E cuatro minister di Husticia di Reino Hulandes a cera acuerdonan nobo riba sosten durante detencion y cooperacion den cuido forensico, segun medionan di Reino a reporta ayera. Minister di Husticia di Aruba, Sr. Arthur Dowers (AVP), kende ta presidente di e consulta JVO aki, a bisa cu ta dun’e siguransa pa sa cu por depende riba e otro paisnan ora bo no por logra riba bo mes.

Noticiero di Sint Maarten, The Daily Herald a reporta cu Corsou y Hulanda ta bay colabora riba training pa hende trahando den detencion, pero specificamente, tambe den institucionnan manera Clinica Capriles. Minister di Husticia di Corsou, Sr. Shalten Hato, a bisa cu a yega na un acuerdo pa training pa profesionalnan cu ta traha cu pashent forensico y detenido, agregando cu ta un proyecto valioso pa e islanan. Hulanda ta ofreciendo sosten financiero, pero no a anuncia e cantidadnan ainda.

Sint Maarten y Aruba a discuti sosten pa detencion, un di e retonan mas grandi cu Sint Marten ta enfrentando actualmente. Minister Dowers a bisa cu si ta necesario, Aruba por manda personal di nos servicionan pa duna sosten. Minister di Husticia di Sint Maarten, Sra. Nathalie Tackling, a gradici “nos coleganan di Aruba, cu a ofrece asistencia,” agregando cu e ta spera cu Sint Maarten por asisti otro paisnan di mesun manera unabes cu e prison nobo ta construi na 2028.

E reunion bianual JVO ta enfoca riba cooperacion riba retonan den Caribe y e parti Europeo di Reino Hulandes. Temanan clave ta inclui crimen subversivo, escasez di personal y aumento di violencia, incluyendo di arma di candela.

Otro temanan ta inclui migracion, e intercambio y proteccion di data personal, y mehoracion den representacion di ciudadano di Hulanda Caribense den organisacionnan di husticia manera Ministerio Publico (OM) y Corte Halto.

Den un post riba su pagina di Facebook ayera, minister Dowers a agrega: “Justitieel Vierlanden Overleg (JVO) a aproba e propuesta pa un cooperacion mutuo cu e paisnan den Reino. Jeugdcriminaliteit: Un di e puntonan di prioridad.”

E paisnan ta trahando hunto pa haya y retene suficiente personal, y a organisa un job fair entre otro, segun medionan di Reino. Hato a menciona tambe cu tin acuerdo pa no haci recorte den personal di husticia durante reforma. Desafortunadamente, Aruba ya a haci recorte di personal despues di pandemia di coronavirus como parti di acuerdonan cu Hulanda, minister Dowers a bisa, agregando cu e prison tambe ta enfrentando escasez di personal pa motibo di sentencianan di prison mas largo. E idea ta pa alivia esaki mediante detencion electronico y castigonan alternativo.

Minister demisionario Hulandes, Foort van Oosten, kende a asumi e cartera di Husticia y Seguridad apenas seis dia prome, a bisa cu Hulanda tambe ta enfrentando un escasez di personal. El a bisa cu e ta reconoce e problemanan na otro paisnan, cu no por resolve den un solo dia. Tin demasiado vacatura y mucho tiki hende. Pero el a bisa cu durante JVO tambe a reuni online cu hende cu ta den training pa bira fiscal na e islanan.

Segun e relato, e ministernan a bisa cu e tema di crimen subversivo ta rekeri un discusion mas profundo, y ta bay discuti esaki durante un sesion strategico na Sint Maarten na januari durante e proximo JVO. Minister Tackling a bisa cu ta bay evalua kico “subversivo” kiermen pa e diferente paisnan.

Ademas, e ministernan a expresa cu e paisnan kier comparti experiencia di un di nan preocupacionnan mas grandi, cual ta un aumento den posesion di arma di candela y violencia. Minister Tackling a agrega cu esaki tambe ta mina estado di derecho. “Den proximo periodo, nos ta bay enfoca riba con e armanan aki ta drenta nos pais,” minister Tackling a agrega.

Tambe a usa JVO pa termina formalmente e voogdijregeling. Bao di e areglo aki, ora muchanan move for di e islanan pa Hulanda Caribense, tabata asigna nan un voogd Hulandes, sin importa si servicio di proteccion di mucha tabata involucra. E areglo aki ta anticua, y pues e cuatro minister a firma un decreto pa termina esaki.

Concluyendo, minister Dowers a nota cu e disponibilidad pa coopera den sector di husticia a intensifica. El a agrega cu e no ta un asunto di Reino, pero tin cooperacion intensivo dentro di Reino den e area aki, agregando cu e ta nota un interes creciente entre e partnernan Hulandes pa haya mas conocemento tocante e islanan, y ta nota mas comprension.