Gobierno Hulandes a informa cu Minister di Defensa, Ruben Brekelmans a combersa diahuebs ultimo cu Prome Minister Pisas (Corsou), Gobernador Soliano (Boneiro), y un representante di Prome Minister Eman (Aruba) tocante e desaroyonan actual den e region, incluyendo e despliegue di Merca den Lama Caribe.

Segun e comunicado di prensa publica riba pagina oficial di Gobierno Hulandes, Minister Brekelmans a enfatisa cu e despliegue actual di Merca ta enfoca primordialmente riba operacionnan contra droga den awanan internacional y cu Reino no ta envolvi den e operacionnan aki. Na mesun momento Hulanda ta keda den dialogo cu e partidonan envolvi pa promove interesnan di Reino.

“Nos ta un Reino. Specialmente awor, ta importante pa nos informa otro lihe, completamente, y sin ambigüedad. Di e manera aki, nos ta keda alerta hunto, ofrece paz y claridad na nos residentenan, y proteha nos economianan,” Minister Brekelmans a bisa.

Segun e comunicado e mandatarionan di Corsou, Boneiro, y Aruba a enfatisa durante e reunion cu nan ta experenciando e situacion eynan di prome man. P’esey, comunicacion rapido y cla ta esencial pa informa residente y bishitantenan corectamente.

Durante e reunion a acorda pa sigui vigila e situacion di cerca y pa fortifica liñanan di comunicacion existente y mantene un bon coordinacion cu otro.

Dia 21 di augustus prome minister Mike Eman durante un conferencia di prensa extraordinario a informa cu a base di informacion oficial ricibi, no mester tin panico y comunidad por keda trankil.

Prome minister Eman a splica, segun informacion cu gobierno tabatin y cu por comparti na e momentonan ey tabata cu Merca a anuncia nan tin fregatanan militar cu tabata na caminda pa region Caribe cual Merca a informa tin como meta fortifica e parti di combatimento di narcotrafico pasobra Presidente Trump kier aumenta e vigilancia y e forsanan cu cual Merca ta combati narcotrafico.

El a splica cu paisnan manera Merca, Hulanda, Francia entre otro, pa hopi aña caba ta usa e forsanan militar pa fortifica e combatimento di droga, pues no ta trata di algo cu ta inusual.

“Den e sentido ey locual ta sucediendo no ta nada for di normal, cu e excepcion naturalmente di un presencia cu ta ser anuncia cu cierto metanan hopi cla. Pero e hecho cu tin instrumentonan militar ta ser usa pa combati droga ta algo cu a ser dicidi hopi aña pasa caba den cual Reino Hulandes y Wardacosta tambe ta tuma un postura tambe den e mesun area di Caribe aki,” e mandatario a agrega.

Prome minister Eman a urgi comunidad pa keda trankil y alabes a enfatisa cu si tin cualkier motibo cu esaki por bay den otro direccion, gobierno ta monitor continuamente y lo t’ey pa duna comunidad informacion riba con nan ta mira e situacion y haci analisis di locual ta sucediendo.