(AP) — President Mericano, Donald Trump a bisa awe cu Merca a ehecuta un atake den sur di Caribe contra un barco transportando droga cu a sali for di Venezuela.
E presidente no a duna mas detaye tocante e operacion.
Secretario di Estado Mericano, Marco Rubio a bisa riba X cu e barco tabata siendo opera pa un “organisacion narco-terorista designa.”
“Manera @potus [Presidente Mericano] a anuncia algun momento atras, awe ehercito Mericano a ehecuta un atake letal den sur di Caribe contra un barco di droga cu a sali di Venezuela y tabata siendo opera pa un organisacion narco-terorista designa,” Rubio a bisa den su post cortico.
Oficina di prensa di gobierno Venezolano no a responde inmediatamente na un solicitud pa comentario riba e anuncio.
Maduro: “Venezuela ta prepara pa responde”
E desaroyo aki a yega despues cu dialuna ultimo, presidente Venezolano, Nicolas Maduro a bisa cu su pais ta na “preparacion maximo” y cla pa responde si forsanan cu gobierno Mericano a desplega den Caribe ataca nan.
Su comentarionan durante un conferencia di prensa ta yega mientras gobierno Mericano ta programa pa e siman aki reforsa su forsa maritimo den awanan cerca di Venezuela pa combati menasa di cartel di droga Latino Americano. Merca no a indica ningun plan pa un incursion terestre di e miles di personal siendo desplega. Asina mes, gobierno di Maduro a responde desplegando tropa na su costa y frontera cu bisiña Colombia, como tambe urgiendo Venezolanonan pa alista den un milicia civil.
“Dilanti e presion militar maximo aki, nos a declara preparacion maximo pa defensa di Venezuela,” Maduro a bisa tocante e despliegue, cual el a caracterisa como “un menasa extravagante, inhustificable, inmoral y absolutamente criminal y sangriento.”
Maduro a bisa cu e lo declara constitucionalmente un “republica arma” si Merca Ataca Venezuela. E no a elabora.
Gobierno Mericano awo tin dos Aegis guided-missile destoryers – USS Gravely y USS Jason Dunham – den Caribe, como tambe e destroyer USS Sampson y e cruiser USS Lake Erie den awanan cerca di Latino America. E presencia militar aki ta programa pa expande.
Tres barco di atake anfibio – un forsa cu ta inclui mas di 4mil nabegante y marinier – lo ta drentando e region e siman aki, un oficial di defensa a bisa AP.
E despliegue ta yega mientras presidente Trump a pusha pa usa ehercito pa combati cartelnan cu e ta culpa pa e fluho di fentanilo y otro droga ilicito den comunidadnan Mericano y perpetuando violencia na algun ciudad di Merca.
Dialuna, minister di Exterior Venezolano, Yvan Gil, citando un rapport di Nacionnan Uni, a bisa su contrapartinan na varios pais Latino Americano cu e despliegue di forsanan maritimo Mericano ta construi riba un “narativa falso” mientras 87 porciento di cocaina produci na Colombia ta sali door di Pacifico y traficantenan ta purba move apenas 5 porciento di nan producto door di Venezuela. Bolivia – y Colombia, cu tin acceso na Pacifico y Caribe, ta e productornan top di cocaina na mundo.
Gil a agrega cu e narativa “ta menasa henter e region” y un atake contra Venezuela “realmente lo nifica desestabilisacion completo di e region.”
“Laga nos exigi inmediatamente un fin na e despliegue aki, cu no tin otro motibo cu menasa un pueblo soberano,” el a agrega durante un reunion virtual di miembronan di grupo regional Comunidad di Estadonan Latino Americano y Caribense.
Maduro tambe a usa su conferencia di prensa pa insisti cu e ta e ganador legitimo di eleccion presidencial aña pasa. Maduro, huramenta pa un di tres termino di seis aña na januari, a agrega cu su gobierno ta mantene dos linea di comunicacion cu administracion di Trump, un cu Departamento di Estado y otro cu enviado di Trump pa mision special, Richard Grenell. El a yama Secretario di Estado Rubio “señor de la guerra” pushando pa accion den Caribe pa baha gobierno Venezolano.
Dialuna Maduro a adverti cu accion militar di Merca contra Venezuela lo “mancha” Trump su “mannan cu sanger”.
“Presidente Donald Trump, e buskeda di cambio di regimen ta exhausto; el a fracasa como politica mundialmente,” Maduro a bisa. “Bo no por pretende di impone un situacion na Venezuela.”
