E proposicion di Ley di Reino cu a keda entrega recientemente na Conseho di Minister di Reino ta regula e normanan pa logra y mantene finanzas publico sostenibel pa Aruba y e supervision financiero cu ta bin hunto cune di banda di Conseho di Minister di Reino.

Mester lesa e proposicion aki mester den combinacion cu e Landsverordening Waarborging Houdbare Overheidsfinanciën (LWHO), cu ta regula e cuantificacion di e normanan. LWHO lo drenta den vigor hunto cu e Rijkswet aki. Pa medio di e Landsverordening Aruba Tijdelijk Financieel Toezicht (LAft) a introduci supervision financiero riba e presupuestonan di Aruba den aña 2015. Cu e aplicacion di e Ley di Reino aki y di LWHO, e LAFT lo ser anula.

E punto di salida di Statuut pa Reino Hulandes ta cu cada pais den Reino mes ta responsabel pa bon gobernacion. Supervision manera regula den e Ley di Reino aki ta basa riba articulo 38-2 di Statuut, precisamente pasobra finanzas publico y maneho financiero ta un asunto di cada pais. Aruba y Hulanda ta di acuerdo cu e supervision aki ta temporario y cu na un cierto momento e lo yega su fin.

For di 2015 e LAFT a forma e base legal pa Colegio di Supervision Financiero pa Aruba (CAft). A base di e Ley di Reino ak,i CAft tambe lo duna un evaluacion riba e presupuesto, rapport di ehecucion y cuentanan anual di Aruba segun e normanan di supervision. Ademas, CAft tin e competencia pa informa Conseho di Minister di Reino tocante riesgonan cu tin cu sostenibilidad di finanzas publico di Aruba. Finalmente, Caft tin un rol di consehero pa Conseho di Minister di Reino. Esaki ta encera cu CAft. lo emiti conseho tocante cumplimento di e normanan pa supervision financiero di parti di Aruba.

Den e proposicion aki a eligi conscientemente pa inclui momentonan di consulta entre Aruba, Hulanda y CAft den proceso di evaluacion di presupuesto. E dialogonan aki tin como meta pa preveni cu CAft ta conseha Conseho di Minister pa duna un “aanwijzing”. Aruba y Hulanda ta kere cu esaki ta un oportunidad pa haya un solucion na traves di consulta pa defectonan cu CAft a detecta. E supervision financiero manera inclui den e Ley di Reino aki lo keda anula ora cu Aruba cumpli cu e condicionnan pa e Ley di Reino aki. Den cinco aña despues di entrada na vigor di e Ley di Reino aki – y despues periodicamente – lo evalua e funcionamento di e ley den practica.

Dia 4 di juni 2024, Aruba y Hulanda a firma e “acuerdo administrativo Aruba-Nederland Rijkswet houdbare overheidsfinanciën” (acuerdo administrativo ). Den cual entre otro a acorda e creacion di un Ley di Reino di consenso nobo cu e meta pa logra y mantene finanzas sostenibel di gobierno pa Aruba. Un parti di e acuerdo aki ta cu e ley di Reino nobo lo contene un cuadro di normanan cu regla di presupuesto cu ta contribui na finanzas publico sostenibel duradero y asina tambe na un desaroyo socio-economico structuralmente saludabel, cu espacio pa politica presupuestario anticiclico. Tambe a acorda cu e posicion CAft lo keda manteni y cu e proposicion bieu pa Rijkswet Aruba financieel toezicht lo keda anula.

Un parti di e prestamonan exterior di Aruba lo ser refinancia y e cuantificacion di e normanan di presupuesto lo ser fiha den ley mes di Aruba. Pa yega na e normanan di presupuesto nobo, a pidi asistencia di Fondo Monetario Internacional (IMF) pa duna conseho basa riba situacion actual y un pronostico di e situacion futuro di Aruba. Tambe a acorda cu e LWHO solamente por ser estableci of cambia cu consentimento di Conseho di Minister di Reino.

Un Ley di Reino di Consenso manera intenciona den e acuerdo administrativo solamente por bira realidad cu participacion di Aruba y Hulanda. Direct despues di firma di e acuerdo administrativo , e dos pais a forma teamnan cu for di principio a traha hunto riba e ley. A traves di reunionnan semanal – digital y fisico – e ley aki a surgi cu un paternidad comparti.

Prome cu e acuerdo administrativo tabatin diferente momentonan (2013, 2015 y 2018) cu Aruba y Hulanda a yega na acuerdo den forma di protocol. Den e acuerdo administrativo a acorda cu e parti di Protocol 2013 y Protocol 2015 cual ta contene ley di Reino of landsverordening, lo mester ser anula. E partinan cu sobra di e protocolnan ta keda vigente, a menos cu Aruba y Hulanda ta acorda otro cos hunto. Un di e metanan principal di e dos protocol tabata pa establece un supervision independiente y structural riba finanzas publico di Aruba.

