Diahuebs ultimo durante un conferencia di prensa miembro di fraccion MEP parlamentario Shailiny Tromp-Lee a elabora riba e topico di cambio di ley pa introduci un minimumuurloon (salario minimo pa ora). Diaranson Parlamento di Aruba inicia tratamento di e cambio di ley aki, pero presidente di parlamento a schors e reunion. Awe mainta parlamento ta continua cu e tratamento.

Parlamentario Tromp-Lee a splica cu e ley pa introduci minimumuurloon a ser entrega na Parlamento di Aruba desde 12 di november 2024 y tabata cla pa parlamento debati riba dje desde 29 di november 2024 cu e meta pa e cambio di ley drenta na vigor entrante 1 di januari 2025. Pero esaki no a sucede.

El a sigui splica cu fraccion MEP a manda tres carta pa presidente di Parlamento pidiendo pa e reunion aki pero esey no a concretisa, te cu e presidente actual di parlamento a dicidi di yama e reunion. E reunion a cuminsa diaranson, pero a ser posponi y e tratamento lo continua awe den sala di parlamento.

Pa loke ta e ley mes, kico e ta encera y e motibo pakico e ta importante, Tromp-Lee a splica cu e ley nobo aki ta “trek recht” algo cu pa hopi aña no tabata bon, un situacion caminda tin hendenan cu ta traha mas cu 40 ora pa siman y ta gana e mesun salario minimo cu un persona cu ta traha e normal 40 ora pa siman. “Esey den liñanan grandi ta e punto crucial di e cambio y esaki ta bay traduci su mes den aumento pa nos hendenan,”el a remarca.

Parlamentario Tromp-Lee a sigui splica cu e ley cu tin actualmente ta inhusto. El a indica cu den e ley actual por e salario minimo cu e empleadonan ta gana pa ora y kico ta e diferencia basa riba e cantidad di ora cu cada persona ta traha. El a splica cu un persona cu ta traha 40 ora pa siman ta gana un salario minimo pa ora di Afl.11,58, mientras cu esun cu ta traha 45 ora pa siman ta gana solamente Afl.10,29.

“Esey ta e situacion actual, mas bo traha menos bo ta gana pa ora. Algo cu mi ta kere tur hende lo ta di acuerdo cu nos cu ta un discrepancia, un inhusticia y cu tin cu percura pa pago igual tuma luga aki na Aruba tambe,” el a enfatisa.

Tromp-Lee a indica cu e ley nobo ta propone introduccion di un salario minimo pa ora na luga di un salario minimo mensual, locual el a subraya lo nifica un aumento pa persona den mercado laboral.

El a splica cu ta bay tin un aumento pa esnan cu ta traha 40 ora pa siman tambe pasobra como parti di e cambio di ley aki tambe ta tuma luga un coreccion. El a sigui splica cu e factor cu tabata ser usa pa calcula e salario mensual tabatin un fout den dje, y e cambio di ley aki ta conduci na cu esnan cu ta traha 40 ora tambe ta bay tin un aumento.

El a indica cu pa e grupo aki e aumento no ta substancial, e ta un aumento di Afl. 20,85 pa luna. El a señala cu e aumento cu lo haci un diferencia y cu lo trece husticia den pago back ta pa esnan cu ta traha mas cu 40 ora pa siman. El a splica cu esnan cu ta traha 42 ora pa siman ta bay conoce un aumento anual di Afl. 1.454,40, y esnan cu ta traha 45 ora pa siman ta bay conoce un aumento anual di Afl. 3,260,75, cual ta un aumento mensual di Afl. 271.73.

“Esey ta loke e ley ta bay significa pa e cartera di esnan cu ta ganando salario minimo na e momentonan aki. Ta un trayecto largo a tuma luga cu a culmina den presentacion di e concepto di cambio di ley aki y mi ta spera y urgi tur mi coleganan den sala di parlamento pa dialuna nos aproba e ley aki y trek recht algo cu pa hopi aña ta krom,” el a enfatisa.

Parlamentario Tromp-Lee a agrega cu den e concepto cu a keda presenta, tambe nan a presenta e introduccion di un salario minimo pa hoben. El a splica cu na e momento aki e categoria di hobennan di 15 pa 17 aña no ta gosando di un proteccion pa loke ta trata pago. Esaki, el a indica, ta pasobra cu no obstante cu den e ley actual tin e posibilidad pa mediante un landsbesluit fiha un salario minimo pa e grupo aki, ningun gobierno a percura pa saca e landsbesluit aki y fiha e proteccion pa e hobennan. E parlamentario a planta esaki na Parlamento mediante un amienda y ta spera cu esaki tambe lo keda aproba.

“Aprobando esaki no solamente ta termina cu pago desigual cu ta existi na e momentonan aki, pero tambe ta cumpli cu tratadonan internacional manera di ILO y tambe e parti di SDG’s,” el a subraya.