Diaranson, minister di Turismo, Labor y Transporte, Sr. Wendrick Cicilia a comparti un advertencia riba rednan social. E minister a indica cu tin un persona ta haci uso di un number di celular pa manda mensahe na hende y pidi fabor den nomber di e minister, sin cu tin autorisacion pa haci esaki.
“Tin un persona haciendo uso di e number +297 5653330 cu ta pidiendo fabor na nomber di Minister Wendrick Cicilia,” e minister a skirbi, alabes pidiendo su siguidornan pa “block e number.”
Segun Cicilia a informa, “ningun persona ta autorisa pa pidi nada na nomber di Minister Cicilia. Please tene cuenta cu esaki.”
Hunto cu su mensahe, el a comparti un screenshot di un combersacion, aparentemente riba WhatsApp, unda un persona usando e number menciona ta haciendo peticion pa donacion den nomber di minister Cicilia.
“Aki cu Michael Carty, assistent di minister” Cicilia, e persona ta bisa den e mensahe. “Minister a bisa nos cu abo te main man cu ta regel cuminda ora di fundraisingnan,” e ta continua, prome cu indica cu “NOS”, insinuando su persona y minister Cicilia, tin mester di ayudo “100%” pa un evento na december. E ta continua bisando e persona cu “NOS” tin mester pa e persona sigura cu tin basta cuminda, sopi, etc. Ademas, el a bisa cu tin 25 buki di rifa pa e persona bende, pa e auto cu ta bay rifa pa fin di aña.
Manera e minister a splica riba su post, e persona aki no ta autorisa pa haci peticion ni manda mensahe den nomber di minister Cicilia, y pues e mensahenan ta fraudulento.
E minister no a indica si ta bay entrega keho formal contra e persona mandando e mensahenan aki.