Protocol 2013
Dia 28 di maart 2013 Aruba y Hulanda a acorda e Uitvoeringsprotocol ex-Besluit Artikel IV-B di Samenwerkingsprotocol Aruba-Nederland (Protocol 2013), cu ta conoci tambe manera “Wittedonderdagakkoord”. Den e Protocol 2013, Aruba y Hulanda a acorda entre otro cos cu Hulanda lo evalua e posibilidadnan pa suscribi na un oferta publico di un prestamo di bonus pa Aruba si Aruba a cumpli cu e criterionan pa finanzas sostenibel di gobierno y capacidad di pago back aplicabel den Reino y internacionalmente. Riba esaki, e Ley di Reino aki ta premira den un posibilidad pa Aruba haya facilidad di prestamo di Hulanda.

Ademas, Aruba y Hulanda a acorda den Protocol 2013 cu e huicio riba finanzas publico di Aruba mester bin di rapportnan di instancianan independiente, y cu control riba finanzas publico lo ser haci pa Banco Central di Aruba, Algemene Rekenkamer Aruba y Raad van Advies di Aruba. Pa completa, a acorda cu e reglanan di presupuesto lo ser inclui den Staatsregeling di Aruba y cu un colegio permanente di conseho cu Aruba lo institui, lo ta responsabel pa cumplimento di e reglanan.

Den e sentido aki, e Ley di Reino aki, mescos cu e LAFT anterior, ta percura pa lanta e Hunta di Supervision Financiero di Aruba, kende tin e tarea primordial di evalua ehecucion di e relatonan presupuestario, y relatonan anual, incluyendo e jaarrekening, di pais Aruba. E regla di presupuesto general ta incorpora den e Ley di Reino aki y e cuantificacion di normanan den LWHO. Den e landsverordening lo ser defini tambe trabounan di e Begrotingskamer, un instancia local di Aruba cu lo ser instala den Raad van Advies di Aruba segun e Landsverordening Raad van Advies 2022.

Protocol 2015

Dia 2 di mei 2015, Aruba y Hulanda a acorda e “Afspraken tussen de regeringen van Aruba en Nederland over de openbare financiën van Aruba” (Protocol 2015). Un di e obhetivonan tabata evaluacion regular, realista y independiente di e presupuestonan di Aruba pa medio di un base formal adecua: LAFT.

E Protocol 2015 tabata referi na formacion di LAFT cu a drenta den vigor den 2015 y cu tabata contene e cuadro normativo legal pa evaluacion di e presupuestonan pa e Colegio y pa ehecucion di supervision financiero independiente pa Conseho di Minister di Reino. E LAFT a ser cambia den 2023, pasobra e Protocol 2018 cu tabata prolonga te cu 2023 a yega su fin, y tabatin riesgo di un “bashi” den e supervision. E cambio a drenta den vigor dia 1 di januari 2024 y a regula e normanan di presupuesto.

E ta referi tambe na e posibilidad di asistencia tecnico di Hulanda den area di belastingdienst, aduana, capacidad legislativo y maneho financiero. Pero segun e Protocol, Aruba tabata mester a haci uso di esaki prome cu 1 di augustus 2015, loke no a sucede, pues e punto aki a keda anula.

Y ta referi na e obligacion di Aruba pa tene un marco legal cu ta cumpli cu normanan internacionalmente acepta, entre otro tocante proceduranan pa benta of adkisicion di accion den entidadnan publico; guianan pa politica di dividendo di compania den cual Aruba ta parti; y procedura y exigencianan tocante nombramento y retiro di directivanan di entidadnan publico of semi-publico.

Protocol 2018D

Dia 22 di november 2018, Aruba y Hulanda a firma un protocol nobo: Samenwerkingsprotocol Aruba-Nederland 2019-2021 (Protocol 2018). E meta tabata pa crea un caminda pa finanzas publico solido, transparente y sostenibel.

Motivacion principal tabata pa re-confirma e acuerdonan di Protocol 2015 y pa establece normanan di presupuesto nobo pa 2019, 2020 y 2021. E normanan aki mester a ser inclui den articulo 14 di LAFT, pero e landsverordening no a ser presenta formalmente. A pesar di esaki, Aruba a aplica e norma y acuerdonan di e protocol, y ta notabel cu e normanan pa 2019 a ser cumpli.

Den maart 2020, cu COVID-19 a yega Aruba, situacion a cambia drasticamente. Gobierno di Aruba a mester tuma medidanan duro pa preveni propagacion di e virus, cu tabatin consecuencia grave pa economia y finanzas publico. A base di articulo 36 di Statuut, Hulanda a duna Aruba sosten financiero na forma di prestamo na tasa di 0%, localisando Afl. 915,5 miyon. Dia 10 di october 2023 e prestamonan aki a ser refinancia den un solo prestamo yama Covidlening.

Den contexto di e sosten financiero aki, mita di 2020 Hulanda a propone un Ley di Reino di Consenso pa regula e supervision financiero a base di articulo 38(2) di Statuut. E concepto tabata conoci manera Rijkswet Aruba financieel toezicht (RAft). A manda esaki pa tramite despues cu e gobiernonan a duna na aprobacion, pero e tratamento den Tweede Kamer a para pa falta di consenso. Na principio di 2022, e Protocol 2018 a ser prolonga pa dos aña. Entre tanto, pa evita un bashi den e supervision despues di 2023, Aruba cu consentimento di Conseho di Minister di Reino a cambia LAFT pa inclui normanan di presupuesto nobo, den su mayoria basa riba e RAft. E cambio a drenta den vigor dia 1 di januari 2024.