(AP) – Giorgio Armani, e diseñador iconico cu a converti e concepto di elegancia keto den un imperio di moda multi-biyonario, a fayece. E tabatin 91 aña.
Armani a fayece na cas, segun e cas di moda a comunica. Armani, un di e nombernan mas reconoci y cara di e industria di moda global no tabata presente na Milan Fashion Week den juni di 2025 pa prome biaha, pa recupera di un condicion di cual no a revela detaye.
E tabata den plan di un evento grandi pa celebra 50 aña di su cas di moda Giorgio Armani durante Milan Fashion Week e siman aki.
Armani, ken a mantene control riba su imperio y coleccionnan te final, tabatin duda di dialoga tocante un sucesor, pero a anuncia si un fundacion como un herment di sucesion pa evita cu lo separa su negoshinan.
Tambe el a indica cu e sucesion creativo lo cay den man di Leo Dell’Orco y su sobrina Silvana Armani, kendenan a lidera e coleccionnan di hende homber y hende muhe respectivamente, pa tur coleccion di Armani: Giorgio Armani, Emporio Armani y Armani Exchange.
Cuminsando un jacket, carson simple y colornan urbano, Armani a pone estilo cla-pa-bisti Italiano riba e mapa internacional di moda den fin di añanan 70, creando un silueta cu por reconoce instantaneamente y cu a impulsa e cas di moda pa mita di un siglo.
Por di oficina ehecutivo te na pantaya di Hollywood, Armani a bisti esnan rico y famoso den estilonan clasico. Su trahenan ‘black tie’ y shimisnan di gala hopi biaha tabata hala atencion den temporada di premiacion.
Na momento di su fayecimento, Armani a crea un imperio cu balor di mas di 10 biyon dollar, cual conhuntamente cu paña, ta inclui accesorio, mueble pa cas, perfume, cosmetico, buki, flor y te hasta chuculati, poniendo su persona den e 200 biyonarionan top segun Forbes.
E diseñador tambe tabata doño di varios bar, club, restaurant y su propio ekipo di basketball EA7 Emporio Armani Milan, miho conoci como Olympia Milano. Armani a habri mas di 20 restaurante for di Milan te Tokyo desde 1998, y dos hotel, un na Dubai y otro na Milan den 2010.
Naci dia 11 di juli 1934 na Piacenza, un pueblo chikito pa sur di Milan, Armani a zona cu bira un dokter prome cu el a haya un trabao part-time como un decorador di bentana na un tienda di Milan, cual a habri su wowo na e mundo di moda.
Den 1975, Armani y su partner Sergio Galeotti a bende nan Volkswagen pa cuminsa cu nan propio marca. Paña di hende muhe a bini un aña despues.
Awe, e imperio di Armani tin un ehercito di mas di 9.000 empleado, cu hende muhe formando mita di e posicionnan ehecutivo, conhuntamente cu 7 punto industrial y mas di 600 tienda na nivel mundial., segun cifranan publica den 2023.
Galeotti a fayece den 1985. Armani no tabatin yiu pero tabata hopi cercano na su sobrina Roberta, yiu di su difunto ruman homber Sergio. El a bandona un carera den pelicula pa bira su director di relacionnan publico y hopi biaha tabata representa su tio, ken no tabata gusta sali hopi, na eventonan social. Den añanan despues e tabata un conexion clave cu e mundo di celebridad.
