminda a informa nan cu na su regreso lo verifica fecha di reunion. Na su yegada a atende cu Presupuesto Complementario y den e dianan aki a reanuda su agenda pa asina inicia cu e peticionnan cu a keda pendiente.

Segun e mandatario di husticia, ora a busca pa sa mas cerca un otro miembro riba e comunicado aki, e miembro di SPA a indica cu mas bien nan ta pendiente pa haya un fecha pa por reuni cu minister. Ademas a informa e miembronan cu nan por manda e puntonan di agenda pa asina por prepara pa e reunion na momento cu haya fecha pa esaki.

Minister Arthur Dowers ta bolbe reitera cu absolutamente no ta berdad cu no tin un bon comunicacion cu SPA, ni tampoco cu KPA. Lamentablemente e lider sindical ta scoge un ruta publico pa trece discordia, enbes di tuma contacto directo cu su bureau of cu su persona.