Manera ta conoci te ainda Gabinete AVP-FUTURO no a nombra un Minister Plenipotenciario pa representa Aruba na Hulanda. En conexion cu esaki recientemente parlamentario Endy Croes di fraccion MEP a entrega un mocion den cual nan ta pidi gobierno pa nombra Sra. Desiree Croes como Minister Plenipotenciario. Un mocion cu mayoria di fraccion AVP no a sostene, cu excepcion di parlamentario Mike de Meza.
Parlamentario Croes a splica cu pa motibo di loke a pasa recientemente relaciona cu e Rijkswet, ta importante pa gobierno nombra un Minister Plenipotenciario pronto. El a indica cu den Conseho di Minister di Reino ora cu discuti e proposicion di e Rijkswet no tabatin un representante di Aruba como Minister Plenipotenciario na Hulanda.
El a sigui splica cu considerando cu Conseho di Minister di Reino a vota pa e proposicion di Rijkswet sin cu tin consenso di Parlamento di Aruba, cu desde 28 di maart tin un gobierno cu a huramenta, ya ta drentando seis luna cu Aruba no tin un Minister Plenipotenciario, un hecho cu e parlamentario a remarca ta perhudica credibilidad di Gobierno di Aruba.
“Hustamente den e situacion actual ta rekeri di calidad urgente pa Aruba por tin un Minister Plenipotenciario, primordialmente awor cu ta atendiendo cu Rijkswet HOFA. E ausencia di un Minister Plenipotenciario ta perhudica e credibilidad di nos propio gobierno,” el a enfatisa.
Parlamentario Croes a splica cu recordando cu Gabinete AVP-FUTURO den proceso di formacion a propone na prome luga Sra. Desiree Croes pa asumi e puesto di Minister Plenipotenciario, den e mocion fraccion MEP ta pidi Gabinete AVP-FUTURO pa nombra Sra. Croes como e representante di Aruba na Hulanda inmediatamente.
El a señala cu Sra. Croes tin amplio experiencia como abogado, ex miembro di parlamento, ex director di Gabinete di Minister Plenipotenciario, pero durante e proceso di formacion no a logra concretisa su nombramento. Pa e motibo ey fraccion MEP a entrega e mocion na Parlamento di Aruba den cual ta pidi gobierno pa nombra Sra. Desiree Croes como Minister Plenipotenciario di Aruba na Hulanda y percura pa e huramenta lo antes posibel pa e asumi dicho funcion.
“Mi ta spera cu por conta cu e sosten pasobra e ta un necesidad pa e Rijkswet aki. No por ta asina cu bo ta tratando un ley asina importante, entregando nos autonomia. Nos ta urgi pa coalicion aproba e mocion aki, nombra Desiree Croes, lag’e representa nos na Hulanda y ohala nos por sali victorioso den e trayecto prome cu un Rijkswet asina malo ser aproba,” parlamentario Croes a remarca.
Durante su discurso di motivacion di voto, parlamentario di fraccion AVP Stephany Sevinger a indica cu e fraccion no lo sostene e mocion aki.
El a splica cu fraccion AVP tin hopi respet pa Sra. Desiree Croes y cu nan no ta duda den su capacidad pa fungi como Minister Plenipotenciario na Hulanda. “Tur hende ta consciente di su preparacion y dedicacion pa Aruba. Esaki no ta un punto cu nos lo debati,” el a remarca.
El agrega cu mescos cu su coleganan di e otro fraccion, nan tambe ta di opinion cu nombramento di un Minister Plenipotenciario lo mester tuma luga lo mas pronto posibel, pero alabes el a enfatisa cu esey ta un decision cu gobierno mester y por lo tanto parlamento lo mester respeta gobierno su derecho pa scoge e persona cu nan ta sinti ta capacita y cu ta loke nan lo kier pa fungi den e rol aki.
Na mesun momento parlamentario Sevinger a expresa cu e mocion aki ta un movemento politico cu e meta pa crea division. “Mi no por keda sin resalta cu esaki ta claramente un movemento politico cu fin di crea division y por lo tanto mi ta spera cu pueblo por tuma nota di con ta haci uso di parlamento pa hunga wega aki den. Debi na esaki fraccion di AVP ta contra di e mocion aki,” el a subraya.
A pesar cu Sevinger a indica cu fraccion AVP ta contra e mocion, un parlamentario di e fraccion, Sr. Mike de Meza a vota na fabor di esaki. E mocion a ricibi ocho voto na fabor, 11 contra y dos parlamentario, Otmar Oduber y Hendrick Tevreden cu a abstene di vota, cual ta nifica cu e mocion no a ser aproba.
Despues di retiro di Sr. Ady Thijsen como Minister Plenipotenciario, Gabinete AVP-FUTURO a nombra dos candidato oficial pa bira Minister Plenipotenciario, primeramente minister Rene Herde y despues parlamentario Jennifer Arends-Reyes, pero na final ningun di dos nombramento a ser concretisa y te dia di awe ainda no tin un Minister Plenipotenciario.
Prome cu a nombra actual minister Rene Herde como candidato paritdo AVP, durante proceso di formacion partido AVP a presenta Sra. Desriee Croes como nan candidato pa bira Minister Plenipotenciario, pero segun MEP mes a indica den un comunicado di prensa anterior, actual minister Gerlien Croes, e tempo ey como formador, a rechasa e candidato di AVP.
Despues di su huramentacion Gabinete AVP-FUTURO a nombra Sr. Rene Herde como e candidato oficial pa bira Minister Plenipotenciario. Pero esaki no a keda concretisa y Sr. Herde a ser nombra minister di Infrastructura, Energia y Telecomunicacion na luga di parlamentario Mike de Meza. Esaki, medionan di comunicacion local, ta pa un periodo temporal mientras cu parlamentario de Meza ta soluciona su problemanan legal.
Despues Gabinete AVP-FUTURO e ora a nombra parlamentario Jennifer Arends-Reyes como candidato pa e cargo di Minister Plenipotenciario, cual na final di dia e parlamentario a rechasa.
Casi seis luna despues ainda Gabinete AVP-FUTURO no a duna ningun informacion ni actualisacion tocante e nombramento di un Minister Plenipotenciario. Dia 13 di augustus Bon Dia Aruba a tuma contacto cu minister di Relacionnan di Reino, Gerlien Croes y a manda e pregunta si gobierno tin un candidato den bista pa bira Minister Plenipotenciario, pero te dia di awe no a ricibi respuesta
