(AP) – Prome Minister di Reino Uni Keir Starmer riba diahuebs a despedi e pais su embahador na Merca, Peter Mandelson, a causa di su conexion na ofensor sexual condena Jeffrey Epstein.
Den un declaracion den House of Commons diahuebs, minister di Exterior Stephen Doughty a bisa cu e decision a bini den bista di e publicacion e siman aki di e-mail cu Mandelson a manda Epstein den añanan 2000, den cual el a duna su sosten na e difunto hasta ora cu e tabata enfrentando prison pa ofensanan sexual.
Douthy a bisa cu e e-mailnan aki ta demostra e “profundidad y extento” di Mandelson su relacion cu Epstein tabata “materialmente diferente” for di loke tabata conoci ora cu a nombra su persona embahador na Washington aña pasa despues di e partido su victoria den eleccion.
Mandelson a tuma e posicion aki den februari despues di loke e gobierno a describi como un proceso “extenso” di evaluacion. El a expresa lamento profundo cu su conexion anterior cu Epstein y a bisa cu e no tabata sa nada tocante su actividadnan criminal.
“Den bista di e informacion adicional den e e-mail skirbi pa Peter Mandelson, e prome minister a pidi e secretario di exterior retira su persona como embahador di Merca,” Doughty a bisa.
En particular, el a señala na Mandelson su sugerencia den un e-mail cu Epstein su prome condena den 2008 tabata “eroneo y mester keda desafia.”
