Dialuna anochi, equipo di redaccion di Bon Dia Aruba a tuma nota di un video circulando riba Facebook unda ta mustra un caso sumamente preocupante di abuso di mucha. Den e video por mira un persona verbalmente y fisicamente abusa di loke ta parce su yiunan.
E grabacion viral supuestamente a cuminsa circula via WhatsApp, unda varios hende a reporta di a haya e video aki di un conocido. E video ta consisti di un compilacion di varios momento unda e sospechoso a dal of a grita, muchanan cu segun usuarionan riba Facebook, ta su yiunan. Den e prome video, por mira un mucha sinta den camber ta hunga riba laptop prome cu e sospechoso a cana drenta y a cuminsa cuestiona e mucha di un manera agresivo. E gritamento a escala rapidamente, unda e sospechoso a tira palabra derogatorio pa e mucha. Por a mira un otro persona, un muhe ken segun usuarionan ta e madrastra di e mucha, purbando di intermedia y preveni e situacion di bira uno fisico. E mucha, spanta, ta sinta cu pia cerca di otro pa purba consola su mes.
Den un otro momento den e video, por a mira e sospechoso verbalmente asaltando loke ta parce su yiu muher, te hasta dal e buki of papelnan cu e mucha tabatin den su man, lagando esaki cay abao.
Un otro momento—uno cu tabatin un impacto grandi riba usuarionan—tabata den cushina unda e sospechoso a lanta man pa un mucha sinta na mesa. E atake tabata aparentemente relaciona cu un papel di scol cu e mucha no a trece cas back.
No a tarda mucho pa e video aki bira viral, ya cu hopi hende a keda sumamente preocupa, rabia y tristo pa mira e tipo di tratamento aki di muchanan menor di edad. Mesora usuarionan riba Facebook a parce di a identifica e persona, kende supuestamente tin inicial D.J., un persona conoci den comunidad. Sinembargo, te awo autoridadnan no a confirma oficialmente e identidad di e persona riba e video.
Hopi usuario mesora a duna nan reaccion, expresando nan indignacion pa e actonan aki y compartiendo nan experencia of urgi pa un cambio den mentalidad y pa autoridadnan tuma accion den e caso aki.
Manera un persona a comenta, “Hopi jammer pa wak un hende cu den dia cla kier laga mustra manera e ta un bon tata y ta biba un bon bida ta actua asina ora solo baha. Si bo tin trauma di locual abo a pasa aden ora bo tabata chikito, busca ayudo meneer. Y como hende cu a segun abo a experencia abuso verbal y/of fisico, lo mi a verwacht miho di bo pa compronde con bo ta laga e mucha sinti ora bo actua asina.”
Mester menciona cu den e video, e muhe cu a purba calma e prome situacion tabata referi na e sospechoso su mesun experencia di a sufri abuso na man di su tata. Den e video por a tende e dama bisando “You’re turning just like him (su tata)”, unda e sospechoso a contesta, “I don’t give a f*ck.”
Segun otro usuarionan a indica den comentario, esaki no ta e prome biaha cu a señala na autoridadnan actonan di abuso interfamiliar cometi pa e sospechoso. Algun usuario a comenta cu e sospechoso ta conoci pa abusa hasta su parehanan. Un stacion di radio a señala cu e muchanan a ser tuma pa un fundacion unda nan lo keda tanten e caso aki ta bao investigacion.
Bon Dia Aruba mes a tuma contacto cu ambos vocero di KPA y OM, unda vocero di KPA, Liliana Rasmijn a confirma cu Cuerpo Policial ta na altura di e video y ta evaluando e situacion pa asina por tuma un decision di con ta aborda e situacion. El a subraya cu e caso aki ta uno sumamente sensitivo, debi cu e ta envolve mucha menor di edad. Pa e motibo aki, KPA no a divulga mas informacion. Di OM su parti, a splica cu e institucion lo bira envolvi unabes cu e sospechoso ser presenta dilanti hues comisario. Te ciere di e edicion aki, no a haci ningun aresto.
No obstante, e punto cu mas a resalta den e situacion aki tabata e hecho cu e abuso aki a nace di un ciclo di abuso verbal y fisico cu e sospechoso supuestamente mes a experencia. Manera a menciona, ta parce cu e sospechoso mes ta victima di abuso experimenta den su infancia, cometi supuestamente pa su tata.
Hopi usuario a comenta riba esaki, expresando ambos piedad pa e sospechoso pero tambe rabia y frustracion cu e ta sigui perpetua e ciclo toxico aki. Manera un comentario ta bisa: “Ta locual cu el a biba den su infancia na man di su tata e ta bezig ta haciendo mesun cos cu su yiu hopi ferfelo pasobra e no conoce otro.” Mientras tanto, un otro usuario ta rechasa esaki, bisando cu e sospechoso tin un responsabilidad pa sa mihor y pa ta un figura den bida di su yiunan cu ta crea un “safe space” pa nan: “E ta bon grandi pa siña su mes miho. Un homber grandi scapa. No tin excuus.”
E topico di un ciclo toxico di abuso a bira un punto importante di discusion desde cu e situacion a surgi, unda varios persona a conta di nan mesun experencia y con esaki a laga nan cu trauma—algo cu nan ta bisa ta claramente visible den e sospechoso y cu e yiunan awor lo sufri di dje pa via di e tratamento aki. Un usuario riba Facebook—aparentemente un psicologo—a menciona con abuso verbal y fisico ta algo cu ta integra den nos cultura y cu ta laga atras generacionnan di victima, ken na nan tur turno ta sigui perpetua e comportamento aki. A subraya cu ta importante pa adultonan cu trauma (sea consciente of inconsciente) busca e ayudo cu nan mester pa no solamente cura nan mesun trauma, pero pa preveni pasa esaki over na yiunan.
Como resultado di e situacion aki, e sospechoso a publica riba Facebook un disculpa publico, atendiendo e situacion y sugeriendo cu tabata e mes den e video. Den e publicacion, ta parce cu e sospechoso ta reconoce y ta tuma responsabilidad pa su actonan abusivo, y a bisa cu desde e tempo ey (e grabacion ta di 2024), el a busca ayudo pa mehora su mes y su relacion cu su yiunan. Den su publicacion el a sugeri cu el a cambia como persona y cu e tempo aki e tabata experenciando un crisis emocional y no cu e video no ta refleha e amor cu e tin pa su yiunan.
Tambe el a confirma cu e videonan aki ya a yega den man di diferencia instancia, incluyendo Cuerpo Policial, y cu actualmente e caso ta bao investigacion.
