Nos regionta keda haya atencion internacional. Esaki pa motibo di e accion militar di Estadonan Uni den e area aki, segun nan declaracion pa combati narcotrafico via lama. Accion ta bay dirigi specialmente contra Venezuela, den cual ta acusa gobierno di presidente Maduro di ta involucra directamente den narcotrafico. E problema pa nos, como bisiña, no ta cu tin accion contra narcotrafico, pero cu awor ta trata di dos pais cu no ta mucho interesa den respeta ley internacional. Pero por tin mas den wega aki: e petroleo pisa di Venezuela y petroleo di Guyana, explota pa empresa Mericano.

E demostracion di forza militar Mericano a conduci na e suceso reciente riba lama entre Venezuela y Trinidad, unda un boto cu segun autoridadnan di marina Mericano tabatin 11 persona a bordo, a keda totalmente destrui, sin sobreviviente, pa forzanan militar di Merca. Naturalmente den un caso asina e opinionnan di e gobiernonan ta totalmente opuesto, pero tin cierto hecho cu e pais atacante mes a aporta. Tabata trata di unboto cu tabata transporta droga y cu tabatin e cantidad di persona ey a bordo. Common sense mester bisa nos cu un lancha cu 11 persona a bordo ta parce mas un embarcacion cu tabata transporta migrante; un practica masha comun entre Venezuela y Trinidad & Tobago, pa e distancia minimo entre ambos pais. Transporta asina hopi hende ta kita espacio pa por transporta mas mercancia. No por exclui tampoco e posibilidad cu tabata transporta tanto hende intencionalmente, pensando cu lo tabata menos probable cu forzanan di marina Mericano lo ataca di e forma fulminante, manera e mesun autoridadnan a splica. Aparentemente por mira e accion aki como un manera di marina Mericano pa establece un ehemplo, un advertencia na e cartelnan cu di awor en adelante ta asina ta bay actua. E pregunta sin embargo ta si mester bay di acuerdo sin mas cu e forma di opera aki. Esaki pa cuminza lo ta un problema pa Reino Hulandes, cu logicamente ta coordina accion den e area cu autoridadnan Mericano, como responsable pa e zona economico exclusivo y den colaboracion cu e islanan cu ta responsable pa nan awanan teritorial. Ta poco probable cu gobierno Hulandes ta di acuerdo cu un manera di opera unda practicamente ta pasa pa loke por considera ‘ehecucion extrahudicial’, sin intento siquiera di detene e embarcacion. Di banda Mericano ta argumenta cu e transporte tabata pertenece na e banda Tren de Aragua, declara recientemente un organizacion terorista, y por lo tanto un obheto hustifica pa nan. Tanten marina Mericano ta actua di e forma aki den awanan internacional, no tin nada pa stroba nan, pero e asunto lo cambia dia cu un accion asina tuma lugar dentro di e zona pa cual Reino Hulandes ta responsable. Ademas, pa loke ta e posicion di Aruba mes, un accion asina den awanan entre Aruba y Venezuela por trece problema serio, den nos porta di cas, na modo di papia.Y no kere cu e violencia no por yega na nos porta; no ta tanto tempo pasa cu un persecucion aereo a termina cu un avion destrui den awanan teritorial di Aruba, sin cu a bin un splicacion drechi ta kico a sucede ey.

Awor tambe nos mester tende cu nos no mester preocupa, cu e asunto ta bao control.Por ta cu e ta, ainda. No mester lubida cu ta trata aki di dos pais, Merca y Venezuela, cu ta duna claro señal di no ta preocupa cu derecho y ley internacional. Nos ta parti di un nacion cu ta bisa di ta cumpli sagradamente cu hustamente ley internacional, pero aki tin claramente un riesgo den keda involucra den un confrontacion militar di escala mayor.

Pero tin mas posible aspecto importante den e confrontacion entre gobierno di Trump y e regimen na Venezuela. Un invasion militar na e pais ey ta parce menos probable, a pesar di hopi speculacion internacional den e sentido ey. Venezuela ta un pais grandi cu lo costa hopi tempo y morto pa conquista. Pero Merca su meta primordial lo ta con pa yega na e petroleo Venezolano. E actual confrontacion economico entre Merca y Canada tin como consecuencia cabacu acceso na petroleo pisa Canades, te awor e proveedor principal di crudo pisa na Merca, lo bira hopi menos pasobra Canada a opta pa diversifica su mercadonan, specificamente na Europa y Asia.Y Merca tin mester di crudo pisa pasobra e crudo liviano Mericano no ta brinda e gama amplio di producto (intermedio) cu crudo pisa tin.Ta pesey Merca ta importa crudo pisa y ta exporta un parti di nan produccion di crudo liviano. Por lo menos un parti di e 4,5 miyon bari pa dia cu Canada tabata entrega na Merca na 2024, lo mester bin di otro fuente. Asina Venezuela, cu e reserva mayor di crudo pisa na mundo, lo por bira un alternativa atrobe, si por yega na un situacion na e pais cu ta facilita un acuerdo di suministro,cu esun cu ta goberna e pais. Sin embargo, ta dificil pa visualiza un situacion unda ta logra instala e actual oposicion como gobierno; esey no a logra den mas di 25 aña y probablemente awor tampoco. Ta parce mas probable cu gobierno Mericano ta mustra forza, pa despues yega na un entendimento cu e actual regimen. De paso lo negocia garantia cu Venezuela no ta ataca e inversionnan Mericano den petroleo na Guyana. Cuidao cu Trump no ofrece pa intermedia den e conflicto entre Guyana y Venezuela, aumentando su supuesto candidatura pa premio Nobel…